英雄片同漫畫改編回勇＆回潮，08年中Marvel已經連黎《Iron Man》同《Hulk》兩套，臨近暑假自然更多。要笑有《Superhero Movie》。要打有《Wanted》。不過最感興趣，係《Hancock》。

普通英雄戲睇左十幾廿年，除非用錢撻人i.e. Marvel全線，好難挑得起入場舖癮。另一條路係玩另類。之前《Wanted》原著一反常態從反派角度出發（講緊漫畫版，電影版同本來主題接近全冇關係），《Hancock》令超人變成過街老鼠人人唔妥佢，加上有Will Smith，《I Am Legend》都知佢係演技派，幕前幕後都具吸引力，trailer又幾好笑，覺得會係新觀點解構傳統英雄的反常道電影，就算最後發現冇乜深度或突破，入場笑餐飽都抵卦。點知．．．睇完，都唔太知套戲／導演／編劇想做乜。

一開始介紹電影中超人係個爛身爛勢爛口英雄，睇見都正。某日佢救左個公關，為報救命之恩，公關決定幫佢改善形象同社區關係。這是官方膳稿同預告片話俾你聽的故事。所以入場前，以為《Hancock》會係《Analyze This/That》之類的故事，一個有力人士為自身同身邊人，接受專業人士改造，自然係胡鬧一輪再笑笑笑笑。如果你同我一樣，預期主線就係兩個互動，超人再次被大眾接受變成人民英雄，過後超人同公關兩個鬧分歧，再搞／笑一輪最終大團圓，就錯了。超人回歸並成為真正英雄，只係三個主要部份第一部，亦係電影公司公關部同你講、用黎引你入場的。跟住，就犀利了。你唔入場，絕對估唔到會有呢個發展，所以你打算睇《Hancock》而未知道晒劇情，到此可以止步。

「原來除左Will Smith，世界上仲有個女超人。」

商業考量卦，冇女角始終差少少吸引力？相遇後少不免大打出手（整連串特技俾大家覺得抵番戲飛五六十蚊的藉口），同為超人出處、主角身世解畫。諗住會變成正路動作片，一個世界不能藏兩超人？又唔係。解釋一切之後就到結局，因主角而被補的匪幫越獄尋仇，變成煽情戲。可想而知後越睇越唔對辦，一路落去笑位接近冇之餘，氣息黑暗現實好多。如果拍得到係件好事，可惜導演太多野想講，加上峰迴路轉過頭轉到甩晒轆，如女超人出場唔會感到意外，只覺得夾硬、唔多講得通，出現後公關之重要性同戲份大幅降低，浪費左個角色。發展非常之不通順、人物關係十分地不平衡，一時想表達呢樣、下一場又想講另一樣，就算去到結局，我都未太理解得到導演其實想帶出ｄ乜，首先一定唔係最初所講有力量都要有公民責任同顧及他人先。感想係似剪片果班人剪錯片，頭三份一完左之後，唔覺意剪左另一套英雄戲落去。就係咁大劑。

片商宣傳《Hancock》成動作喜劇，海報、預告片、宣傳將氣氛淡化陽光化，但如為睇動作喜劇而入場，動作其實好少、特技見慣見熟、後半套戲沉重得多更加唔能夠算喜劇。可能係宣傳方針有問題，但唔如此宣傳，入場人數的確會大打折扣。我寧願佢膚淺玩《Analyze This/That》，齋講超人同公關兩個點樣衝突就算，有時膚淺有其好處，同最少從一而終貫徹得到主題思想先。現在欣賞的，是導演試新野的勇氣，雖然眼高手低。以戲論戲的話．．．對我黎講，好過《Superhero Movie》只叫。所以相當失望。08暑假檔期多套英雄戲、漫畫改編中，我期望最高係《Hancock》。

作為安慰獎（其實係安慰自己），送個MV俾大家，3 DOORS DOWN《Kryptonite》，歌詞講年老過氣的正義朋友緬懷過去，但已冇人會理佢識佢尊重佢。又是另一角度看英雄。雖然，歌詞同Kryptonite完全冇關係。不過唔加呢隻字，又唔會引到唔關事的人如我，去留意隊band同首歌囉呵呵。