想睇《Knowing》，全因睇完預告片都唔多明係乜戲：撞機撞火車世界大火一定係正路災難片啦，加地球毀滅密碼玩劇情，連外星人都出埋。災難片拍來拍去難有大突破，入場除為特技場面仲想睇點收科，既前提世界滅亡，過程中導演想講乜野、末日結局諗唔諗到新野出黎？難怪災難片三幅被卻永遠成行成市。
導演前作有《I, Robot》，上畫時特技及故事算新奇（應該有五年前了，我記得當年我讀緊final year即2004左右），但可能同類探討智能叛變電影已經「out左」同拍過太多，而家睇番有點cliche。《Knowing》玩地球大災難更cliche，最少有得大條道理整特技嘛，已經是票房保證。老實講，入場之前我完全被誤導：基本上睇過預告片都諗到大概，唔係主角阻止外星人毀滅地球，就係外星人想救地球但被人誤解，而佈局點睇都似前者，諗住會係套高成本動作片 － 係架呢個係我其中一個入場原因黎架！點知原來係套宗教片。冇錯你冇睇錯，《Knowing》其實係宗教片。劇情好簡單，五十年前一個靚妹收到訊息，寫下連串數字記低跟住幾十年間部份意外日子、死亡人數同座標，五十年後密碼出土落入主角個仔手上，咁蹺主角係個天文物理學家，解讀密碼得知真相（過程比你想像中容易／求祈得多），搵埋當年女預言家個女同孫女，一齊嘗試阻止世界末日，過程中又出現班神秘人跟住佢地（預左會係外星人）。因為主角做天文物理學家，一開始係噉講太陽同地球關係，已經知道世界末日關乜事，再跟住講佢同教徒家人關係惡劣，又預左最後實同宗教或超自然有關，導演舖排手法確實差左少少。
編劇同樣有點失望，兩個字夠講晒成套戲：夾硬。由始至終，太多情節可以如此形容，你可以數數黎緊我會重覆呢個字幾多次。
夾硬1. 本來主角第一次見張預言紙冇興趣理，突然無端端就睇到密碼所在一望即明，仲要一晚立即明晒破解晒？做得天文學家大學教授，都難免太玩晒卦？
夾硬2. 跟住又會咁蹺去到第一個災難墜機現場，一睇到座標立即估到又係密碼一部份，真巧合。
夾硬3. 五十年前靚妹同主角個仔都收到外星人發放之神秘訊息，進而寫下預言密碼及救走「有緣」人類。噉樣唔夾硬。不過既外星人是好意拯救地球人，點解要做到佢地形象咁邪惡咁鬼祟，似賊多過似救世主？（唔係噉，又點做到套戲緊張刺激呀？）
夾硬4. 既外星人本身只對主角個仔同預言家個孫女有興趣，根本冇必要俾其他人知道佢地存在，又要成日刻意行慢幾步俾主角睇到發現，有次仲要明明走得甩都唔走，特登企定定等主角趕黎搵佢，然後整個閃光燈嚇窒主角先施施然走人，純粹俾大家知道佢地唔係人（一早知啦）同見識大能，好鬼搵戲黎做式無謂。
夾硬5. 密碼字最後寫住33，跟住話「其實佢好鍾意調轉寫字」，33應該係EE，加埋最後找到EE解釋之地點，全套戲最牽強莫過於此。
夾硬6. 預言家個女簡簡單單就死左，似臨近結局順手清清多餘角色，多此一舉。
夾硬7. 最後世界末日地點座標，五十年前刻於學校某度門上，隔左五十年度門居然冇換過冇爛到等主角黎拎。冇野講囉。
亦帶來疑問：點解每次搵到之密碼肯定完整？即點解一定會準確搵到從邊個數字開始，同所有需要資料必定有齊，唔會種種原因如被打斷、寫寫下枝筆冇墨、唔夠位、要去廁所（．．．），而寫漏一兩個數目字或重要密碼寫左落第二度之類？密碼準則同樣模糊：所寫意外集中美國境內發生，但大多規模唔大可能只死幾十人左右，按此規模全國每日一定唔止一單「大野」，內容有幾驚世呢？
結局果真典型衛斯理地神是外星人。外星人早預見世界末日，用精神散播警世密碼，末日前夕降臨地球接走被選中者到新世界做亞當夏娃，主題是「信者得救」。最大弊筆又係果樣：將外星人塑造到似勾魂使者或魔鬼多過天使或神。老實講，我見到你班「天使」／「神」咁邪惡，我都唔選擇跟你地走啦，而所謂被選中，係接收到外星人精神訊號即雜音一大堆，睇見你地尊容加成日藏頭露尾，仲要「福音」同你開電視轉雪花台聽到差唔多，喂，大佬，真係好難相信你地係正派係黎打救我地喎？反正個人樣由外星人隨心自己變出黎，執一執整到和善少少（當然，囡囡樣更perfect），同明白沉默是金道理，使乜用五十年咁耐搵選中者、去等地球人信你？反而有樣野特別：雖然主角一家有宗教背景，阿爸甚至做埋牧師，但世界末日時，真正獲救一群只得外星人／天使／神話合資格一班，換言之全心追隨信仰、真心侍神者全部未能幸免。始終世界上宗教勢力過大，可能驚得罪人，最後部份都幾輕描淡寫，其實某程度上已設前提為世上無神及外星人即神，否則單虔誠信徒未能得救，反而某個講野訊息的靚仔可以，一個主題已經大把發揮，點會似而家講都唔多講，就連外星人點解要拯救人類於末日浩劫之中都冇解釋過。外星人真面目有點模仿天使，真係解釋，例如其實外星人創造人類，肯定俾人小到仆街，難免到最後乜都過一過鏡點到即止就算。
「明光社，點解《Knowing》上左畫咁耐，你地仲未做野？」
雖然，仍然強烈覺得《Knowing》其實係套科幻包裝的宗教電影，提醒大家末日之前信者得救，不過唔理套戲講乜純粹睇場面都唔差架，貴精不貴多場場精彩，而且各有自己風格。第一場撞機雖然CG部份假左少少，跟住主角衝入實景救人，一個長鏡跟住睇人著晒火、係噉死救極救唔到，全程一個鏡頭過，勁寫實又勁灰。跟住火車出軌好多戲拍過，設計同攝影算最行貨一段，不過睇住架火車衝上月台係噉撞死人同捲人入車底，加多個鏡頭車頭望出去睇點樣一個個人撞低，真係睇到你好high架。最後烈陽火燒地球，新意唔多不過整得好睇。難得在《Knowing》係我睇過第一套非外星人侵略地球大製作電影，係全人類一鑊熟真真正正陷家產，比較其他災難片，一係最危急關頭化解危機（《Armageddon》），一係就算地球中招仲有好多人類生還再重建世界（《Deep Impact》），冇邊套夠薑拍到明你睇全個人類文明甚至全個地球毀滅咁激，可以咁灰咁另類，因為製作公司Escape Artists本身indie所以冇咁多掣肘卦？不過最後又要加番段阿當夏娃降臨新世界，畫出晒腸就削弱晒，成個地球俾大陽煮熟晒立即完場，先保留得到世界末日震撼性，同貫徹全套戲份無奈無助感。另indie始終有其限制，如未必搵得到出色演員，全套《Knowing》我覺得最失敗在演技。預言家家族三代女角唔止樣似，就連感覺都接近，齋講樣非常大好感，不過做戲未夠，好在點差仲有個Nicholas Cage墊底，《Knowing》算我睇過佢做得最差一套，從頭到尾咩環境咩情況都係一個表情一種語氣，完全唔明白角色諗緊乜、想表達緊乜，睇落似唔夠時間準備，搞到佢唔知應該點演個角色，加上劇本觸及過多範疇兜太多圈，演技頂唔住，令到套戲睇落太多劇力。如果索性走番正軌，講到外星人意圖引發末日毀滅地球，有人預知到紀錄低，主角鬥外星人阻止危機拯救人類，咪仲好？印象中Nicholas Cage幾近拍親都係高成本大製作玩場面電影，好少可演著重人物本身同講內心角色，一拍就出事，對比《Face/Off》同《The Rock》，演技表情變化唔夠大的佢實非劇情片適合人選，或者繼續煲動作片算啦，起碼自己在行嘛 － 知唔知佢個藝名皆因美漫而起？
可能唔知應該抱乜心態入場，結果見套戲科幻、災難、懸疑、神鬼、宗教、動作、特技乜都有，攝影同氣質加點indie，水準未如理想最少有意外驚喜，用番之前提過兩套戲做比喻，本來覺得會入場睇《Armageddon》，點知原來係《Deep Impact》，可能更好，因為災難片中少有如《Deep Impact》咁具人情味同思考性，加上科幻懸疑包裝多番動作特技元素，整體我感到滿意。好多人將佢同《地球停轉日》比，因為大家題材都係世界末日、都涉及超自然／外星，《地球停轉日》我未睇，而家搞到好想追番。不過我諗最好睇果套，應該係cult片之霸Asylum出品《地球停轉之日》。
睇完戲，又睇睇新聞。在此要多謝狀元爺同大家分享2012年太陽風暴或會導致世界末日。新聞中講到兩樣野：2012年，同太陽對地球之影響。好多預言同年曆話2012年係人類文明最後一年，戲都拍埋《2012》，而家2012年12月21日已被視為世界末日，睇完則太陽風暴預測新聞再睇《Knowing》，世界末日個勢真係似層層。會唔會導演聽到外星人訊息，拍《Knowing》出黎警告大家末日將至？係時候受洗喇！