Iron Man



而家荷里活最大財路似乎係改編漫畫同動畫,雖然人物同劇情一早多到用唔晒,以前技術所限做唔到,家陣CG成熟到爛的地步,

「連《變形金剛》都拍得出仲要拍出黎真實好睇,仲有乜野好擔心?」

有。就係《Iron Man》。一向對Iron Man印象中間位,因為角色設定得太神,Tony Stark無限金錢乜叉都有,要做乜野發明乜野全部好簡單就做到出黎,Iron Man盔甲太過正路夾頗為玩晒,財才無盡加雄霸天下係以前漫畫人物通病,過於脫離現實,所以一向冇特別留意Iron Man,卡通睇得仲多過漫畫,但美國卡通唔同日本,一變卡通立即變得好益智,拳拳到肉炸到飛天唔見晒,冇癮。過左N年,乜都改編一餐的時候,連Iron Man都難逃毒手。

「唔係卦??」

好驚,因為Iron Man盔甲漫畫畫容易,要變成真實,第一件事先要克服比例問題同睇落唔白痴,面相已經難搞啦,成日覺得Iron Man面具個樣好低B!但睇過預告片,出乎意料地靚,本來Iron Man設計麻麻,經過多年仲係畫到好鬼老土,電影版件戰甲流線形同靚得多,個頭差左少少亦接受得到,最緊要質感做到又合比例,就連除左盔甲主角個樣都同漫畫版造型超似,夠說服力。另一樣睇完預告片已經立即飛入場,好簡單,聽metal的朋友都會估到點解劉Sir會咁high:

「《Iron Man》!!」
唔係講緊個人,係講緊首歌。BLACK SABBATH的《Iron Man》,比套戲早差唔多四十年,預告片入面MK1出場,背景就係首歌段超經典riff,大佬冇呢首歌仲點成Iron Man呀?立即飛身入戲院啦使考慮咁多咩為左首歌!
「不過作者Stan Lee唔係因為聽左《Iron Man》先至諗到Iron Man。Iron Man比《Iron man》再早近十年出現。」

六十年代出品,研究過美國漫畫的,都大概估到會係咩一回事。當時係世界大戰後、冷戰階段、紅色主義擴散期,漫畫係美國政府宣傳工具之一,當時出現的漫畫英雄,大部份都係捍衛美國國土、擊退恐怖份子、打倒共產主義為目的,老實講,幾惡頂,我鍾意美漫都係噉話,所以套戲一開始已經超級大美國、講到明主角Tony Stark係全美國最忠心偉大愛國者,嘩唔係美國人的我地睇到嘔。Iron Man的出現,電影版同原著漫畫一樣,Tony Stark戰場被敵人俘虜,敵人迫佢整武器,結果整左套Iron Man戰甲出黎成為英雄。不過電影當然會update番,本來係越戰打越共 - 六幾年嘛,電影版時代係四十年後,自然變成去阿富汗對付恐怖分子,雖然我覺得佢俾人捉的理由都幾戇居:
「要示範軍火,居然唔去美國內陸沙漠區,而去敵軍地頭阿富汗咁蠢?抵俾人捉啦!」

因為事先張揚會拍成三部曲,今集講主角點樣死堸k生,再大徹大悟成超級英雄,手法同《蜘蛛俠》佈局差唔多,這是好事,因為《蜘蛛俠》頭兩集尤其第二係睇過漫畫改編最好,除左動作精彩仲講番主角點樣面對英雄以外現實生活同人際關係,呢兩樣野好多動作片英雄片都忽略,跟住《蜘蛛俠》拍法實冇死。近年好多動作同改編電影開始留意番角度深度,睇黎動漫改編改親俾人鬧流於表面之情況將不再,改編戲會成為趨勢之一,話晒已經有個家傳戶曉角色俾你用,再加好多名著已經畫左幾十年大量內容人物任君選擇,各位導演編劇可以慳番唔少工夫呀。只係我覺得人物建立方面做得較弱,睇唔出主角點樣死堸k生立即轉性(可能因為佢表情來來去去差別唔太大),同身邊其他人關係交代未夠深,變化唔多突出。所以只有話,因為係前傳,純粹帶出角色。主角做英雄唔係為世人而為自己多,亦係同類型中較特別設定,只係同樣冇乜用到,又未關乎到去人性內心。等下集啦。

又同《蜘蛛俠》一樣,戲中最過癮情節,係睇主角研究點樣發揮自己超人能力。呢d橋段通常好悶,以前動作片最興主角同大佬打一次,唔夠抽,影佢點練功、點樣同大師吹水開竅、間中同人地打一兩場,之後就得道了贏左大佬,過程長而冇驚喜,Iron Man講佢用MK1逃走返到美國,以MK2研究潛在能力開發出MK3,過程中加左好多美式笑位,雖然由開始到正式完成套甲好長時間,不過估佢唔到地好睇喎,因為好笑!甚至比打鬥仲精彩!講講機設,出現三套盔甲,原版中都係非常之老土甚至有點樣衰特別MK1,好在戲入面型好多,MK2同MK3基本上一模一樣只係顏色唔同,但MK1改動好大,由原來超簡單圓形柱體一舊舊砌埋,變成工業感覺強烈重型裝甲,三部機當中我最鍾意反而係MK1,因為夠真實夠份量,同現代軍事味最濃!之後型號太先進同老屈,反而冇左MK1果份重量感同氣勢!始終戰爭機器要大大份粗線條先至型!

「只係有樣野唔明:既然Tony Stark咁容易諗到Iron Man盔甲出黎,點解之前唔諗,而家俾人捉左先整?一早會整出黎,直頭唔會俾人捉加發左大達啦!」

另一樣欣賞係真實感:戲中主角要變身Iron Man,要入工場流水工業式全自動機械安裝,合乎現實亦好型,記得睇電視睇過卡通版,套盔甲係摺埋收入個篋入面,要變身時打開個篋,立即成套盔甲完整地彈出黎...好在而家係戲唔係卡通。不過如果佢地會試下套戲噉玩法,都幾過癮。

講到打戲,以英雄片黎講唔算多,仲有少少唔夠喉,真正打得三場。第一場就係MK1剛剛完成出場,套甲遲鈍粗糙亦唔係好勁,拍到出黎好睇,假如套戲係十幾年前拍,相信黎到MK1呢部份套戲就完,因為以前美國佬拍戲好鍾意點到即止,好多戲往往就係唔去到盡,去到重點一出場就完,唔會繼續發揮落去,原因相信成本同技術係當年兩大限制,請睇《再生俠》(套戲真係睇到好灰,完全浪費呢個極成功美漫人物,遲十年先拍咪好囉!)。而家冇乜野拍唔到出黎,完成MK1先只有半套戲左右,MK2冇打過只得一場飛天戲,最後兩場都係MK3負責,一場係美國飛到去阿富汗打恐怖分子(冇錯結果阿富汗人的自由都係要依靠偉大的美國!),話咁快就玩完因為人地得幾枝機槍仔,而家係Iron Man喎大佬屈爆機啦,返美國途中同兩部戰機高空追逐又係好睇,只係太短,同對手數量少,拍佢同成隊軍隊打先顯得出戰甲威力同多野玩嘛。

返到美國再文戲一輪,已經到打最後大佬、邪惡版的Iron Man裝甲,對頭去阿富汗回收Iron Man MK1再造,Tony Stark整Iron Man想做英雄反而創造出最邪惡兵器,自然又係打打打打打打打...睇落好似鐵甲威龍第二集:大家「同系」、反派身形高大近倍、兩者間之糾纏、就連奸角武器都要一樣,除左多左飛天,真係同睇鐵甲威龍二唔差太遠。Iron Man單掌心射衝擊波已經玩晒,仲未計其他武器,相反奸角除左大力只得飛彈同機關炮差得遠,動作仲要慢咁多,點計都係主角屈死對方至係,但為左有戲睇,先設定「能量不足」,衝擊波只出過心口一次(雖然呢招漫畫中常見,戲只此一次用心口射),其他武器又會咁好彩「壞晒」,結果明明勁過人都要俾奸角屈番轉頭,最後靠囡囡贏,即係今集想玩深度,打的時候都想可以打得喪d,而家兩隻野咁斯文、主角有得屈機都唔屈明讓round,睇到好無奈囉。所以你見我會講,睇Tony Stark點樣整Iron Man出黎,好睇過Iron Man同人地打。

至於笑位,真正的笑位勁多,好多美式幽默位我鍾意,最過癮果幕係MK2飛完天,降落自己屋頂時,唔記得左套盔甲係幾噸重,一熄火立即由天台連跌幾層落地庫。睇英雄片其中一樣過癮,就係睇呢d空想科學同現實世界不乎的幽默,自《蜘蛛俠》呢樣野被經常探討。非刻意的笑位都有,全部集中晒最後一戰,呼應番頭先天台降落點知超重,兩隻Iron東西在空中鬥一輪後,主角再次降落到大廈天台,諗住會歷史重演?點知屋頂冇穿到,主角安然企穩行多幾步都冇問題,再跟住重過主角幾倍的邪惡Iron Man跳埋上天台,兩隻加埋咁重個天台居然都可以冇事頂得住。然後主角超戇居地除左一件腕甲,即係拆左衝擊波炮擺明讓賽,再俾奸角打到幾乎跌落街,居然突發神力徒手拉住屋企邊緣,血肉之軀吊住幾噸重裝甲,隻手居然唔斷、個人居然唔跌!打贏奸角的方法,係非常老土地主角唔夠抽,就叫人(囡囡,預左,幾十套戲出現過如此橋段)引爆奸角企正上面的反應爐,一炸成層爆晒,奸角就梗係即場死亡啦,但負責引爆條女居然乜事都冇?連吊住係反應爐上面加冇全套裝甲保護的主角都係?灰到爆啦真係。結果都係逃離唔到老土一套。

入字幕前,終於有得聽。預告片有《Iron Man》段riff,戲入面想聽首歌,要去到最後,仲要得臨尾成隊band發癲solo果部份(以前drock & metal歌正在成日最後突然加速加成隊band一齊怒啡,開心),Ozzy Osbourne把聲更加未出現過,開頭諗住片尾有得聽晒成首添。不過配樂同套戲一樣出色,作為Iron Man咁metal就自然多rock同metal野啦,就連soundtrack都係symphonic rock,買隻soundtrack試試真係諗得過架。

最大驚喜,係今集結局:臨完場,Tony Stark非常型地同大家講一句:

"I am Iron Man."
公開左自己身份,漫畫都冇乜試過。完埋字幕先精彩,就係Samuel Jackson做的S.H.I.E.L.D.大佬Nick Fury出現,向Tony Stark提到「Avengers Initiative」。有睇美國漫畫的朋友,都知道大件事了。Marvel漫畫世界入面,S.H.I.E.L.D.係美國最大間諜組織,由Nick Fury領導(漫畫中Nick Fury有一黑一白兩個版本,黑人版完全按照Samuel Jackson設計,所以搵佢做飾演最適合不過),而Avengers係由幾個超級英雄組成之all-star英雄隊伍(well,可以話係戰隊)。換言之,《Iron Man》呢套戲唔止係一個角色之第一章,仲係Avergers呢個終極大project前傳之一。開場唔知有冇留意到,以前Marvel漫畫改編的電影,片頭都會有Marvel個標誌,今次Marvel下面,仲加左Studios,可能見其他人次次改編都賺到笑,而家唔止漫畫,連戲都自己拍埋。Marvel/美國漫畫傳統係crossover,正如Avengers已經係Marvel自己好多漫畫角色夾埋一齊,方便搵錢嘛,你睇得其中一個,自然會有興趣睇埋Avengers,睇完Avengers又可能會追埋其他隊員d漫畫,加上幾個英雄一齊打精彩得多,抵畫漫畫果班發達。《Iron man》上完,個幾月後又到《Hulk》(唔係李安果套,今套係「正確版」),似乎Marvel (Studios)真係一埋手電影立即好有心將漫畫crossover文化帶到電影,呢樣野好似之前從未試過,唔係講緊好似《AVP》同《Freddy vs. Jason》果種兩套戲都收得就炒埋一碟刮多筆果種,係一開始已經決定幾個系列每個連拍幾套,最後再用一套戲作為大總結果種。之前確未有人試過。

「《Iron Man》係繼《蜘蛛俠》之後最滿意果套改編電影,好睇到有興趣入場睇多次。如果Marvel Studios跟住出品keep得住呢個質素,必撐。」