睇到預告片，主角可以傳送自己去任何地方瞬間看地球，就如中文譯名《越空行者》 － 少見譯得夾之餘唔老套加我受的譯名 － 就知道《Jumper》冇得走了，概念你可以話屬老生常談科幻題材，但未有電影運用過。同埋，
「令我諗番起李連杰套《最後一強》。」
《最後一強》唔知有幾多人記得，係李連杰初入荷里活「開始紅」之作，講奸角穿梭不同時空殺死其他自己吸收生命能量，最後全平行宇宙只餘兩個李連杰自己打自己，雖然空間跳躍唔係焦點所在李連杰先係。見《Jumper》睇落過癮就幫襯下啦，睇戲都係為娛樂為過癮嗟，睇教育電視咩？
「我很膚淺的。」
套戲算咩種類？動作片？未至於。科幻片？又唔夠。劇情片？亦唔係。我都唔知算乜，但個開頭處理得好過好多劇情片科幻片同特別動作片。套戲可以分成三部份，第一部份引入，初一兩個字已經講晒主角出身背景，本是傻仔的佢發現自己係閃客有瞬間轉移異能，立即入銀行夾萬偷錢發大達變左型人（型少少只係），三四個字清楚交代你需要知道的大概，直頭係我心中模範。可惜第二部份主角搵番青梅竹馬女主角，講點樣用錢撻人（well，這個世界是好現實的，冇樣唔緊要冇錢就大晒），就灰了。尤其是你發覺，導演根本說服唔到觀眾：
「．．．條女噉質素，唔值喎？？」
俾條女浪費左唔少時間同拖慢晒節奏之後，終於入到第三部份正題。另一閃客出現，並帶出自古已同閃客對抗之狂熱信仰組織「武士」（英文叫Paladin，點解中文要譯獵人而唔直譯武士，襯番組織宗教色彩背景？？我照叫武士忠於原意），武士視閃客為邪魔而要肅清，理所當然地「條女俾人捉左」，兩個閃客同武士開大片。假如你入場係好似我為左睇特技，頭九個字可能會唔開心，因為只有閃客係噉閃閃閃閃閃，但係見主角行步路都懶係唔係都閃連飛車都要閃住黎飛實在過癮，計落《Jumper》分分鐘係史上最多特技鏡頭電影，只係打鬥場面接近零，真係想睇埋牙要去到最後半個鐘，全部集中晒一次過黎好密集果隻。兩個閃客對打梗係重點所在，兩條友邊打邊跳走左幾個國家，製作費都幾貴要飛東京羅馬埃及極地Ｎ個地方拍佢地追逐，中間加插一段跳樓空中鬥閃，再高潮疊起地玩到傳送成架車掟人成層樓去左唔知邊，動作設計相當有新意亦前無古人，或者以前技術未能做到將瞬間移動概念結合打鬥，同唔敢投資咁大？可惜全部人冇功夫底，大家打黎打去都係爛仔交（曉閃的爛仔交），真正融合瞬間轉移動作招式只出過一次，就連所謂身經百戰的武士都打得好狼狽，全套戲只有Samuel Jackson飾演之首席武士最有板有眼。因為故事中主角本身係個傻仔未學過武術，只係一套天馬行空動作片（卦）班人唔識得打，會唔會戇居左少少浪費晒？特別最後主角條女俾武士捉左，擺到明一入局就會俾人捉，佢照光明正大入去唔用自己轉移能力同計謀救佢出黎，抵俾人捉啦，邊睇邊鬧到九彩，太白痴喇。同埋主角平時點閃都得一閃南極去北極都可以，但一俾武士追，明明走得甩唔走，係幾步幾步噉閃黎閃去，閃閃下就俾人捉到，既然咁勁話「可以閃你落海底浸死上高空跌死」，又或者一見武士立即閃去第二個國家咪得，根本完全冇必要怕佢地，班閃客有超能力都唔識好好運用，俾人捉到抵佢地死啦。假使將傳送概念結合《最後一強》，兩個超能人武功高強力拔山河再可以穿越時空的話，可以要幾癲有幾癲，只差夠唔夠錢拍。
故事到最後，埋尾相當求祈，係你會問
「下？完左喇？」
之後一堆問號，因為好多野冇講清楚。真係好多：
另一唔滿意係演員。全套戲你需要理的角色只有四個：正派兩個、（必要存在的）女主角加大奸角，又可以話其實從頭到尾就係得佢地四個，連茄哩啡有對白角色全套戲夾埋都唔夠十個，除左越老越好戲的Samuel Jackson冇個夠演技，最難頂係主角完全冇主角格，相貌造型太平庸完全冇星味冇主角格，海報個樣型過晒佢戲入面每分每秒死未。女主角更加係冇好過有，對劇情全無重要性，甚至令中間成段死晒都係因為佢，索性直頭唔要女主角，集中講兩個男閃客同武士間瓜葛糾紛仲好，起碼睇落會暢順得多，問題係商業上有需要嘛。最灰係女主角尊容係你覺得主角咁迷佢保佢係抵死先死嘛。係「女呢家野麻叉煩加害人不淺」上佳教材。卡士弱唔係問題，反正除左外國某幾個明星演員好多我都唔識，演技對我黎講比咩來歷咩樣重要得多（當然個樣唔好太衰先啦唔該）。如果有下一集（唔使如果啦，實有），除左Samuel Jackson全部人同我換晒佢都唔打緊，只係今集交代唔清晰、伏線太明顯，相信機會較微。
「慘。」
呢類科幻題材要拍成電影只有兩條路，一係好膚淺死打難打好似《最後一強》，一係玩思考玩深度，後者難度高出好多，因為要特技動作同寓意中取得平衡好睇導演功力，《Jumper》捨易取難失敗收場，功力盡現在頭三份一（主角發達後搭上女主角之前），如果可以全套戲保持住前段水準同步伐會可觀加緊湊得多。概念創新，但拍到出黎都幾失望，唯有寄望下一集。根據今集結局舖排，相信會係走甩左個閃客繼續殺武士，殺到去主角老母時主角出黎同佢打，此乃按今集埋尾格局最合理推算。但我更希望可以講番以前中世紀同不同時代中閃客武士戰爭係點（唔好要我追番漫畫小說同game先知啦我想睇戲咋），而其實心目中之《Jumper》，係成個Jumper種族同成個Paladin組織大戰，甚至唔應該存在Paladin，而係純粹越空行者間之決鬥，亦即，《最後一強》。