雖然我鍾意美國動漫，非常老實來來去去唔係Marvel就係DC，始終兩大label接近完全壟斷媒體，情形就同metal一樣，唔係特登去搵、有心去摷，無論你覺得自己聽得點地下點另類，其實來來去去都離唔開Sony、環球、華納等幾間大label，分別只係局中人知唔知道、會唔會諗整個局係點；但當然無知是福啦。因為工作同音樂已經佔左大半條人命，動漫呢家野只有靠煮到埋黎先食，冇太多精神時間特登去搵，所以Hellboy相信好出名，唔好意思，對佢知識接近零，叫做識佢間label Dark Horse多過佢個人：間野緊隨兩大廠牌其後，專出電影改編漫畫，經典雖然唔夠人多仍有膾炙人口作如《Sin City》同《300》，而Hellboy係Dark Horse少有自家原創角色。

「其中一些經典短篇，有時間會寫寫，因為唔輸大label出品，甚至更有深度；又或大label出品，始終欠缺Dark Horse份indie味。」

主要認識來自電影第一集。二戰時納粹德國打開魔界之門召喚滅世魔神，好在神勇的美軍及時制止，魔神降唔到世，但漏網走左隻魔鬼仔黎人間，偉大的美國自然係收養左佢導魔向善，成政府特派應付超自然現象之異人特攻。特別在因為係魔鬼所以十分樣衰，又完全融入美國流行文化外表行徑完全唔正派，就係要噉樣衰衰地賤賤地串串地大家先至鍾意，正如睇X-Men，點解狼人一定多fans過其他正派？故事教訓你，做人都係唔好咁正氣呀，盞食屎架咋。Hellboy形象咁奇特，點知真人版真係做得到一模一樣，仲要真係靠道具同化妝完全冇CG先好野，最重要係連演員都演技一流，成日都話反英雄吸引過大路正派架啦。

第一集除左帶出幾位主要角色咩來頭，以對抗納粹餘黨同魔神為主線，老實講唔係拍得差喎，全套戲勁順、所有角色入型入格、充滿美式幽默，特別講各位非人主角在人類社會生活幾咁笑爆咀，好得出乎意料，雖然知名度唔夠，但漫畫改編電影中都算係最好之一，衰在樣衰同個朵唔響而冇乜人去認識。記得當時套戲有宣傳到，但唔知點解後尾冇上到畫，結果益晒各大VCD舖，記得果時旺角街頭十間有九間門口播住佢。《Hitman》又係噉廣告都見埋街點知唔上，為何？或者始終非Marvel同DC香港實在太少人識，加上角色造型奇形怪狀另類過頭一ｄ都唔型，打鬥場面唔夠多亦唔大規模，而家大堆頭年代仲玩一抽一／二／三／四？唔隻抽番幾十幾百幾千都唔好自己好打啦。雖然劇情好，特別講角色內心非常實在，但有幾多香港人入場會為睇你隻魔鬼呻黎到人間面對唔到人類溝唔到女先？所以上唔到畫又唔係點出奇。

有趣在冇幾多套戲會似佢，第一集唔上畫，一上就上第二集。睇完預告片就知：特技要幾大陣仗有幾大陣仗，ｄ敵人冇千軍萬馬塞爆螢光幕，都要隻隻幾十丈高霸晒全個畫面，點睇今次都唔用劇情而以動作特技做主打，仲唔係香港人杯茶？係我杯茶！所以就入場睇了。劇情不再拉埋納粹邪魔而玩神話／童話：說話仙界好耐以前造左隊機械兵團打人類，最後當然被封印啦，跟住梗有仙界叛徒想重開兵團屠殺人類，為保全地球未來，美國政府夠鐘派Hellboy出馬了。呢類電影前提從來簡單，大家只想知發揮出黎點誇張法，如果為睇特技今集你一定滿意，夠多打鬥而且要型有要笑有，大場面又一連幾場，最後大戰黃金機甲兵團同單挑大佬更加精彩過精彩，唯一遺憾係火女全集接近冇出過招，明明識放火玩晒仲要拎住枝槍仔慢慢射，好多時根本佢一出招就屈爆機唔使打，使乜咁辛苦？可能作者都知，所以每每最需要佢的時候，雖然在場但永遠唔出鏡匿左去唔知邊度。最突出一樣反而係佢常出果一「招」全身著火，燒著時身邊空氣因高溫影響扭曲光線折射，聽落好似好普通自然現象，但咁耐以黎佢好似係第一個火系人物忠實表達呢個物理現象，其他如Ghost Rider同F4火人都忽略左呢一點。

反而對劇情興趣更大，因為上集已經係英雄漫畫改編作典範之一（即使仍然好多人唔識套戲），特技方面燒更多錢就預左，能唔能夠動作劇情兼顧，唔會犯偏重前者之同類電影通病先至重要。拍戲最難係第一集以後可以再有新一集比以前更好，因為往往下一集因應故事增加新角色，人多左就分薄篇幅，角色越多危機越大，睇睇九幾年頭《蝙蝠俠》添布頓走左之後變成點就明，甚至早《Hellboy 2》少少上畫之《Mummy 3》就知 － 兩套都係神怪動作、兩套都係續集、兩套都係個名要主題之後一個冒號再副題、但水準絕對兩回事。欣賞導演夠薑，擺明車馬當全部人睇過第一集先入場，接近完全唔解主角角色間關係，所以前半十分緊湊，只係第一集香港冇上到，可能會有觀眾入場頭三分一唔明發生咩事？到後來新角色出現，多左人就多左人際，後半打大佬之前接近全部吹水文戲，而導演有見上集好多場面非常成功，尾半講番人物關係同異人面對正常生活，似乎有點想重複上集一些橋段同場面，只係覺得唔太到肉，加上連串動作場面在前，一時間咁多文戲比重失衡，再者角色內心同何謂正何謂邪之反思頗為表面，而且加入得好夾硬，似突然帶出而唔係自然帶出。至於劇情中最失望，就係當一開頭見到奸角有個孖生細妹同佢心連心，已經估到最後佢會點死了，所以最後大佬死得太老土，唔符編劇功力。前半套戲感覺絕對比上一集更好，但睇完起身感覺差左ｄ，就係因後半拖累，覺得唔需要兩個鐘咁長，只因後來太多野講同亂先搞耐左。動作場面毫無疑問倍數進步。講故事技巧卻不及上作。

作為一個商業品牌，唔使講你都知實有下文，雖然最後講到最後全隊人散band，但好多人物同對白明顯帶出伏線，就係冥子始終來自地獄，只要在人間終有一日會為人類帶黎厄運，係留定係殺？同時面對「X-Men症候群」，做得魔鬼奇人就一定樣衰，就算你點正義點幫人，普通人類一見你個樣咁邪惡自然唔會相信你係好人，佢地係咪真係咁值得保護，會唔會做番魔鬼應做肅清人世更好？要講下一集仲有大把野可以講，同時會集中番主角方面，只係唔講你唔知，演Hellboy條友原來已經五十八歲，全靠由頭到尾全身化晒妝加上身手唔差，唔講完全唔信有咁老。所以仲會唔會有《Hellboy 3》，似乎唔係睇導演編劇幾時起好劇本、大老細俾唔俾錢，而係主角六十（幾）歲時，仲肯唔肯演？

睇完套戲，立即好大興致買玩具。正正路路人物figure從來冇興趣，因為真人面相一變玩具往往柒到喊，機械人才是皇道。今集正派新角色靈氣人十足電腦奇俠時代日本特攝片格，都唔夠黃金機甲兵正，好鍾意亞特蘭提斯、「神是外星人」之類古文明同學說，舊世代或古代色彩高科技往往超現實浮誇，steampunk之外，《冒險少女娜汀亞》同《三眼小子》等等細個更加非常鍾意睇，就連Capcom好耐以前隻神魔大戰格鬥game《Darkstalkers》（出得好好，但唔知點解就係紅唔起／唔夠其他Capcom格鬥game紅，太西洋異色唔合東方人口味卦？），怒煲人物就係土偶機械人。戲中機械人整得非常靚同有氣勢，睇完真係好大想買番隻。問題係官方公佈左，暫時所有角色都會出figure，唯獨就係金甲兵冇份。灰。