2006823係零六年相當重要之日子，就係我地TRHK第一次班罪trhK。請假請早全日，朝早去考普通話夜晚唱K，中間個晏晝，去左睇《死亡筆記》。漫畫版係近年少有非常有心追晒之大作，就係因為劇情：每位死神都有一本筆記，同可以睇到人類死期同真名之死神之眼，只要望到一個人類，將佢個名寫落筆計入面，受害人就會按所寫死法完結生命。因為一個死神想玩，將筆記遺留人間，俾天才生主角執到，主角夜神月就用死神筆記以奇拿之名義執行自己眼中之公義，令殺人犯同犯法者大批大批被「制裁」。但並非人人都認同主角所想，全世界最頂尖天才刑警L同日本警方聯手決心偵破，漫畫前半部就係圍繞夜神月同L之鬥法，戰勝L後下半繼續同L繼任人N同世界其他野心勢力對峙，最後自然難逃一死。

好似好老土，但睇落又好新奇。通常非人世界物件跌落人間之故事，件超現實寶物對人間之影響往往係秘密地發生，唔會全人類全世界都知道，有關知情人士就只有正派反派兩邊ｄ人，其他路人甲乙丙都唔知有呢樣野存在亦乜冇受其影響，又或無意識間被影響而不自知，最行貨甚至未開始影響到人間就已經做低晒所有奸角，搞掂晒所有野解除左世界危機拯救完全人類。但《死亡筆記》反而藉來自死神界之筆記影響全世界全人類社會秩序同人文思想，設定已經唔多見。講舖排同邏輯，的確係50%無懈可擊 － 只係50%。漫畫頭半直到L死為止都係絕到無可再絕亦完全唔覺得有任何位係夾硬黎，的確係一個破綻都冇都搵唔到，只要係呢一步停低，成全一個死亡筆記重整世界之結局，《死亡筆記》會立即成為神檯級最經典最傳奇漫畫。可惜作者硬係要維護「邪不能勝正」之教育意義，令到L死左之後，又多個N，跟住完全唔使睇加千祈唔好睇，絕對令人失望。

通常漫畫或者動畫改篇電影版都冇乜動機睇，因為A) 劇情往往改到九彩　B) 篇幅所限一定只抽原作一段仔劇情出黎，睇完都未必夠喉或者明晒上文下理　C) 漫畫人物變成真人之後會樣衰千百倍　D) 真人化後，角色造型同動靜卻漫畫化地超現實造作。日本電影最後兩個問題更為嚴重，詳情請睇《金田一》。所以初初對《死亡筆記》電影版興趣唔算好大，結果都係入左場，原因同好多人一樣：純粹為左睇最後三個字。睇過最忠於原著之改編電影肯定係《死亡筆記》同漫畫有八成以上相似，有好有唔好，好就當然係fans唔會小啦，亦唔好在太忠於原著，睇過漫畫的朋友真係只需等最後三個字。因為要講晒漫畫頭三集內容，成套戲兩個鐘長都唔夠，好多野去得太快簡化太多唔夠時間講晒所有野交代得太淺白，冇睇過漫畫睇一次未必明得晒，漫畫迷則會更深入理解到主角失敗同未夠心思細密之處。另外快成噉，真係由頭到尾都平到冇高低起落，直到結尾，雖然個結局係奇但冇想像中咁出人意表，唔係本身《死亡筆記》個劇情已經咁精密，單從睇戲角度，其實唔多好睇。

最頂唔順，就係頭先講過之問題D)。歐洲同美國片好少有呢ｄ問題，可能就係因為唔一定要ｄ演員個樣同演繹要同漫畫完全一模一樣。唯獨是日本仔好鍾意將本來已經夠晒誇張之漫畫人物造型同動作，100%搬上螢幕，但呢樣野往往就係搞到我好唔想睇日本戲之原因：美國漫畫就話因為寫實所以改編成另一媒體時唔會有太大問題，但日本漫畫倒番轉追求夢幻式完美，真人同真實世界又點可能做到？所以，L點樣衰我唔理你唔似起碼都叫做做到其中神髓，但主角真係好鬼樣衰亦絕對冇果種邪氣同氣質。為免頂唔順，我到而家都好少睇日劇／日本電影。真係頂唔順。

第一集上畫後只隔兩個幾月，十一月頭《死亡筆記二》承勢接棒，又係，本身就係「同一套戲」，加上熱潮正盛，唔咁快上畫等下年咩？2006年十一月第一個禮拜係死亡週，星期三睇《死亡魔法》，禮拜六晚睇《死亡筆記二》。漫畫睇晒亦睇左第一集電影，對第二集之興趣著實唔係好大，又係「好頭好尾」之心態，既然只差第二集集就追晒全線，加埋「預測不能之新結局」，唯有乖乖俾錢捧場。結果係，失望，好果隻。

第一集雖然同漫畫幾近一樣步伐亦太快，起碼個結局有番ｄ睇頭，今集故事可以話係漫畫第一部自上集結局至L死之濃縮，更多死神同筆記落入人間，再加番漫畫第二部夜神月對N個結局落去，呢個正正係最失敗之處，因為第二部缺點係劇情同結局過於牽強。睇完實在唔想再多講，非常失望，第一集你係搵唔到有犯駁位同夾硬位，但第二集太多。一直都話死神唔係實體，點解雷姆第一次見第三奇拿時可以掂到佢？L話佢死左之後，夜神月老豆帶去美國本筆記會自動燒毀，點解夜神月透過死神「殺死」L之後，明知有機關仲會叫佢老豆帶番本筆記返黎咁戇居？原著中最最最戇居亦係最最最唔滿意係話最後本真筆記係比人換左，電影版更更更戇居係L寫自己個名落死亡筆記，既然已經換左本假筆記，即係就算寫左名落去個人都唔會死，佢只要等人寫佢個名落本假筆記時篤爆就贏晒，同時L講到明冇諗過死神會出手殺自己，亦即係唔係計劃以外死神出手佢根本點樣都唔會死，而佢亦冇諗過要提防定死神或者估到死神有機會殺佢，仲使乜專登寫自己個名落本筆記度自殺？變到佢自殺純粹係為個結局更加煽情，同夾硬拗番點解雷姆寫左佢名都殺唔死佢，但完全冇必要加無謂，加完衰多幾錢重。第二集一直用「預測不能」做宣傳賣點，但單單用漫畫第二部結局作為電影第一部埋尾，完全唔算點「預測不能」：開頭以為預測不能，係真係成個劇本成個結局改過晒，結果唔係只係東一段西一段砌埋就係新故事，更加令電影版結局顯馬虎，同間接顯得忠於原著之第一集佈局及結局更顯巧妙。假使佢真係敢改成L死左，夜神月用死亡筆記整頓天下，就真係夠晒薑，真係「預測不能」。可惜呢ｄ「政治不正確」之真正預測不能結局永遠唔會出現。實在唔想睇到而家呢ｄ一定要邪不能勝正咁正氣之結局。

就係咁失望，所以你見我寫呢套戲寫得鬼咁「短」。尤其三日前睇完《死亡魔法》，對《死亡筆記二》之失望再下一城。