呀．．．出錯相添，不過將錯就錯啦。開畫後第一個星期二晚去豪華睇《起勢搖滾》之前，先去由旺角洗衣街搬到黎大角咀塘尾道的美而廉新舖鋸個扒先，正正開豪華斜對面，反正都要等開場咪黎幫襯下。只好多年前去過一次，唔美唔廉服務唔掂試一次就夠，年頭執笠時想去食多次但永世排長龍，好在冇排埋一份，吹到「最後今天」笠一轉水，轉過頭就我公司樓下開番，就腳左加禮貌好左不知幾好服務又唔使排隊野食又唔差，立即一面食一面恥笑之前搏晒命去舊舖排隊「餞別歷史」的朋友。但唔會成日食，隨便一個飯／意粉都六七十鋸個扒又八十起，豪唔起呀。
選擇去豪華睇《起勢搖滾》，除左夠平（星期二三十蚊咋！），港產片都係黎豪華呢種殘舊戲院睇先夠feel。同好老實，對套戲台前幕後冇乜大期望，所以「唔敢搏」，去豪華睇蝕左都起碼可以當為支持舊戲院入場，好在最後感想係「又衰唔晒」。
而家好少入戲院睇戲港產片自不然更少，《起勢搖滾》係非常難得之一，原因就同半年前《天與地》一樣，你幾耐未見過有香港劇香港戲講夾band？對幕後一班冇認識，不過少睇戲都睇得出導演係新人，因為劇本同敘事法相當多問題。主線不離一貫，讀書時夾band夾出個天地，畢業打工後各散東西又終日勞碌，有日街頭偶遇決定再組樂隊，少不免生活、人事、感情等出現種種問題，大家一面追夢、一面追女，即係同Ｎ年前Beyond《莫欺少年窮》之類乜冇大不同，分別係主角由Beyond四子變成Mr.五子，同囡囡正得多。
但睇落硬係覺得有點唔對路，整體差噉份戲味，成個劇本好散。樂隊原來個鼓手絕對係表表者，出場唔多、完全冇演技，去到中段仲無端端死左，都冇所謂，但佢個角色出黎甚至死黎唔知做乜，為成全佢只寫好一半首歌？首歌之後又冇作為。令隊band團結？又營造唔到。到頭來只為安排段戲俾Mr.個鼓佬名正言順入隊。多數人都有交代出身背景，甚至太過為交代而交代花左好多時間，但兩個結他手冇乜點提，Ronny個角色係點唔知總之有錢仔黎，同天才地玩結他機出神入化到第一次拎起電結他立即識彈（會唔會誇左少少），MJ仲灰搞到成個MK仲要講到好似同死左個鼓佬搞基噉款。林欣彤唱得好少，都係為安插個女主角整條感情線嗟，好可惜又拍唔出男女主角之間份情。Jeana存在更加只為方便想睇佢除衫，但唔會入場睇《喜愛夜蒲》的朋友，即係我。真正有意義女角只得詩雅，另外兩個棄之不可惜（噉又唔得，冇得睇Jeana除衫，點抵番張戲飛呀）。結果無論感情線還是奮鬥故事，通通唔興奮唔感動非常平淡，前紋後理又唔夠關連，全個故事同諸多角色，就同豪華門口張old-school製作爆格到人樣都睇唔到的海報一樣模糊。
呢邊唔夠戲味，另一頭相反，戲劇性過頭。首先，睇咁咁多年band show、見過台上表現更差的樂隊，都未遇過劇中樂隊俾人柴台柴到cut show再落台打交之場面，我諗只有高山劇場時代或者唱酒吧先會發生，老實講其實幾想見識。最搞笑係跟住報警搞掂。香港band show其中一樣出名，就係幾乎每逢有show，地政消防警察總會搵到理由上黎踩場搞搞震，務求做到你開唔到show或者唔想開show為止，如果現實中場內真係有人打交，肯定冇任何搞手、樂隊或者觀眾選擇報警，一來地下的事地下解決，二來你叫得一次差佬黎，咪即係主動送多個理由俾政府以後每場show都拉隊上黎「懷疑糾眾毆鬥」唔准你開？最諷刺場戲上高梁大廈第二代Hidden Agenda拍，而《起勢搖滾》上畫半年前HA由高梁搬到而家永富正因政府打壓，重開之後仍經常俾警犬同消防逗。再而引伸到劇初個開放露天表演場地，地方闊落之餘任何樂隊可以隨時入去表演，跟住街頭擺晒架生唱到幾十人圍觀，當香港一直鬧緊場地荒、一直爭取露天場所不果，此情此景簡直人間天堂。而家上天台開band show都可以有全隊防暴隊現身掃場、旺角同銅鑼灣行人專用區唱歌可以俾差人用「街頭表演等同行乞，行乞等同非法阻街」為由趕走，如果真係噉樣搵塊空地或出街夾band，差人未出手，都俾環保署告到你死啦。
有樣野好有趣，Mr.同Hardpack打完交，第二次見面就和好如初，因為「夾band冇隔夜仇」，但我聽過好多band界故事正好相反，冇錯唔會有隔夜仇，但那一夜總是不會再見天日的漫漫長夜，你睇Beyond三子而家關係就知。打完交要賠幾萬蚊俾個場，成隊band夾錢講到點辛酸點窮．．．之後可以夾到買名牌手錶手袋。然後上Hidden Agenda會撞到冇可能會果度出現的詩雅（「有女睇就得啦」）。再唔少得有幾幕五個人要拍MV噉款好造作地紅館外面同上天台度晒位擺晒pose企定定。而最最最戲劇性當然係，擺明毒撚的bass佬，居然媾到Jeana。所以最後Jeana選擇要錢唔要佢再指出大半band仔唔係窮就係冇出色的事實，我完全冇同情過佢。我認我賤格。反而好好奇，Mr.五個人入面得主角有得同林欣彤攬幾攬（我相信佢唔多志在）再同詩雅咀半野（就灰左少少），bass佬揩都未揩過Jeana福份連個茄哩啡都不如，會唔會搞到好唔妥導演？
劇本積弱亦帶不出多方面感情，但非一無是處。講到搵左好多樂隊客串、拍落唔少indie band表演片段，到頭來除左Supper Moment、Kolor同Mr.，其他出左都唔多覺，包括Kolor製作之原創配樂，但聽歌都唔差的，連太極都出黎唱左兩咀，反而林欣彤唱得少少，佢唔嗌正正經經唱就唔會有問題，從來對佢冇乜興趣，居然會希望戲入面可以表現更多。又有大量明星級路人甲，多到好似睇緊賀歲片，鍾意邊睇戲邊搵串星肯定樂趣無窮，而主要角色中比較男同女，就可見歌手同演員之別，《囡囡》的囡囡演得出色，不過感覺好低成本幾個人來來去去一兩套衫，好似詩雅出咁多幕都著同一套白色，係咪全部戲份一日拍晒？最好笑梗係林敏聰、潘源良、譚詠麟三個人做唱片公司新人評審，有林敏聰就肯定夠好笑，而最過癮導演將套戲拍成偽傳記，全部人用現實真名上場，部份情節如bass佬舖路令Mr.經譚詠麟簽約環球更是史實，所以成套戲一直徘徊於好唔現實同好超現實之間，反而Mr.成名因由非常之真：捧唔捧你出唔出到名，好多時在於老細商業計算出黎結果，而唔係你有幾多料有冇實力，睇最後接軌現實引用Mr.真正紅館演唱會片段，根本全為歌頌譚詠麟，就知道邊個係老細啦。所以你同我講，戲入面陳僖儀全賴白短褲look簽到唱片公司係真人真事，我都會信。（平心而論，近年女新人中佢唱功好過好多人，但而家歌路佢發揮唔盡）
因為題材相近加難尋比對對象，睇《起勢搖滾》好難唔諗到《天與地》，兩者故事唔同但有不少雷同橋段，如主角為熱愛之音樂奮鬥、掙扎後領悟並放下過去、完成過身成員遺作、最後至親到演唱會見證，可以話同類電影中此類情節幾乎必定出現，但兩者一比高下立見，好似《起勢搖滾》作為青春勵志片，卻完全未能拍出搖滾種拚搏同勵志精神，加上劇本多角色多枝節，但好多時無關重要或可有可無之缺憾，好難稱得上佳作。但作為香港獨立音樂界一份子，同難得有港產片肯講 咁「偏門」題材，我仍然會叫大家支持，講夾band唱rock靠indie樂隊谷Mr.已經好難賣座，睇今場景況，上畫一星期唔夠仲要禮拜二七點場理應最旺，開場前半個鐘買飛都買到全場第二張飛，最後只得十五個人左右入場（以豪華規模計，每人平均包左七十個位左右，即等同於新戲院一間細院），我相信其他旺區影院情況都唔會好得去邊。當《天與地》已成香港電視劇最後的樂與怒，只有寄望《起勢搖滾》唔好成為香港樂隊電影最後一章。