摷番差唔多十年前買落疊VCD出黎，最勁一日／晚煲十幾集晚晚三四點先訓，加埋OVA同劇場版，個幾禮拜搞掂高達W。唔知點解成日都覺得G同W兩個系列係好有關係，可能因為兩套都係九幾年最早出現的英文字高達，果期好流行一連幾輯都係噉：V、G、W、X，特別留意G同W，因為四個系列中佢兩個較為唔同，「非正史」。另一個咁記得G同W之原因係搞左好耐先至搞得清楚，原來G高達個G一定要放頭，而高達W個W一定要放尾，調尾次序係唔得架。
VGWX四套當年無線都有做過，但真係有追只得X，W電視都睇過下，V冇興趣（有機會睇埋的話會講下點解），而G係灰到唔知點解一集都冇睇過，可能果期顧住打機冇興趣睇動畫miss左，所以到好後來先搵得番G同W黎睇。睇完W發現，咦，原來當年無線播時斷下斷下噉睇，都差唔多睇晒成輯喎我！但點解果時會冇追到呢？因為市場定向同開頭實在唔掂，不過事隔多年終於由頭到尾睇晒，先發覺捱過左個頭其實唔錯。首先鍾意W係另一個宇宙另一個故事，九幾年動畫除左V、F91、0083同08小隊已經諗唔到有邊套繼續用最元祖之年曆UC，好似明顯玩野同「賣埠香港」的G係FC，「正常番」果ｄ高達都係用新年曆，而W就係AC，但故事同最經典之UC0079一年戰爭好相似，可以話係按0079劇情修改成適合九十年代中後觀眾，正如Seed都係將0079再更新一次俾九幾尾廿一世紀新世代青年／細路睇一樣，但某程度上可能係矯枉過正，又或者係有商業目的地改變，一面睇，一面小：
「頂，高達幾時變左少女漫畫？」
W故事係五部高達由殖民衛星剷落地球，要革命推翻一直武力鎮壓殖民衛星之地球政權。最起初高達係搵後生仔做機師同主角，之後除左G之外搵靚仔／細路做主角似乎係ZZ起之潮流，好易睇得出九十年代之後高達之市場目標新定向係乜，亦可以預期到ZZ起之高達已經「唔好睇」了。W當然理所當然地按照傳統搵左五個細路做主角，問題係五個主角都係超美型未夠秤少年，即係就算你未睇過呢套野，單單睇過個片頭之超靚畫功同埋人設，已經知道呢套高達擺到明係畫俾女仔睇，事實呢套亦的確係最多女仔鍾意之高達，身邊有ｄ女性朋友甚至唔鍾意睇機械人動畫都會鍾意高達W，就係因為人設夠靚。齋睇就真係幾好睇，但劇情先係重點，亦都係問題。套野講五個靚仔五部高達落左地球，單憑五人之力要剷平成個地球政府，即係五個人五部機對五十幾萬部敵機，係呢個冇新類型人存在的AC世界中，結果無可避免地神化左五個主角同高達，五條靚仔先得個十五六歲，已經係所有殺人放火偷呃拐騙電潛入爆破電子電腦槍械肉搏瓣瓣都識，算，由殖民衛星飛落地球無親無顧兼同全地球為敵，得閒無事走出黎拆下樓搞下事，有乜可能帶住咁大部高達匿埋都冇人會發現到佢地，而且佢地可以匿得係邊、ｄ高達壞左同冇晒彈藥又點修理補給？基本上除左其中幾個有所屬「幫派」之外其餘幾個都冇，但唔知點解佢地咁把炮得自己一個冇人幫拖，部高達都可以射極都有打極唔爛。上埋宇宙之後仲勁，宇宙空間入面高達俾人追殺即係完全冇人冇物得番自己同部機，居然可以飛出黎殺番幾部機，之後身中幾十槍部野殘晒就爆之後唔見左，第二集又完好無缺地飛番出黎再殺過。成個宇宙咁大又乜都冇，班靚仔去邊度修理補給同搵飯食？
唔止ｄ人勁，連ｄ機都勁，可能搞完G高達班友上左癮，黎到Wｄ高達全部變晒做超級機械人，可以企定定係度俾幾十部敵機狂射連花痕都冇條，主角部Wing Gundam支炮仲勁一炮射到幾十里遠成條街幾百部一炮殺晒，後來變左Zero版有雙槍仲犀利開住炮部機狂轉三百六十度環迴地圖炮一野殺晒成個戰場，真係屈機到仆晒機，再後來一槍／一炮打沉成個殖民衛星或者小星球已經係主角級機體基本能力，又可以勁到連一下殺晒成隊艦隊一炮可以炸晒成個香港的殖民衛星炮硬食完，部機都可以未爆晒機師完全唔傷，甚至部高達可以就噉衝入大氣層，玩晒了。神呀。Wing Gundam Zero機能同破壞力肯定係史上最強高達，甚至遠超全武裝貨櫃GP-03、有月面基地微波砲的高達X同G高達部大佬魔鬼高達。所以呢五部高達可以身為宇宙公敵都好正常，因為理論上 － 係理論上呀下 － ｄ裝甲同火力勁成噉，佢地係可以企正任何數量的敵人面前食晒所有彈，再單單衝埋去用鐳射劍已經可以斬死晒所有人，即係要滅絕全宇宙用五把鐳射劍就夠，唔想咁辛苦，既然部Wing Gundam咁勁一炮可以炸爆一個殖民衛星，單用佢枝槍已經解決到好多問題，攻人時只需要走到超遠然後係噉開炮就得。
但，當然只係理論上，本來集合全世界兵力都傷唔到分毫之五部主角高達，當劇情需要時俾人輕輕射一下都會立即爆機，同埋你會發覺呢套野勁唔係ｄ機勁，係ｄ主角勁，睇ｄ雜卒機平時掂一掂撞一下打一拳都會立即爆炸死左，但有幾集主角同ｄ重要角色坐同一部雜卒機時，本身打崩左塊腳趾甲都足以致命的卒仔機可以勁到高達噉，捱幾十粒火箭百幾槍都唔爆冇穿冇爛，而最勁係假如部機係路人甲乙丙坐的話，部機就算只係一個小小爆炸入面ｄ人都會乜都死晒，但主角坐就算自爆或者爆到成個核彈噉爆，人都唔會死而只會（重）傷甚至傷都唔使傷。
冇錯，呢個世界就係咁唔公平，主角就係咁大晒，令到高達Wｄ機師同高達實在太「神」，冇錯「神」係好型，但實在型到冇晒節制喇，同時亦因為太型，搞到另一樣野好唔滿意：既然想賣靚賣型，點解全套高達四十九集，由到頭尾都係用同一堆罐頭片？打鬥場面集集ｄ片來來去去都係果堆，主角發炮果幾個甫士，對方中彈果幾個鏡頭，基本上佢地整定一set廿零三十個鏡頭宇宙整多另一set，之後每一集拎呢ｄ片剪剪貼貼換個背景拼埋就係一場仗，所以第一集睇到第四十九集，除左幾個主角互砌同特別劇情係新畫，其他越睇越覺好鬼眼熟太過求祈。唔知係因為節省成本定點所以用咁多罐頭片，W機種係咁多套高達中最少，卒仔機先得果五六款，主角果邊五部機仲要得三部有換新版即係得八部（其實你睇五部之中得重炮高達同沙漠高達冇得升級，就知某程度上作者都知呢兩部係五部中最差，重炮機師超勁但在這有防護罩的年代齋射實體彈冇埋身亦即冇用，沙漠係人廢加機廢），加埋對方大佬夾夾埋埋全個W系列二十部機都唔知有冇，講打W唔多好睇，少種類之餘ｄ主角機太屈同主角級人馬太神，除左重要幾場同主角鬥主角之外，其他場面冇乜發揮，不過重點動作場面設計真係幾好，尤其是睇完格鬥為題之G高達，發覺G打鬥場畫比預期中低水準，對G有點失望之餘亦覺得W堅打果幾場確係做得好有迫力。
之前電視播唔鍾意睇，因為頭幾集去得太慢，同整體太多文戲，打鬥又太罐頭，加埋頭果幾集唔知有意定無意做得非常之「少女」，難頂左ｄ，而家睇番，捱得過開頭後面越來越有味，劇情始終係改自一年戰爭（好老實講，有幾多套高達唔係丫），同做到高達自面世後之目標，真實反映出戰爭禍害同和平與戰亂之矛盾，做到唔係得個打而真係有野諗之動畫，最特別亦係W之特色係高達唔同以前一部機跟一個機師，而似卒仔機只係一部隨身之機動戰士，好似新主角機Wing Zero出果陣時並唔係由主角坐，兜兜轉轉易過幾手先至正式由主角用，而幾部高達係易手過好多次，亦有好多主角機對打同高達對打，呢樣野其他機跟機師同「高達唔打高達」（非G）之高達系列好少見，亦係我覺得W一個成功突出之手法。只不過問題係可能要就番果個觀眾同「新開拓」之女性市場，劇情有陣時為左型而冇晒深度，好似兩個宿命主角、W當中的所謂「阿寶與馬沙」次次見親面都係打，無論身邊有咩其他人係處於咩環境點樣俾萬九幾部敵機圍攻都照係噉鬼打鬼打完全唔理，其實好鬼無聊，同埋班主角立場太亂一時一樣有時正有時邪，今集打敵人下集又打自己友，本來係正派的「馬沙」突然間變做敵人阿頭（可能係為「跟從UC歷史」啦），但每次改變態度立場之原因極其薄弱，五個／六個主要機師相信係全個高達世界中最強非新類型人機師不論機內機外，就係因為作者要「型」，搞到佢地一時呢個款一時果個款，而到最後你會發現主角贏唔係因為佢地勁，而係因為全部奸角突然戇居玩自殺，都幾灰。編劇方面差左少少，亦係我唔太滿意W其一，雖然減番呢ｄ咁「少女」式造作，我對呢套野印象又唔係好差仲幾鍾意，特別係兩首主題曲都好好聽。
黎到呢度，好長，不過未夠。完左電視，仲有OVA，全輯OVA四集每集一個鐘，基本上只係將電視四十九集濃縮成四個鐘噉解。電視去到第廿幾集時已經有兩集係超濃縮回顧番之前廿幾集係講乜啦，點解OVA仲要再做多四個鐘？唔知點解，ｄ機械人動畫好鍾意呢ｄ野，硬係中間要攝一兩集講番晒之前咁多集內容（係架你睇過邊套機械人動畫係唔會做呢樣野？），又要冇加咩新野入去純粹倒帶，追晒電視的話呢四個鐘睇黎都浪費時間。但更灰唔係呢度，而係睇晒四集之後出預告片，原來係有兩輯OVA，而第二輯OVA先至黎料講成個高達W之真正結局！當堂粗口橫飛！好在之後睇番，原來OVA第二輯即係電影版，只係電視播完之後再剪接加ｄ新片落去再上戲院，噉先爆少ｄ粗！第二輯OVA／劇場版之賣點係所有機從新畫過變成Custom版，可以話劇場版幾部先真正算係作者本身想畫之高達，靚過電視版Ｎ咁多倍完全兩回事，最經典當然係Wing Zero Custom對天使翼。另一突破係用到CG，好少嗟只得一兩幕，但果個年代CG呢家野係幾破天荒地新穎，兩幕仔算好大件事架喇。最高興當然係所有動作場面終於唔係罐頭片喇，如果電視版都打得咁精彩立即加多幾十分，可惜在呢個OVA／劇場版又係同電視衰同一樣野，唔係為劇情、唔係為打，而／只係為型，真係得個睇字架咋個劇情其實都幾夾硬黎，尤其是當敵人全支軍隊都係用同一部機即係全套唔計正派先得呢部新機咁大把，仲要部新機係照住重炮高達整出黎即係其實全無新意。劇情亦同原著一樣，太空政權計劃掟殖民衛星落地球，講到撞左落地球之後會好大劑立即核子冬季全人類滅亡，但當年0083都試過成個衛星跌落美國地球又冇事？（不妨留意一下，日本動畫同漫畫次次地球有大鑊野發生，遭殃果個一定係美國，十次有八次都係）搞到劇場版好似純粹係為左出多幾款模型搵多ｄ錢而出，吸引力冇乜，但我又受喎，因為ｄ新版高達真係靚好Ｑ多。OVA同劇場版都係摷番十幾年前買落果疊VCD出黎，好多VCD連當年都未睇晒，而家睇完DVD再睇VCD就知咩叫outdate，無論聲定畫VCD都差好遠。問題係，我全線高達都係VCD喎！夠晒懷舊！
起初印象幾負面但結果好鍾意，或者真係因為年代問題，0079仍然同永遠係最好一套，係俾成年人睇之動畫，過左F91同0083都冇乜邊套高達特別好睇喇，因為年齡向開始下落，G高達唔使講都知俾咩人睇啦，W擺到明係賣靚仔引女但已經係我較鍾意'90高達之一，跟住X真係完全冇驚喜甚至冇感覺（但呢套可能係劇情同商業上最失敗之高達係我唯一一套電視做即由頭追晒追到落尾噉先夠諷刺），再跟住Seed，頂唔順喇，機設唔掂之餘人設更加係恐怖地幼齒見到都想嘔，劇情已經預左唔會有咩睇頭喇，高達之本質深度已經由成年人同成熟青少年同大中學生變成小學生，W之後可以話放棄左高達，仲有幾套好似08小隊同Turn-A（唔計機設）真係好睇，但實在冇以前咁有心機追喇。一係就好似G噉直頭唔當自己係高達，繼續拎住高達之世界觀但一步一步膚淺化商業化，見到如此景地都覺得好灰。即係將舊高達更新做適合呢個時代遮，呢個時代ｄ人唔係真係咁白痴咁唔識思考卦？