The Mummy: Tomb of the Dragon Emperor

The Mummy:
Tomb of the Dragon Emperor

《盜墓迷城》呢個系列我覺得好有趣。第一集預告片覺得頗為行貨，場面又唔算突出，不過上左畫發覺精彩過預告片好多，因為有豐富笑料，全套戲步伐快又夠順。第二集難得在仲好睇過第一集，唔係好多電影系列做得到，除左個結局非常戇居：作為一個大魔王，你會唔會自己屋企某幅牆上面寫低自己弱點係乜、殺死自己方法係點，等人地去到你地頭可以知道晒點樣做低你？之後外傳《魔蠍王》就算數啦，只為睇The Rock同Kelly Hu，非睇套戲。隔左幾年，又有新一集。

「木乃伊都死左啦！仲有？」

有錢搵、要搵錢，冇都死到有，總之半死不生就可以玩一餐。頭兩集雖則好睇興趣唔算太大，都係有時間又撞到先睇，今集相反一開始已經決定入場：喂秦始皇喎兵馬俑喎，仲有李連杰喎楊紫瓊喎黃秋生喎Isabella喎，預告片未出已經覺得過癮到爆啦！加上應景地上畫前遇著《赤壁》，睇完香港人拍中土戰事，又睇睇外國人點拍，笑笑都好。

《赤壁》一役見識到豪華戲院的豪華，雖場地唔算高級，價錢實在無法抗拒，尤其《Mummy 3》咁猛片禮拜日朝早十點八場門票可以只售$20，為對抗賣到十九蚊隻的VCD市場搞到噉，而家經營戲院絕對灰到喊。但為左支持indie（因為廿蚊張飛咋卦．．．），令我有動力禮拜日一早起身出黎大角咀睇早場。豪華只有兩間院，今朝除左《Mummy 3》，仲有十五蚊廉價早場，即係old-school戲院最興的「一張票睇到笑」。我開場前三個字到，唔係好大的大堂囤積左三四十人，出乎意料地多，有點擔心買唔切飛。賣飛呢其實就好快，因為一係廉價早場一係第二套，行埋櫃檯話俾阿姐聽你睇邊間院，佢收完錢立即遞張飛過你唔使揀，因為咁多人根本亂到你入到去唔使旨意順利搵得到自己個位，先到先得自己搞掂啦。我擔心係我前面個阿叔。佢比我地平民百姓高層次，黎睇十五蚊廉價早場的「藝術電影」，為此同賣飛阿姐嘈左成個字都有。

「我咪俾左你囉！」
「你邊度有俾我呀？」
「頭先我收完你錢，咪俾左張飛你囉！」
「你講咩呀？我俾足錢你地買飛睇戲架！」
「你黎睇《靚妹夜夜性開放》丫嘛？我冇俾錯飛你喎！」
「我頭先俾左廿蚊你，叫你找番五蚊俾我呀＆＃＆Ｘ＊！」

好嘈唔嘈係輪到我買飛先黎嘈，搞到我差少少唔夠時間準時入場。廿蚊歡樂早場就係歡樂ｄ（定十五蚊會更歡樂？），上次《赤壁》咁大套戲睇夜場都係得四五十人，今朝早我入到去已經坐左半間院，開場後三個字仲斷斷續續有觀眾入場，所以你話仲點劃位丫入到黎見到邊個位冇人坐自己又鍾意就霸鬼左佢先啦。講番套戲先。故事講二千年前中國皇帝阿Dragon Emperor稱霸中原，為求長生不老搵左女巫楊紫瓊，點知中咒全軍變成兵馬俑。

「好cliche喎！龍乜鬼帝呀？一睇就知秦始皇啦小你！係咪外國人覺得做得中國皇帝，唔加番個Dragon唔似樣？」

二千年後二戰都打埋，主角一班人唔覺意用不死泉水整醒左~~李連杰秦始皇~~龍帝，然後打一大餐順便拯救中原。男女主角上兩集木乃伊蠍子王都殺晒後歸園田居，但退左休仲邊有戲做呀，梗係出山再打過啦。早排《X-Files》又係講男女主角久休復出喎！不過同《X-Files》唔同，這裏真的是金童玉女了，仔都生埋仲青春常駐－女主角除外，換左人，立即殘晒。發展落去，主角陷家三口齊集中國，加埋楊紫瓊同Isabella對抗龍帝李連杰同軍閥黃秋生的古今聯軍，重頭戲係長城下不死人兵團大戰龍帝兵馬俑大軍。

故事就係咁簡單，睇《Mummy》系列從來係唔使多用腦，只需要睇大場面打打打死死死同間中因其（美式）幽默笑幾笑就夠了。不過比較三集，今集大綱細節最有創意，但製作質素卻是全系列目前為止最低。故事好多元素可以玩到高潮疊起，點知出到黎又慢又悶，導演相當失敗，就連動作場面攝影、鏡頭通通欠缺動感，浪費左太多動作設計，因為今作人馬加班底，絕對可以得到更大發揮。就如焦點之李連杰對楊紫瓊，人地《功夫之王》李連杰遇上成龍都有一場打到天翻地覆啦，今次兩個一樣係全世界最好打武打巨星之列，唔拍到《臥虎藏龍》，起碼都唔好大家互揮幾劍一分鐘唔夠就分勝負咁反高潮啦大佬。只有嘆句鬼叫佢地唔係外國人，所以主角一家人相比下除左開槍接近冇料到，都可以兩三個人頂住大半隊兵馬俑，而楊紫瓊二千年功力、武術法術皆通，舞幾舞就俾李連杰做低了。真灰。其他特技都係行貨野，最後兵馬佣對不死兵團構思好，不過都講左，拍出黎完全唔夠震撼。只覺大好題材通通被糟蹋。最慘係導演唔得、攝影唔掂之餘，連系列出晒名之搞笑亦大幅失色。睇頭兩集其中一樣鍾意係睇得開心，即使內容及詮釋陳腔濫調。但今次睇冇野好睇之餘，連笑都冇得笑。睇黎仲有多少意思？

想笑，都唔係冇，不過係用另一種笑法。就係用腦睇。睇真ｄ－都唔使專登睇真，根本太明顯－導演思維真係戇居到你唔信，好多野仲衰過港產片。主角同上兩集比完全冇老到，但佢個仔睇落已經可以有佢咁大。莫非第三集之前，佢已經一早去左飲不死泉水，所以長生不老？而兩位重要女角所謂已有二千歲，但一對住外國人就識得講英文，同有外國人在場時兩個傾私人偈都要用英文而唔係國語，驚其他人唔知佢地講乜？片頭中二千年前楊紫瓊望住份甲骨文讀梵文咒語向龍帝落咒，但到最後一戰施法喚醒長城下不死兵團，對住同一份甲骨文，咒語變成英文。與時並進？而最抵死係用英文唸咒，班死屍又真係會聽佢話起番身。會唔會佢地其實唔識聽ｄ咒語，不過班骷髏兵都頂佢唔順笑到醒番、起身問佢到底講乜春？

「原來套戲係推廣持續進修，就算已經二千歲，都要與時並進學好英語，先可以同外國人溝通得到，一起保護地球架！」

另龍帝係中土帝皇、最後一戰決戰場地係萬里長城以外。全場仗打到咁勁，除左黃秋生一夥之外，全場居然冇任何一個中國人出現，中國政府全程冇干涉過？莫非佢地都知道主角一家人同識nicam即場梵文翻譯成英文的女巫神通廣大？至於龍帝講到識得五行之術、可以變身三頭龍同巨獸，精通十八般武藝，既然勁到咁離譜，最後主角同佢打，點解一招法術都唔用，仲要企定定俾主角一拳一腳慢慢虐待死佢？仲有樣野好抵死，幾十年黎同類電影、文學、RPG通病：魔王永遠係天下無敵，世上只得一件寶物i.e.寶劍可以殺死佢，大多數魔王會選擇收埋件寶物，從而冇人用到黎殺佢（唔知點解，永遠冇魔王會選擇毀滅件寶物）。亦因如此，往往會出現三個情況：

收埋自己地頭，最後主角殺到入去摷番出黎殺死佢
自己拎住或收埋，但對決時唔知點解會自動掟番俾主角，等主角用黎殺佢
明知係唯一一樣可以殺死佢之武器都要帶住跟身，結果對決時俾對手有機可乘（通常係主角就黎俾魔王打死，跟住魔王要行到埋身再一番廢話都唔落手殺死主角時），主角衝埋魔王身偷出黎殺死佢

這是其中三個最大的cliche，抵死在《Mummy》系列三樣玩晒。第二集講左啦就係第一樣，剩番兩條橋今集一次過，所以睇到好灰，堂堂精通五行移影換形龍帝，超戇居就死左。楊紫瓊死之前都叫做打得好過佢、死得光彩ｄ。黃秋生一夥人，話俾你知中國人係貪婪奸險的。至於Isabella，唔好意思，叫做打龍帝，她的更大價值在於俾人溝（or為左溝鬼仔？），用黎話俾全世界聽華人都是媚外的。身為中華子民，睇到好想喊／好想笑，而家咩年代了？點解拍到出黎，戲中中國人同十幾年前美國戲一樣，負責用黎死同用黎笑同埋唔係賤就係蠢諸如此般負面民族典型，就如《轟天炮4》？原則上整個《Mummy》系列唔需要用腦睇，第三集甚至唔應該用腦睇，但最後發現，今集反應反其道一面睇一面仔細思考。可想而知幾咁大鑊。

雖然大失所望，又唔係一無是處，最少覺得配樂出色，相當具東方色彩，有趣地同期《赤壁》擺到明中華製作但配樂出奇西化，反而全外資《Mummy 3》更能帶出地方風味。同要一讚李連杰。佢從來俾人話最多就係識打唔識演，不過睇得出一直進步，又演得最成功都係反派角色，《轟天炮4》、《最後一強》、《投名狀》、《Mummy 3》，越邪越演得好，其中《投名狀》似乎已成代表作。但論開心，應該今次佢會係最開心，因為出鏡少對白少，全套戲做最少係佢，錢又係收咁多，幾正！

至於仲會唔會有下一集？有錢賺，點會唔賺？問題係連兵馬佣都玩埋，下次可以玩咩呢？玩瑪雅玩亞特蘭提斯？定crossover埋《X-Files》連外星人都出埋？（呢條橋好似《奪寶奇兵》第四集玩左喇喎！）大家唔使估喇，今集最後已經有伏線，講到明下集去秘魯。只係經過今集．．．唉。拍出黎先算。

噉就笑／喊／捱完一百分鐘。基於《赤壁》坐場中間連對白都唔多聽得清楚的教訓，今次黎豪華睇戲專登揀坐前三分一，雖然仍唔多滿意音響效果，都總算好過上次，聽得清楚每人講乜野先。完場一睇，前面幾排坐左唔少人，暮然回首，後三分二幾乎全爆，都可謂本地舊戲院難得之光景了－當然一張飛廿蚊係原因啦，全靠豪華戲院，令大角咀居民星期日節目由陷家一齊飲早茶，變成陷家一齊睇電影，亦全靠大家支持，豪華先夠維到皮。只係都相當困難。你諗下：今場我估黎左六七百人，一張飛二十蚊，700x$20 = $14,000；其他戲院如新世紀一間院細得多，但六十五蚊張飛，入到近滿的話，一場300x$65 = $19,500，反而賺得仲多。但豪華除每星期日朝早一場，其他時間可能真係每場得幾十人，而一張飛都只係四十蚊，但旺區新戲院統一六十五蚊，就算觀眾人數少極，一場都賺得多過佢。同埋豪華永遠唔會播頂級猛片，如《蝙蝠俠》你黎豪華唔會睇得到，單憑《精舞門Kung Fu Hip Hop》呢類「cult片」，點同其他做後生仔生意戲院競爭？豪華而家可能真係靠逢星期日朝早噉樣執一劑吊鹽水。所以我會繼續支持。廿蚊睇場戲，當食早餐都抵啦。

「襯豪華未執笠，係咪應該搵次搞番個十五蚊藝術電影『一張票睇到笑』版罪？」