戲呢家野真有趣。大家睇戲，係為左脫離現實，但大家沉醉於用銀紙建築之虛幻時，久唔久有人調番轉整套玩真唔玩假之中至低成本製作，仲要鋸得到大樹。非講四仔，而係仿紀錄片式寫實，神檯級經典自然係《Blair Witch Project》（仲未睇添），近年最出名必數大怪獸打美國之《Cloverfield》。但呢類仿真製作次次都係個個話唔好睇、唔知講乜，但又人人照入場睇，吹咩。

「不過，相信今套會係最多人滿意、鬧得最少一套。」

中文名叫《八十分鐘死亡直播》（夠晒八十），上畫後好多人好奇入場睇，5/9紅燈山丘中英雄再遇，其中一個討論題目就係呢套「爛片」。本身已經睇硬，而家噉樣提一提、講到套野似笑片多過似恐怖片（其實有幾多套恐怖片唔係？），跟住一晚立即走去睇睇先，仲要應景地揀豪華11:30午夜場。本身豪華地段唔旺地方殘舊已經少人，仲要咁夜睇，先至夠恐怖片feel嘛！

今場同七刀同學兩個去睇，十一點三買飛，兩條友包場，難怪賣飛阿姐態度咁差啦，因為我地兩個，搞到全院冇得早收工！恐怖片一定要黎豪華睇，成間千人院得兩個人，夠唔夠陰森恐怖先！

諗住包場好正，點知臨開場仲有人入黎一啤兩個，咦得喎我地兩個可以化black metal屍妝嚇鬼佢地喎！點知跟住再多兩啤人入黎，開左場又多兩個，就算囡囡唔計都要一個人打兩個，唔夠抽，冇得玩扮喪屍了。唯有睇戲。當全場一千個位只得十個人時，一個人分到成百個位即係四五行，你想點坐都得啦！

「從未試過睇戲睇得咁metal！」

專登買埋野飲野食入場睇架！噉先夠old-school睇戲感覺！個故事其實一樣咁old-school，預告片懶係神神秘秘但一早估得到係喪屍片，一班人入左棟大廈，點知喪屍出現，政府又封鎖晒全棟大廈，入面班人迫住自生自滅一路搵路走一路死，喪屍片典型，咁多套戲拍埋比分別只在於中間邊個緊張ｄ邊個多血ｄ，同最後結局點收科、可唔可以自圓其說。《[REC]》新意在借電視台追訪為名，搵左位女主持帶住大家實地追訪，睇死睇血之餘又有得睇囡囡尖叫。

「明顯地，如果唔係囡囡而搵左條仔黎做，立即冇人有興趣入場睇囉。」

前因發展都係正路過正路，但最大分別係全棟大廈住客夾埋先十個左右，再加後來出現之外人，整體人數唔多，加上電視台追訪之前提，用訪問俾各住客交代番背景、環境、出身、有幾恐怖，就突破左同類片之老生常談同框架了，最正係班友演技得入到戲，特別最後消防員遇屍殺屍好鬼正，真實感比一般齋拍住班人走下停下之後對住鏡頭嗌「好驚呀！！」真實感重得多，同更具戲劇性，角色少絕對有幫助，即使你可以話到最後全大廈變晒喪屍都只得十幾條唔夠過癮。但動作同死唔太係本戲重點嘛。場面可以好血腥，但係較少同唔算非常強烈，主要係影各位住客同（最重要）女主角嗌晒癲晒嚇人做驚。一心入場為睇成群喪屍撲埋條友身上撕開幾截圍住黎食，出門口叫阿姐回水好過啦。

好多朋友成日話睇神怪戲無聊在冇得解釋，《Cloverfield》俾人小得最勁啦隻怪物無端白事出黎，打爛晒成個城到完場都冇講點樣黎 － 其實作者原先設定係睇戲之前你要上網睇好多網頁、睇完套戲再上網接收埋大量補充資料，去理解故事同怪獸之來龍去脈，如此牽連埋電影以外、睇前睇後都要持續參與之新概念，近年電影同音樂都廣泛採用。只係對香港人黎講，一來英文唔識，二來邊有咁好氣，睇戲睇到做功課噉，你睇？放心，《[REC]》你一定睇得開心，因為套戲係有得解的。

「唔想知劇情者，可以直飛最尾。」

去到最後，故事先開估：原來大家見到的唔係喪屍 － 最少宗教角度唔係。一切源於一個撞邪、上身後行徑完全喪屍化之魔女。最少導演都花左一段篇幅解釋，同用個魔女幫全套戲合理地埋到尾加再留伏線。劇情上，這是難得通順而交代得清楚之喪屍片。更欣賞各位演員演技，同編劇之精心舖排。所以套戲睇完，相當滿意，只係有點老土橋段，糟蹋左少少。好似話梵蒂岡捉左條魔女黎西班牙，你諗住驅魔人式儀式僻邪？唔係。山長水遠黎到，一個宗教組織竟然係用科學方法整疫苗去「驅魔」，而最抵死係本身條女只係自己有事，但經班神父搞幾搞，疫苗令佢異變，唔止自己仲會傳染其他人做喪屍／魔鬼。跟住天主教班友決定係將條女鎖係大廈入面，自己一走了之。如此打救世人方法我都係第一次見。既然佢地都知道條女在世咁危險，點解唔索性殺左佢，仲留佢係度累人累物？再者，一個人幾時變喪屍、幾時會彈起咬人，完全預計得到欠缺驚險，縱有透過醫生用生理學角度解釋為何喪屍發作異變時間條條不同，始終做到出黎就係太老土了，但都未夠好多時ｄ人明知走埋去就會俾佢咬都照埋身咁戇居。而大家對眼、電視台攝影機，可能見《Cloverfield》部機上刀山落火海大怪獸摧殘再摧殘都完好無缺俾人鬧到喊，今次部機正常左好多，起碼有衝撞時會壞會故障、有雜訊，雖然仍然能夠撐到最後唔爆唔壞吹佢唔脹。叫做合理化左少少先囉。但仍然為顧及電影感，攝影師有點無敵，無論面前難關係乜有幾危險，佢都可以繼續拍落去加拍到所需場面。你睇電視台，戰地記者都唔係全場托住部機上膊頭啦，緊張關頭走佬時都會放低部機抽住走人，而且見自己partner嚇到死咁滯喊苦喊忽，仲點會企定定拍佢點喊點慘法，而唔係放低部機幫拖？所以劇中電視台攝影師，成群喪屍追住、幾危急關頭，仲可以保持得住攝影姿勢拍片俾大家睇，值得拎番個格林美最佳攝影獎。噉又當然，如果次次一有事立即掟左部機去拍地板，套戲你睇？

「如果能擺脫埋諸如此類cliche，導演就真係成功超越到一般喪屍片、驚嚇片、仿寫實恐怖片。畢竟劇情好，都要顧番觀感同點點商業。而家搞到動作場面方面行貨左少少。感想之一係如果《Bio HazardResident Evil》拍到噉樣，而唔係想做到自己似《House of the Dead》多過《Bio Hazard》，肯定好正。」

《[REC]》其中一條預告片係戲院入面用夜視鏡拍低觀眾反應，當然係好多姐姐仔好驚彈起尖叫果ｄ啦，不過睇完真係感覺唔到有咁激，加上條預告片入面全院滿坐，但當時套戲仲未上首映都唔知有冇咁早，喂假左少少喎？總結的話，年頭《Cloverfield》我已經好鍾意，但睇完年底《[REC]》，這才是正野。要提的是《[REC]》係歐洲片黎。

「幾時都話電影同metal一樣，歐洲才是好野、東歐先夠癲。」