以前叫香港人睇美國電視劇，理得你，個個唔係無線就係亞視。或者兩間電視台自拍劇集太廢，內地台灣同日本韓國睇到厭，Nicam又由新奇事變成普通過普通，從前冇人理的英文劇集，突然變成全城最潮事物。搞到我好唔開心。《X-Files》之後，美國劇集仲有興趣追得好少例如《Invasion》，更因為劇集霸晒黃金時段，我最愛的明珠九三零得番星期六日週末爛片王，明珠台都少睇左。到《Heroes》，終於由亞視重投明珠台懷抱。

故事熟口熟面：一班人類，唔同種族、唔同膚色，突然發現自己擁有異能，初時圍繞各人點樣於生活中面對自己擁有超能力之異況，其後出現一個連環殺手專殺異能人，同神秘組織企圖追蹤及控制異能人，幾位主角由互不相識，到知道大家存在，要共同瓦解組織策劃、透過摧毀全紐以達操控異能人以至世界之陰謀，同時亦要應付連環殺手帶來之威脅同變數．．．

「聽落，好似《X-Men》喎。」

初睇簡介，我都覺得好似，又係講到人類再進化，擁有特殊能力之變種人因為受到正常人歧視，怕成為社會中被排斥甚至監管之「怪物」，故事就係以變種人於人類世界求存為中心。但電視劇同漫畫分別大當然。漫畫大潮流係打同埋打，講變種人分成正邪兩派，加上人類三方鬥法，但不同於典型美國漫畫，《X-Men》打得黎有深度，同借變種人困境投射到社會中不同問題如宗教、種族、性別，對社會現實作出種種批判，渡過六十年歷史仍然大受歡迎。《Heroes》做得電視劇，先要入屋後要控制成本，中心唔放在超人打鬥而放在人性同角色發展，就連設定上大部份超能力都唔屬於攻擊系，但盡量做到每集都出現搏鬥甚至爆破場面做高潮，CG水平頗專業精細像真，往往點到即止唔會有電影咁大陣仗打到上天炸到七彩，雖量少，但既為劇本向，最重要係配合到每集劇情，有時（太）多未必好。

聽落好大機會「唔好睇」，格局點睇都似action game點知拍出黎變左AVG，好易邊睇邊鬧。不過導演功力深厚，劇本編排得非常嚴謹，全季二十三集，頭半著重每個角色心路歷程同解釋背景有時較悶，後半特別最後三份一係，由個別角色去到大家相識、反派陰謀結盅，縱觀全盤大局後同穿越時空去到另一個平行時空、未能制止危機發生之"Days of Future Past"，一環扣一環、一環加一環，好有「追」味。只係全劇有個通病：因為每集時間所限，加上人物支線眾多，好多角色能力甚至性格發展，都係做幾做或者講幾講就開到竅，同好多場面一睇已經估到跟住會點，對於電視劇性質限制理應體諒，但難免睇到
「下？噉都得？噉就搞掂？」

除左緊張，編劇成功營造到一份懸疑感。紐約毀滅導火線係一個能夠控制輻射之異能人，但同時正派主角之一能夠同化身邊人能力，大反派連環殺手亦透過殺死其他異能人盜取超能力（有趣地由始至終都冇講佢點學到，場面係佢用超能力斬開受害人個腦就完，跟住點學？食左個腦？）。故事其中一個重點，係透過有預知能力之畫家，畫出炸彈係一個人類。會係三人之中邊一個無意或刻意用輻射能力炸毀紐約完成預言？謎團一直保留到最後一集先公開，舖排得好一直吊住你癮等你追落去。因為之前持續緊湊，同多條支線獨立發展到終於聚流，對大結局期望好高，既然所有角色齊集，加上正反兩派最重要兩個學識晒所有招數，最後三個字諗住會打到飛起有番睇頭，點知幾位主角變晒茄喱啡，每人出出鏡出出手就玩完，大奸角仲要（扮）死得好白痴果隻，而一路被視為重要之預言同改變歷史草草收場，甚至顯得牽強。作為大結局，落重少少成本搞搞大場面無傷大雅加應該卦？

雖然一番心血臨尾搞左個反高潮出黎，除左拍攝同題材漫畫化，概念於電視劇中亦屬少見，加上演員演得好同劇本拍得出劇力，令人有心追落去。第一季「Volume 1」大結局，仲有第二季「Volume 2」序曲（真係當正自己係漫畫）：可以穿越時空之日本人（就係叫Hiro咁特登，仲要全劇講日文夾英文未幕咁正）返到日本古代，遇上相傳為「一切之始」之劍聖，同作為劇集標記之日蝕。由現代返到古代、由美國去到日本，真係創意十足，加上最後一集有加到伏線，真正之幕後大黑手仲未出場，好似第二季（導演漫畫化之形容為第二輯）會比第一季更有睇頭喎，但美國電視劇另一個毛病係第一季正正經經，但第二季開始可以立即走火入魔，越後越離經叛道。請睇睇《謎》同《逃》。《Heroes》唔好呀唔該，雖然單個序章已經有少少跡象。

黎到香港最難得，係無線終於唔嘗試譯中文名，就噉叫《Heroes》，破天荒首次。如果換著由以大陸為主要市場的亞視播，就會出現《超能英雄》或者《英雄傳》之類的白痴名。好在亞視唔會買美國片集。