The Incredible Hulk

The Incredible Hulk

可能有朋友唔知發生咩事：

「乜戲院都有重播？？」

當然唔係同一套。第一套叫《Hulk》，2003年出品；今日講呢套叫《The Incredible Hulk》，中文學名《新變形俠醫》，2008年出品。至於點解會上完又上？2003年果套，李安做導演。已經解釋晒點解。你睇我都唔多提就知咩事。

Marvel近年努力搵銀，電影都自己拍埋唔益其他人，《Iron Man》隔左兩個月唔夠，再黎Marvel Studios第二套自家作品《The Incredible Hulk》，戲名同漫畫一致，可見Marvel睇完李安個「柔情版」都唔多頂得順，決心自己拍番正（確）版交代，同李安作品完全冇關係，請直接當成一套新戲睇。對fans黎講，這是個天大喜訊，首先原著單位負責，劇本唔會修改到離晒譜先，同呢類美漫英雄電影，李安感情同戲路都唔適合，唯Marvel同典型荷里活製作先至帶得出大家期望中的神髓。

「你想睇Hulk喊苦喊忽講佢點樣俾人類歧視排斥，定睇佢同成隊軍隊＆怪獸打到天昏地暗？」

我諗唔係人人好似劉Sir咁膚淺（按此閱讀《劉Sir電影選擇指南》），都冇邊個會選擇前者卦？同《Iron Man》一樣，本為幾十年前的漫畫角色，出處與時並進現代化，原著中主角係研究新一代大殺傷力武器伽瑪爆彈時，身於爆炸現場吸收輻射變成Hulk，平時人類樣，一嬲就會變形，而且越嬲越勁。電影版遇著大殺傷力武器同恐怖主義敏感年代，變成研究人體抗輻射時發生意外。睇戲睇得多睇得耐，今套之前，未見過有導演咁夠薑。即使改編電影主要目標係原著追隨者，往往會顧及番部份觀眾冇睇過原著入場，總會花篇幅講解角色背景同變成英雄／怪物過程，即係短極都要十幾廿分鐘，《The Incredible Hulk》的incredible在於製作組襯片頭字幕順便交代一切，人地三四個字的蘊釀，佢三四分鐘唔使搞掂齋畫面對白都唔使，字幕完左已經話事發五個月後主角走到南美避居，即係我份人心急，都嫌交代咁精簡激過頭。或者導演覺得一來角色家傳戶曉，二來黎到廿一世紀大家睇左幾十年科幻片，來來去去都係果幾幅被架啦，慳番啖氣單刀直入大家仲開心啦。

自《蜘蛛俠》，現代英雄片唔再一味怒打（舊時英雄片／正義片常犯毛病），而講番英雄作為平民時面對之現實問題，Hulk圍繞主題係主角由人變成怪物，點樣被人類世界排擠、逃避軍方追捕、再冇埋條女的悲哀。鑑於《Iron Man》講Tony Stark點樣成為英雄編排同演繹極度滿意（雖則突然改邪歸正果野唔多夠說服力），在這裏唔太被感染得到，可能片頭超簡單交代，一野跳過晒前事，主角開始就係灰睇唔到佢以前正常時係點，先入為主覺得佢灰係先天的掙扎係應份的變怪物做唔到正常人係抵死的，達唔到原來主題目的喎。主角個樣同氣質，亦完全冇果隻feel。女主角搵左Liv Tyler做，兩個拍埋一齊，你會覺得女主角係屈就左。呢個主角的確好灰。只不過果份灰，唔係導演本來想帶出果種。是否選錯角？

「題外話：AEROSMITH都幾樣衰的歌佬Steven Tyler個女可以生到咁靚完全唔似佢，都算係一個奇蹟，只係同佢正正十年前的成名作《Armageddon》相比，而家已經呈老態有少少認唔到，外國人殘得快是殘酷的現實。」

因新一浪英雄片開始著重番劇本，對此方面自然有期望，可惜今套做得唔太好，只好寄望動作方面。開始左冇耐，用極長篇幅講特攻隊追捕變身前主角，好長但唔緊張刺激有點敗筆，重點只係最後帶出Hulk登場。初出場要唔俾你睇，只得黑影、快鏡走過、背光近鏡／側鏡，總之除左見到佢好大隻乜都睇唔清楚。或者想保留一份神秘感俾觀眾，但當主角係個有幾十年歷史家傳戶曉人物，加上之前已經拍過一套「不正確版」，相信冇特別留意都會大概知咩樣，呢種較適合原創角色的掩掩揚揚，在此反而有點多此一舉。

剩番只有兩場，一場打軍方，雖然只係步兵同輕裝甲圍剿，冇李安版以一敵百抽成隊軍隊咁強，總算拍得出氣勢，但最精彩係大對頭經伽瑪強化體能單挑玩埋身，睇佢靈活身手同Hulk蠻力鬥得旗鼓相當，效果出乎意料地可觀。之後唔夠抽想再勁ｄ然後走火入魔，合情合理造就大敵Abomination臨尾先出場，造型靚夠晒邪同霸氣（反派型過正派是永恆的自然定律），兩隻怪物打得夠勁補救到之前好多缺點（令我諗起結局又係兩隻怪物互抽的《LXG》），Hulk識得用武器、兩招成名必殺技出晒，fans滿意啦。只係出招時，或者太過動畫化太誇，現場觀眾反應似睇緊笑片多。

對比兩集電影，李安版太似公仔，毫無疑問今次Hulk做得靚同仔細好多，不過有時CG感重過頭，同畫面整體協調差些少，而點睇，都係Abomination型同真實得多。打係拍得唔差呀，不過又係衰一樣野，而家美國片好興一齊衰：或者係市場考量、會好多靚仔入場，雖然Hulk一個人抽成連軍人打爆十幾架裝甲車、雖然最後兩隻怪物對打掃街拆樓，爆左千幾樣野，居然一個人都冇受傷冇死到？即係唔係冇人死，只係死屍都唔係見得好多，仲要係事後先見到同冇血，而螢幕上見得到的死亡事故，如果有的話，係完全唔明顯，死左都唔知囉。

「搞到好似細個睇《G.I. Joe》，ｄ人永遠係臨中槍臨中彈一刻立即跳開冇事唔死，結果打仗打左十幾年，雙方一條人命傷亡都冇，都唔知打黎做乜。」

因性質上同時間上，自不然會拎黎同《Iron Man》比較，全套戲顯得平淡得多、太直敘，寧願用Hulk工廠變形做開頭，之後倒敘／插敘講番前因，劇力同通順度都高ｄ。可能係題材關係，戲中冇其他Marvel英雄戲咁多笑位，只係睇唔出主角的苦況，笑料又不足，令到套戲兩頭唔到岸、差少少娛樂性。配樂冇乜特別留意，又係為整體氣氛卦，一路覺得好靜、唔多突出，更加懷念《Iron Man》個symphonic rock soundtrack。有樣野、少少野，但在香港都幾難避免，就係字幕譯得好。正如將武俠小說譯做英文，ｄ人名同招式名會笑爆咀一樣，將美國漫畫ｄ型到爆的角色別名譯成中文而譯得好，難度都幾高。因為好多係用簡單名詞或動詞，譯音戇居，譯意又難，唔係譯到好娘就係譯得難頂，Iron Man叫鐵甲奇俠已經叫好少少、Hulk呢度叫變形人．．．呢樣係先天難處。黎緊應該仲有大量新片，希望翻譯組同字幕組能帶來驚喜，好果隻唔係笑果隻。

至於後路，當《Iron Man》片尾隱藏片段已經話你知黎緊會有all-star project《Avengers》，即係冇可能冇續篇，伏線已經大把。今集大量出現Stark Industries商標，連Tony Stark都客串埋一份，同狩獵Hulk的將軍講合作，臨完場一幕暗示主角成功控制到Hulk力量，但個氣氛營造到好邪惡，換言之下集Hulk會係反派，可能Iron Man同佢打？但真正的奸角未講完，Abomination未死，一個瘋狂博士感染到Hulk的伽瑪血液個頭變到好大，之後冇交代佢變成點，即係好大機會成為下集新奸角。連Hulk下次出場係正定邪都有得揀。Marvel好野。雖然整體有點不符預期，長遠計，肯定仲有大把野玩。就等佢下一套。

「最後，係只同metal友有關的題外話、冷智識：飾演Abomination果位，叫Tim Roth。但不是加拿大progressive death metal band INTO ETERNITY大佬Tim Roth。請謹記。」