我諗睇日本動畫，冇一個人會唔識《新世紀福音戰士》or EVA，不論鍾唔鍾意，因為空前絕後。出品年份九幾中，係日本動畫開始向下（除質素，還有市場向），國寶級高達都開始玩膚淺玩低B，睇日本動畫大都咪話唔灰，所以調轉追求史上最深奧的EVA一出，佔盡天時玩晒。人和同樣冇人夠鬥，庵野秀明製作、貞本義行美工，源自《冒險少女娜汀亞》班底，假如《娜汀亞》場面你已經覺得好睇、人設已經吸引，EVA再下一城，單靚絕人設同究極真實型機設殺晒，戰鬥場面更加一流。地利在於出自日本，真實系動畫出現之後，日本動漫開始同美式分流，唔一味玩官能而講人性講心理，有深度之餘又比美國佬重美感，靚得黎型型得黎有野講，連好多大家熟悉的西方名作家名導演都係日本動漫迷，例如冇日本動畫，就唔會有《Matrix》。講到呢瓣，的確冇人夠EVA鬥，原因好簡單：
「庵野秀明條友癲架。」
其實一開始EVA十分正路，某處出現不知名機械生物，常規軍隊唔夠抽，危急存亡之際秘密人形兵器登場，唔多掂的主角被迫成為駕駛員。雖然偏白痴仔身邊有好多囡囡，每個角色總有自己特色問題，同故事背後隱藏住龐大陰謀．．．典型日式機械人動畫格局。何解咁受歡迎？好睇在人設機設加畫功，同非常充實之設定資料。庵野秀明式心理不平衡，到打十二使徒時開始黎料，走火入魔探討人性、性格缺憾、人際關係，進而討論存在主義，最後兩集係動畫史上最不知所謂結局，睇完，仲唔明過唔睇，又或者話單最尾兩集，足夠令你忽視晒之前廿四集指住庵野秀明狂爆粗。想當年香港首播係有線兒童台 － 冇錯係兒童台播呢套嚴重血腥暴力、耐唔耐有件裸女飄過、最後十集可以每集一半時間係蒙太奇式畫面加間歇出現似順又唔順有意思又冇意義兼具豐富哲學色彩對白，兒童台播俾兒童睇，而兒童的老豆老母係少少野都投訴到你仆街的香港人喎大佬，即係頭半齋打時已經cut到飛起，最後兩集直頭唔應該出街，我都唔知果時剪接組剪尾兩集剪左幾耐？每集完左仲有電話問題比賽，嘩班細路睇唔睇得明最後兩集呀哥哥？相信以香港官員同家長尺度，冇可能有電視台可以一刀不剪全套EVA出街，想睇都係搵套DVD算啦。
「好遺憾，我仲未睇晒無刪剪全線呀嗚嗚嗚。」
但走火入魔還走火入魔，「黎料」之後確有其哲學同藝術成就，第一次睇卡通動畫會出現真實世界影像，大量後現代製作同剪接手法，又係日本人先玩得出，同庵野秀明先夠膽玩。難得Gainax會忍到佢。（又可能係得Gainax忍得到佢）
可能因為一早計劃好晒啦，電視版擺明爛尾，即係會出電影版，仲要好野喎唔係一套而係兩套。第一套《Death & Rebirth》，《Death》係電視版頭廿四集超濃縮，《Rebirth》先係大家期待的真正結局，勁呀殺到飛起好精彩呀，點知一入戲肉，就完場。原來之後仲有個真．電影版結局篇《Tne End of Evangelion》，《Rebirth》只係特長預告片一套。吹到脹晒。不過你照會追埋喎，鬧還鬧。《The End》頭半用《Rebirth》一樣，只係今次量產型EVA五至十三號機出場後冇入字幕喇，有同二號機打埋落去，加埋埋個尾人類補完計劃完成。但睇真ｄ，電視版係碇真嗣同大班人吹左兩集水，之後得道補完，《The End》前半殺得勁但後半都係集中「吹水」，好多對白同畫面重覆電視版最後兩集，換言之係用打鬥加大製作場面，同唔只針對主角一個人而提及到全世界，將電視版九個幾字加長一倍，同睇得開心ｄ＆感覺易明ｄ（雖然都係唔明），只係《The End》確係非常精彩。要到電影先埋尾係電視版結局俾人鬧得太勁，定當時唔夠時間寫好／寫晒佢，定個劇本太暴力太極端（成數幾高，真係殺得好勁！），定好野留番俾電影再刮多筆？無論邊個，都顯得手段高明，電影版半集半集噉出，到頭來原來又係食番電視版老本，但各位白痴仔即係大家照俾Gainax featuring 庵野秀明昆完又昆。
嫌仲未俾人呃夠？唔緊要，2007係《The End》十年慶賀，慌死你唔記得左EVA，以《Rebuild》為名再黎多劑，仲要唔係一集，係一開四。問你死未？
「劇情已經完晒啦！《The End》最後全人類化成生命之水融為一體，地球剩番碇真嗣同明日香兩個做亞當夏娃，仲有得講落去？」
「有！咪從頭開始過囉！」
Director's Cut、再構想或者平行宇宙隨你選擇，但可能最正確講法係搵笨Ｘ。冇錯，電影版頭三部曲（又！）將電視版劇情分段重現大銀幕，不過唔同《Death》齋舊片新剪就算，除左「更靚畫功」（即係電腦CG up一update），劇情仲有改動同加新橋，只係．．．比你預期中少得多、唔起眼得多。《序》將電視頭六集打三四五使徒為主線，不過使徒排位全部加一，即係第三使徒個位懸空左，會唔會第十七使徒而家變成第三？不過講到《序》甚至《Rebuild》新改動劇情，暫時除左呢樣同結尾，同電視版接近完全一樣，係有少少流程改左、有新鏡頭新剪接新分鏡、用CG整靚左場面、好多細節位加重強調角色間獨立疏離，大變化確冇乜。變快左就好明顯，大佬六集電視變個半鐘喎而家即係要縮一半時間，係快到一個多餘鏡頭都唔想要、完左一幕一秒都唔蝕即飛落下幕，唔使卦？雖然成品感覺比電視易明、冇太多講廢話講道理（呢個係一係鍾意EVA一係唔鍾意EVA的主因），我覺得快過頭，又其實唔需要急得咁緊要，好在應慢果ｄ部份（大家睇《攻殼機動隊》同《機動警察》最鍾意果ｄ）冇受影響。不過夾埋，誠意不大係俾我印象。
唔值得睇？又唔係。EVA總有其好睇之處。劇情冇改，係機構標誌整色整水畫蛇添足（商品投機味濃），機設上零號機同初號機同原版得上色有些許差別，裝備改動較大，但睇極只似為出新模型而整。使徒更加強調其生物特質，一死立即爆水彈噉成個城全部血水，同機械破壞時都會化為血肉，電視版都冇咁特登提醒你使徒係人類另一進化成果、同人類一樣係生物，唔單純係機械個體。頭兩隻使徒細節有唔同但冇影響，就連打鬥過程都唔改先吹脹，反而第五使徒屋島作戰，因為係全系列最精彩其中一集，明顯地花左唔少心機翻新劇本流程，最驚喜係第五使徒玩CG，本來四方體一舊，今次攻防時會狂玩幾何形狀變化，屋島作戰本來已經好有迫力，編劇同最後戰略修改少少，加上使徒氣勢強化，單呢部份已值得睇《序》，又或者話睇《序》就係為屋島作戰。拿呢ｄ先叫做誠意嘛！但最好睇係臨尾：NERV本來收藏第二使徒、人類始祖莉莉斯，但外型唔同左（刻意地提早曝光俾觀眾知以舖排伏線），電視版相同模樣之莉莉斯片尾揭曉位於月球，就連十七使徒渚薰都係。睇埋字幕，當然唔少得預告片，睇咁食電視版老本就預左一定會有。第二集《破》，睇預告已經超想睇：融入內容似乎更多，或者《破》先係真正從頭編寫之新劇情？同新角色、「月球降臨的謎之六號機」（好似鷹頭獅），正喎原來全套《序》除屋島作戰，最好睇係預告片！初頭諗住話rebuild就係解謎，點知係出現更多新謎團，連月球都去埋夠晒亂。不過，噉先吸引。正正經經的EVA點會好睇？
最後，不得不講講音樂方面。配樂有睇電視版都知，超強，當年出soundtrack單電視版都有三四五六隻，每隻一個主要角色做封面，單買封面都抵，何況ｄ配樂真係超好聽？每個角色有自己主題曲，仲要有勁多個變奏版本，睇住劇情黎聽你就知道搞音樂果班功力幾深厚。當年仲成功到開左個新世紀福音戰士演奏會架，真係搵交響樂團同歌手聲優現場演譯出名配樂，有機會行台版碟見到有或者二手搵到，執隻返屋企聽聽啦，咁多動畫中音樂最得我心，就係EVA。電視廿六集，每集最後都係一個版本的《Fly Me to the Moon》，編曲要pop要jazz要rock甚至南美都有，差唔多全部女角有份唱，只係日本人口英文始終難頂，有時聽到你嘔泡．．．但，都好過《序》，係宇多田光新歌《Beautiful World》，可惜從來呢類R&B野冇乜興趣，加上太柔唔多夾EVA格局，好失敗好失望。同，《Beautiful World》話係《序》主題曲。真正的主題曲《殘酷天使之命題》去左邊？？？