Project: AVP



Phase 1: Alien vs Predator

《異形》,點講點睇都係科幻電影最經典系列之一,第二集更加係我心目中最佳科幻電影,可惜第三同四集差唔多不值一提,次次電視重播第一二集點都一定睇但係第三四集連開機之心機都冇。佢個世界觀同生物設計都係嚴謹同精彩到冇野講(雖然論嚴謹出色點都唔及三十年前已經自己諗度好晒《星戰》九部曲之George Lucas),最好睇係你永遠唔知隻野幾時彈出黎,同埋睇住一堆人對住勁大班異形殺極都仲有直到是但一邊(八成機會係人類)死Q晒。

《Predator》名氣相比下低好多,第二集甚至係大失所望,但不論設計、理念同歷史,Predator仍然係最型外星生物,《Predator》最正係睇隻野點樣屈機式以一敵百,但係遺憾在兩集都係打一隻咁大把,如果肯拍到係同成族人打而唔係打一隻咁大把,一定會係最好之一集。

小說、漫畫甚至game都出左好耐(想當年中二已經開始煲《AVP》隻街機版,直到今日呢隻仍然係我打過最正game而家都仲打到樂此不疲),戲等到今日先有。結果?先講講背景。話說十年前電影公司已經好想拍呢套戲,但係用左十幾年睇左四十幾個劇本,最後先揀到呢個正式開拍。好多人問,《異形》入面果個主教人造人唔係死左咩點解呢度又會有佢出現?又點解《異形》入面d人都知道有異形但係黎到呢度反而好似乜都唔知?既然地球都有隻皇后,點解仲要上太空捉蟲?答案好簡單,因為《AVP》設定左係《Predator》之後、《Alien》之前,所以班友知道有predator但係唔知有異形,而主教仍然係人唔係人造人。夾硬得幾合理架都。

套戲係話Predator幾世前捉左隻異形皇后困左係地球某處,每一百年會叫佢出黎生蛋比自己d子子孫孫用黎學習狩獵(呢個係佢地文化黎),點知有班人得閒得滯去睇下發生咩事就噉燒焦,而且班「人」出場之時間仲多過「異」同「獸」好多。我絕對相信,大家係想睇「異獸戰」,唔係「人異/獸戰」,漫畫版個劇情就係一堆異形同一堆predator打到九彩,亦相信放棄左果四十幾個劇本有唔少打得仲激,不過就係唔知點解唔拍「戰」,反而拍班友入「hunting camp」,隻野本身咁勁反而要屈就係個迷你金字塔打異形(仲要得十隻唔夠),係就拍勁d啦。可能原因係班高層睇劇本果時,
「五千隻異形對五千隻predator?一X流!不過係咪你俾錢拍?好似呢個噉咪好囉,簡簡單單成本又低又易拍!」

係真係好「易」。「異獸戰」,點知真正打既得十零隻異,獸仲得三隻咁大把,全部異形同predator加起黎都唔夠本身已經唔係好多之人咁多。點「戰」?睇預告片有一幕係三隻打成幾千隻,點知真係得一幕咁大把,吹脹。更灰呢,係班友都幾白痴下。有三隻predator以為算唔錯,點知有兩隻原來係傻仔玩左陣就釘蓋,即係其實全套戲得一隻。極灰架,大佬predator係自己套戲入面係勁過呢套戲果幾隻好好好多,如果係第一集同第二集兩隻黎玩,基本上好輕鬆地就殺Q晒所有異形同人清埋場番左屋企。而且造型同武器都改左好多,特別係個樣太過似人反而冇癮,以前個樣同裝備都邪同靚好多。最灰係睇野方法用番人類視野而唔係以前之熱視點,當堂冇晒意思。異形個樣冇咩變但係突然間變到超聰明,正路係去到第四集即係呢套戲幾百年後先有咁高智慧,不過打得好就得理鬼佢點唔合理。

問題係呢,「戰」之方法,差唔多次次都係摔角式一對一,而居然超過一半一對一之打鬥predator一定係比異形打得好慘:睇頭兩隻灰到第一隻一黎就死第二隻本身冇事都要無端端乜都唔理擺明比人做低,就覺得導演實在醜化predator到太犀利,大部份時間都係捱打。Predator本身係超勁架,唔會咁容易就比人伏到&比人打果陣冇反應&用埋d自殺式白痴方法同人打,可能真係為左早d整死兩隻就唔使使咁多錢整特技。不過見到一對一都可以輸得咁離譜,冇癮囉。最後打皇后隻predator得一招咁大把係似番隻predator應出之招(果野係拍得唔錯&幾型的),其他部份似侏羅紀公園打暴龍噉,想喊忝囉。發覺近年動作片好鍾意死玩一抽一(例如又係crossover之《Freddy vs. Jason》同《Chronicles of Riddick》),反而唔記得動作片致勝之道:幾萬對幾萬 or 以一敵百,亦即係《異形》同《Predator》吸引之處。

劇情呢,簡單,已經唔開心。又要前段去得好慢後段去得好快硬係睇得唔順暢,其他兩套因為好多人未見過先要醞釀咁耐先比班異獸出場,黎到呢度反正人人都知兩隻野咩料倒不如一黎就打唔使做佢地出場咁耐。結局呢又係一個傳統《異形》結局。即係?睇過《異形》一定會明,即係最後一隻異形一定要跌往深淵...同埋唔開心套戲咁偏重人類,最後死剩女主角仲要靠佢先做得低皇后(雖然有兩隻predator都係佢累到無端白事瓜柴勁戇居),喂唔係「異獸戰」咩而家?(記唔記得幾年前一套講玩具兵之《Small Soldiers》?又係衰同一樣野,明明係玩具兵打又夾硬要講到係同人打立即唔好睇)順便講你知,最後一段成族predator面對女主角果段,漫畫版係佢跟埋佢地走,電影版反而唔係。不過噉唔代表冇下集,因為聰明的導演一早預留左一個有點犯駁但係參考番漫畫版劇情之伏線,如果跟呢條伏線拍下一集一定會/應該會好精彩,雖然會唔會拍/拍唔拍得成唔知。可能佢一早已經plan好呢樣野,想重覆《異形》第二集勁過第一隻之歷史。

另一個極度不滿地方:
「血呢?」
真係打左成套戲,血都唔多滴,喂睇《異形》就係正在爆血爆到仆喎,而家打到仆都冇乜見紅/綠。既然做唔到《異形》之恐怖同《Predator〝之詫異,變左一套普通科幻動作片自然要搞視覺效果補救,點知呢d都冇埋,極度冇癮。不過傳聞係因為本身係三級不過臨時要轉做二級,唯有將所有血腥場面(又名「最正果d場面」)cut 晒,唯有寄望傳說中之director's cut DVD真係有料到挽回印象分。

《AVP》宣傳口號係"whoever wins, we lose"。其實冇咁跨,死極都只係得得閒得滯入去無聊果班傻仔,同埋你知最後一定唔會係佢地贏,因為地點係地球,所以一定唔會有事呵呵呵(話時話,除左漫畫同game仲未有一集《異形》係發生係地球)。如果比著我呢,一開頭就話地球或者某殖民地比異形佔據,predator剛剛黎狩獵皇后就成村人同佢地打,之後兩族野打到仆街人類剩係用黎死,噉就真係「異獸戰」同做到宣傳口號所講喇,而且一定精彩過呢套《AVP》萬倍。不過呢,都講過啦,咁大陣仗,你俾錢拍?

都幾灰,因為《異形》同《Predator》兩樣都係科幻生物之代表,而且兩雄相遇之漫畫、小說同game都係非常一流(有玩過史上最佳實時戰略遊戲Starcraft嘛?人類鬥異形鬥高科技外星人,根本就係《AVP》之改版,而且外星人之科技同文化思想亦同predator好相似),所以都有好高期望,點知電影版會搞成噉,異獸戰即係異形同predator打摔角。真係好失望。所以都係落機舖打多幾舖Alien vs. Predator同90年經典Aliens算。前者係到而家仍然回味無窮,唯一一隻可以兩蚊打爆機之行街game;後者係呢世人第一隻可以過到第一版先死之行街game。對住佢地,點都開心過對住套戲。

最後,如果有朝一日大家真係咁唔好彩撞到異形,我教你地一個只限人類之無敵保命方法:合埋眼唔好望。唔信的話可以由《異形》第一集起睇到《AVP》,每一個比異形活捉/做低之受害人遇害經過一定係如下:先聽到聲,之後好X驚,之後周圍望,望到最後一定有一隻一早企係側邊等左好耐吟左幾十次「望過黎呢邊啦仆街!」之異形,之後望實佢&嗌,之後近鏡異形流口水,之後再近鏡佢大口入面個細口流口水,之後受害人繼續尖叫,之後隻異形先會食佢。所以撞到異形,一日唔開眼,一日冇事,因為按照劇情安排,你一日唔望正佢,佢一日都唔可以食你。



Phase 2: Alien vs Predator 2

「《Predator》製作人/創作人參與製作《AVP2》。」
「《AVP2》會係三級。」
「《AVP2》唔會出現人類同Predator合作之愚蠢橋段。」
「《AVP2》會出現Prealien。」
「《AVP2》預告片非常精彩。」

一切消息向好,鑑於第一集實在係太差係差到出乎意料果隻,當初聽到會出第二集(必然之事,第一集伏線太明顯),冇咩預期,只覺得又要跌錢,
「鬼叫我係fans。」
但預告片出到黎,好睇過第一集成套戲。第一集導演係異形fans,自然將異形神化Predator只成次等,上集所謂三隻Predator,兩隻出出鏡就死左仲要死得好白痴果隻,枉佢地係電影出現過最強壯最重裝之兩隻。今次可能《Predator》班底回歸,Predator終於似番Predator,大佬雖然佢自己套戲因為同人類打永遠要打輸自爆死,《AVP》佢係做(反)英雄架點可以好似上集咁魚蛋架!另外故事重新定位各方,人類同樣夾係異形同Predator中間,但Predator獨自站穩主角之位已值得鼓掌,AVP世界人類只負責死同埋孵異形。多血多死人多外星生物屠殺人類多爆頭多斷肢多分屍打到七彩同會爆粗(唔爆粗的動作片有乜好睇?),應有盡有就預告片睇係好完美好貼近各位A&P迷所想,差兩樣。首先,地球冇問題,點解一定要係現代?game出過唔少,每隻AVP game都係三方對戰但世界觀屬未來,人類係用頭異形電影兩集年代之科技同武器。但今套戲仲要二十世紀軍備對異形同Predator。落重本將年代放到未來得唔得呀?又點解唔可以黎番次兩種族大決戰萬獸鬥萬獸之世紀場面呢?慳錢都唔係咁慳法卦?

未去睇已經有少少失望,起初講到好暴力多血多死人到會三級上場,點知同上集一樣得個2B。係香港人接受力高過美國?故事直接駁落上集結尾:第一集主角Predator同皇后一戰陣亡,遺體被運番上船,但早已被異形殖入,異形吸收Predator DNA而成之混種Prealien就在船上破體而出。
「既然異形係佢地天敵,架船可以咁大意冇偵測器?抬佢上船時會唔知?因為變左種?」
Prealien船上狂殺人,Predator反擊時炸穿左船身,全條船就跌番落地球撞落深山。度得幾好。
「但上集最後條船勁大隻加成族Predator坐係入面,今集條船點解細咁多,同得幾隻Predator咁大把?又影到條船已經離開左地球去到好遙遠之太空,點解又會跌得番去地球咁蹻?」
一如意料地,全部異形冇死,但Predator死晒,最後一隻臨俾Prealien殺死前急call班救兵。然後係異形仔周圍捉人變大異形時間。主角Predator收到call,由自己星球飛去地球收拾殘局。佢出場時個場景,我覺得有向《異形》借鏡。
「今套戲係第一次睇到Predator星球。宇宙船內部第二集尾睇到少少,但同呢度相比差好遠,第二集果隻外星感重好多。」
鎮民發現有人口失蹤,開始入深山搜索,Predator亦到達地球(超快!但佢個星球同地球唔係相隔不知多少光年咩?),純粹帶出異形成長同主角駕到,同場加送無辜警員被Predator剝皮示眾,不過我覺得整黎純粹係對各位Predator迷有個交代,欠缺實際發揮。第一場打戲,係追蹤異形到坑渠,之後神勇一個對一群,道具動作度得好,最重要係Predator唔再係俾異形祭旗而係神勇屠殺異形如各位fans所期望,型得黎仲要好多新武器,噉先係Predator嘛。見班靚唔夠抽,大佬Prealien出黎,抽兩抽之後大家散水,成班異形入鎮殺人繁殖,Predator繼續追殺。
「咦?Predator入坑渠時,明明係森林入面同日頭時間,點解打完之後班友撞爆天花一出就係市區,同個天已經黑晒?好似打左兩個字唔夠咋喎!」
大戰間炸爆發電廠全鎮黑晒,軍隊入境又俾異形殺晒,班死剩種自己搵路走人,分歧兩路:茄喱啡即係負責死果班,去政府叫佢地去之市中心等空軍救援,主角即係唔使死果班,去醫院搵直昇機走,但醫院一早俾異形霸晒。Predator入去係噉殺順便死多幾件人類,臨尾梗係兩大角色對戰,主角班友成功走甩,班茄喱啡,俾軍部一粒核彈炸死晒。
「鬼叫你唔係主角。」
男主角走甩時仲帶走Predator枝激光炮,順理成章成為第三集伏線。會點伏法?又等番兩三年啦。

「噉就完?係咪咁簡單呀?」
冇錯。全個故事就係咁簡單。不過仲衰過已經貼地的第一集。似Predator自己電影系列,第一集係人煙罕至地區,第二集係市區,環境切身理應更吸引但結果反拙。導演都知上集衰太多人類,因為《AVP》人類只負責做炮灰負責死負責生異形,你上面見我有講幾多人類?好少。但查實套戲入面,少過上集,都多到你眼訓,我係特登唔講。講到明今集唔會人類同Predator唔會合作,本應興幸,點知唔講點合作,後而講鎮入面各位市民人類點樣過日子,嘩頂搞到好似九點半開明珠台睇英文劇集。喂我唔係想睇你地個鎮有咩居民睇各位百姓點生活睇你點唔妥我我點唔鍾意你睇條女會突然失驚無神突然除衫發姣搞超白痴仔款之男大茄(佢搭上條仔加除衫個橋段簡直仲衰過AV,係咪唔搵條女除衫唔得??),我只想睇佢地點死同死得夠唔夠慘,結果同樣衰人類甚至衰得仲死過上次。因為導演想建立到幾個主要角色,亦即最後起甩幾個同俾核彈炸死的大茄喱啡,用好多筆墨時間去建立幾個人類角色,但全部一係死得無聊一係冇作為,睇到最後好多人出過多次/幾次鏡仲係面目模糊唔知咩來頭,你寧願全部人類係出一陣場即死果種,例如預告片入面兩pair:最先死之兩父子,同俾Predator雙激光炮爆頭的兩條「stoned」白痴,在《AVP》的世界中佢地先係模範市民。真係想其他人都係噉。而唔係講好多,但最後角色性格唔突出,甚至完全代入唔到冇感覺,想做又做唔到,浪費晒加霸住太多寶貴時間。女主角帶住個女走佬,似異形第二集,諗住會有發展?冇。個女戲份對白超少,去到後面唔係耐唔耐尖叫一兩下或搭一兩句嗲,你甚至唔記得有佢存在,都唔知加黎做乜。反而負責除衫果位女大茄最有驚喜,佢同條仔係其中最花心機去講之兩個,你諗住會走得甩啦,點知條女最後俾Predator一個飛鏢釘埋牆死,死得超型(我地頒番個好市民獎俾佢以示鼓勵),都可算全套戲最經典最意外高潮,雖然預告片已經睇到佢死果場。但佢死得咁慘,之後佢條仔俾異形長尾穿心口都唔死仲要血都冇流一滴仲走得甩,當堂吹到脹晒。
「囡囡,為呢條友,你除衫除得真係唔抵。」
至於其他角色同所有異形&Predator結局,簡單一粒核彈炸晒。夠求祈。就因為各位鎮民,全套戲個半鐘,有半個幾鐘係睇佢地9up,再半個幾鐘班人行行企企尖叫著草,真正打四份一都唔知有冇。唉。《AVP》係唔存在成也人類,只存在敗也人類。就算你整到一個環境只有異形同Predator完全冇人類一句聽得明之對白都冇,觀眾都唔會怪你甚至再加多謝你。點解兩集導演都唔明白箇中道理、唔明白各位fans所想,硬要想靠人類突圍?加上殺黎殺去都係果班人、都係果個鎮,完全做唔到危機感,完全唔怕唔驚,氣氛平淡。
「異形頭兩集同Predator第一集都係喎!咪又係死極都果幾個?」
「異形勁恐怖喎。Predator做到狩與被狩之氣氛喎。係導演功力問題。」

其他唔通加夾硬講通之地方,更加係自己幫自己落井下石。上面已經講左幾個。同你會發現全套戲最勁唔係異形唔係Predator,係女主角。話佢係軍人所以咩都識,任何野一拎上手都識用,開槍算碎料連開裝甲車同直昇機咁專業通通冇難度。同行另外兩位先生枝機槍射幾射就冇子彈,唯獨佢枝到最後,成堆異形圍住每隻十幾槍,射極都有得射仲逢射必中。莫非周潤發上身?另外男主角有幕係男主角拎左Predator枝激光槍,上面有隻異形,佢向上發炮,成個異形頭俾電漿炸到飛起,型到做埋預告片片尾。但,型一回事。佢噉樣向上射,爆頭之後碎片同頸狂噴血都係向下喎,即係坐正異形下面之佢食到應。點解可以連少少傷痕都冇??
「因為電漿高溫消毒,爆頭同時已經燒埋異形條頸,d血就標唔到出黎了。」
Predator同Prealien對打,Predator一野扭斷佢個細口,隻野立即瘋狂吐血。但企正佢前面的Predator完全冇事冇俾酸血溶左。何解??因為係主角??
「Prealien唔係純種Alien,所以d血唔酸卦...」
而故事承接上集,既然上集事態一直有大財團監測住,連公司總裁親自出動到極地,跟住總裁死左加成個極地地盤大爆炸,財團會冇任何反應?而按戲中時間,飛船失事撞番入地球係短期間發生之事,既然財團咁關心事態加咁大能力可以睇到咁多野,飛船撞入地球時點會唔知?而Predator用內爆彈炸爆飛船殘骸,咁大能量反應,又點會得唔到市鎮居民甚至財團注意,唔即時派人(係財團人員唔係國家軍隊)?最後鎮民集中市中心俾異形圍攻,之前成班軍人重火力同樣被圍攻都唔夠抽死晒,班居民得廿幾人幾枝槍仔,居然可以擋得住班異形?仲有更多更多。但最唔妥係條白痴仔俾異形成條尾穿心凌空吊起都唔死,仲要可以捱到臨尾坐直昇機走得甩,過程中完全冇受重傷之症狀仲勉強行得走得加打到異形,同完全冇流血。勁。即係唔係穿心單係穿肺,都冇可能咁若無其事啦大佬!受此重傷仲要咁多大動作,傷口唔立即惡化條友會唔失血過多?太白痴。又係俾人類累死。

好在套戲仲有可觀之處。首先似番d樣真係講緊異形同Predatord樣,上集兩者都做到好魁梧「新派」得滯(雖然我都受),今次似番佢地八十年代造型,親切感豐富d,睇到Predator轉番熱視點唔係上集果種超精密高科技視點,已經殺左我了,雖然仍然覺得清楚過頭,當然係因為「科技進步」同就番觀眾,仲用以前得一大塊藍色幾撻紅黃白色種做法?俾人鬧死都似。而兩個種族身手加技巧都比以前高,體格亦強化左,好似異形冇咁易死中好多槍加斷埋手腳仲打得落去,酸血係歷來酸性最強,Predator都係襟捱過以前,而且新武器奇多加設計出色,加埋打得好睇。最重要係今次終於按番動作片成功之道去拍。一套好睇之動作片,成功關鍵係乜?
「一將功成萬骨枯。」
正如打機,都係打低無數雜卒再打大佬先有發展同高潮,同主角一定要係勁人,一出手已經殺晒全場,有冇睇《再生俠》?特技係勁,但就係衰講到主角好生手,招都未出得準,已經俾人趙左唔知幾多下,立即唔好睇,因為大家心目中英雄唔係負責被捱打,而係以一敵百。上集Predator如蛋散,掃晒興,你又點會覺得佢地真係勁、覺得好睇丫。今次Predator係歷來最資深一個,好多情況換著上集幾隻一早被收皮,例如異形飛撲埋身,佢唔係俾異形一野撞落地之後死,好多時係先讀到一野撻開佢再補激光炮搞掂,雖然某程度上將異形白痴左先做到佢咁勁,好似片中最名場面坑渠入面兩隻異形飛撲佢落水,之後佢一手捉住一隻起番身,型到爆,雖然照計異形手腳有利爪仲有條長尾,捉住條頸佢仲有大把方法攻擊到甩到身,但好睇加型你吹咩?但Predator自己呢度都白痴左少少,起初我諗住係一手一隻之後兩炮齊發炸死晒兩隻噉就型爆,點知係你望我我望你一輪,Prealien出現伏佢一野打走,型場面變成反高潮收場。我反而鍾意佢入到人類集結之倉庫度,捉左男主角做餌引異形出黎殺,條橋絕呀大家就係想睇佢點樣利用人類同環境製作策略,但呢方面發揮唔夠較失望,希望將來(仲有的話)導演會玩多d。另外主角級數唔同就係唔同,人類掂一掂異形血立即爛面斷手,但Predator就算面貼面咁近,再一野打到隻異形爆晒d血飛到周圍都係,佢都可以完全冇事,唔多合理。上集都話有一隻見利刃會製造傷口反而有利異形而改用撞擊系物理攻擊,今次直頭令佢免疫酸血,就未免神化左少少。至於Prealien初次登場電影,外型為兩種族合體,最正係佢都「遺傳」左Predator開戰前之大叫pose。雖然我鍾意打機個設計,類Predator啡色健碩人身加帶招牌四分顎之縮短異形頭近Predator即宿主外型,偏番異形之電影版都唔差,只係幫佢加左可以直接將異形蛋殖入人體,夾硬講通冇皇后都可以生出咁多異形,就好似太過刻意。當然係為顧及第二集得幾隻幼蟲但需製作「萬骨」之前提而(夾硬)作,情有可原。至於兩獸對決,雖然又係一對一美國片傳統,已經好過上集打皇后架喇,打皇后其實唔係打佢,係睇皇后追殺人類女主角,冇乜「打」之成份,屬巨大失望之後驚你唔夠再黎多野反高潮等你灰上加灰。今次動作出色,但可以話你聽,你預告片睇到Predator同Prealien點打法,基本上係睇晒戲入面佢地成場對打,因為打到最後、Predator腕刃穿Prealien頭再被佢尾刺破腹,大家僵持不下之時,導演想到之解決方法,係正好此時核彈爆發,你兩隻野唔使打啦,一鑊熟啦。簡直...

上集已經夠衰,初時我真係冇諗過再拍新一集能夠比第一集更衰,但原來這個世界是沒有不可能,初時賣點係Predator原作者有份寫,但睇套戲都唔知佢地有份做乜。如果你單係異形或者Predator fans,都唔足以有充份理由去睇呢套戲,真真正正只限AVP fans先好入場。香港叫《異獸戰2》,但美國版叫《Aliens vs. Predator: Requiem》。個名,改得太好。

套戲賣點除左Predator一手一異形同雙炮爆頭,仲有結尾。上集死左之總裁Bishop,姓氏係Weyland,產業名Weyland Industries。 今集最後出場角色係Miss Yutani。而異形系列最大幕後黑手(即策劃捕捉異形研究兵器之大財團),係Weyland-Yutani。已見第三集會同異形電影接軌同終於進入太空時代。我仍然會有所期待。鬼叫我係fans。