LXG



突然開始追番明珠930,因為近來連播好多正片/爛片,一星期前播撞親必睇的《Eraser》,今個星期六係罕見之《LXG》,即睇。全寫League of Extraordinary Gentlemen,原著漫畫產於英國,集維多利亞時代幻想文學大成,所有空想人物存在於同一個十九世紀末時空,共同聯手瓦解極權甚至外星陰謀,係人設同世界觀皆極具特色之all-star crossover。漫畫出過兩輯,第一輯占士邦同情報局神秘主腦M搵左《海底兩萬里》無名船長、《所羅門王寶藏》獵奇家、隱形人、鬼醫Dr. Jekyll/Mr. Hyde同德古拉夫人對付來自中國陰謀家傅滿州。
「...乜水呀佢地?」
「全部係經典十九世紀文學人物。無名船長對抗英國殖民統治開發出高科技潛水艇,其後投入深海冒險以海洋為居;《所羅門王寶藏》主角身為英國專業獵人同冒險家,以非洲獵奇探險同尋得古皇陵寶藏知名;隱形人研究出隱形藥但藥效未能還原,失常成為壞人;Dr. Jekyll發明一種藥劑,飲左會釋放人性邪惡一面,以變身藥徘徊於好人Dr. Jekyll同壞人Mr. Hyde兩者間;德古拉夫人唔使講啦,傅滿州則係英國文學家參考當時中國人,設計出世代相傳之奸險而具野心華裔奸角典型。」

第二輯crossover埋《War of the Worlds》大戰火星人保衛英聯邦同人類,創新之餘充滿維多利亞黑暗色彩(唔算歌德卦),構思同文筆於美國為主之現代漫畫中屬異數。亦因為咁古典歐洲,故事發展集中英國本土,從中除左睇故事,仲可以學到好多(睇落)典雅上流的英語。
「成日話睇西洋漫畫學英文好野黎啦。」

荷里活動作電影由九幾末起,已經被《Matrix》三部曲一連五六年稱霸晒,吊威也已經係最大「特技」的傳統動作片頓失睇頭,玩科幻又唔會夠動作劇情兼備《Matrix》鬥,可能睇中當中潛力,加上CG技術已經成熟同漫畫改編成風,霍士揀左《LXG》,玩古歐洲科幻,可以合理地玩特技之餘又唔怕同摩登科幻片比較,加上十九世紀歐洲乜都有幾靚得幾靚之靚人靚景,古今結合題材又從來受(我)歡迎,同埋有我極有好感老演員辛康納利主演,當年立即入戲院睇。因為時值後《Matrix》震撼太大,冇抱住非常高期望入場,結果睇得開心,講好唔算特別好,係題材特別同華麗設計搭救,睇過總算滿意。

故事同漫畫版相似,神秘人於各國間挑起事端,歐洲大戰一觸即發,M召來各方能者組成異人同盟對抗神秘人威脅,同漫畫唔同在除左本來五人,仲加入不老不死奇人同美國特工,前者為令劇情有更多變化(不外乎「原來你係二五仔」之類),後者存在因為商業電影需要最少一個靚仔(你唔會覺得隱形人或者變形俠醫款的Dr. Jekyll引到人/女入場丫嘛),同美國人拍嘛套戲,一個美國人都冇點得?故事發展落去,原來神秘人即M,搵黎異人盟只為盜取每人能力,戰爭中出售各個國家圖利。少不免大量機會讓各位異人大展異能。除左「集能人救世界」創作概念同漫畫一致,劇本絕對原創,唔算創新或特別驚喜不足,不過順得黎有意外轉折(編劇將所謂之LXG改為「有盟即是無盟」完全偏離原著但一絕也),步伐快夠多好戲連場一路唔悶,文戲打戲比例平均已經唔係好多荷里活打戲做到,但講野少加去得快,自然亦冇乜交代過角色。冇乜大影響,因為睇動作片有幾多個會非常留心劇情同人物歷史?呢類戲有時更忌太多口水,加上全部人(理論上)係知名人物,唔需要多解你都大概知道背景出處,已具先天優勢。論劇本同類戲屬中上,但遺憾在係美國出品,冇晒漫畫份冰冷暗調(唔係歌德卦),歐洲景夾荷里活氣氛變得好怪,去勢平劇力唔夠。係歐洲電影公司拍咪好囉。角色又同原著差得好遠,隱形人幾時都係奸角,戲入面變左善良英雄反而睇唔慣;德古拉夫人漫畫入面參考史實,吸血鬼詛咒已經解除,電影中仍保持吸血僵屍身份;Dr. Jekyll變Mr. Hyde永遠係變大,《梵海辛》又係噉,但其實原著文學中係變。但改還改,性格唔同唔緊要反正唔係重點當冇睇過漫畫版亦得,有關物理修改自然為視覺效果,女主角唔係僵屍只係個普通人有乜好玩?鬼醫變細更冇癮啦變到成隻怪物噉先打得勁同有得做特技嘛。只係論整體改編,真係同原版偏離得好遠,「改得好」一回事。

講到影像,特別欣賞拍攝手法,武指攝影質素奇高,或者《Matrix》同《臥虎藏龍》教壞左美國人,知道香港人做武術指導、港產片式打鬥先係動作片中皇道(講起都有點兒驕傲),兩套戲後美國動作片水準即時直線上升,角色練過操過先入鏡,鏡頭效果再畫龍點晴,好睇加上動作場面多,劇情薄弱又如何都係嗟。特技其實冇乜,最大只係無名船長架巨型潛水艇、鬼醫人變怪、僵屍變蝙蝠群、刀槍不入瞬間癒傷,同用CG砌景。見得最多相信係隱形人,雖然《LXG》幾年前已經有一套隱形人電影(麻麻地),構思同效果絕對係《LXG》贏晒。全套戲加埋都係一句「中上」包晒,但我鍾意,得閒撞到咪睇,唔係差。所以相信又要撞多次《梵海辛》,睇左五次以上仍然未厭之另一套維多利亞時代正戲。

不過套戲其中一個目的,可能係順道向新一代推廣十九世紀奇幻文學,全部人物所屬原著已被視為經典。正如聽完power metal會搵heavy metal、聽完gothic metal會搵真gothic、classical同darkwave、聽完MESHUGGAH同CYNIC會搵jazz,睇完《LXG》,值得為各精彩角色翻翻古著,因為以前小說除左純官能刺激,仲好具批判性同哲理思想,任何一本都絕對有深度過套戲。值得。

「我估有人會嗟。希望我唔係唯一一個啦。」