高達F91



高達癮起,勁摷VCD,先煲G,再煲W,今煲F91,貪佢係高達電影兩隻VCD兩個鐘搞掂。

叫F91好明顯因為1991上畫,當時得三四年級連睇高達機會都未有,只知有呢套超正機械人動畫存在,果時第一次見到F91已經極度鍾意,跟住睇埋敵機就知道呢套野唔睇唔得,

「好X靚呀!!!」

唔好意思果時仍然非常純真的劉Sir係連粗口係咩一回事都未知道的,請將個X字刪左佢。單靚一樣已經足夠吸引到年少無知的我,但係當年只係個小小小學生,又點會有機會去戲院睇或者搵到錄影帶?所以隔多幾年到到自己儲到d錢又識得出街時,搵到隻VCD先有機會睇到一圓此萬千童年夢中之一個。

要講F91,當然先講美術,到今時今日F91之人設機設仍然係我最受落最滿意一套,畫功同之前比精細左好多,要插的話當然插得到但係夠應付我要求,機設風格直到今日都仲係最特別一個系列,敵對陣型機體全部非常歐洲化同美工化,造型同武器都好具中古騎士格,最卒仔果部卒仔機都靚到仆晒街,亦搵唔到第二套個設計風格近似F91,之後個宇宙海盜續篇Crossbone,仲要將呢種機設去到更加另類之極端,如果唔係因為冇影畫化,相信Crossbone會俾人插得仲勁過G同Turn-A。最後大佬朵食人花拉夫列西亞直頭係高達史上最強最經典MA,幾十門激光炮百幾條觸鬚,全機直接思想控制,理論上一部足夠屈爆機(雖然機戰入面佢有得出血滴子,但實際電影中血滴子係獨立行動唔關佢事)。講高達的話F91更加係最靚&最勁&我最愛高達之一,仲有殘影分身絕招出喎!當年最革命係故事去到0153年即係差唔多0079一個世紀之後冇晒限制,出現破天荒的鐳射盾,d科技實在好勁!更鍾意係合理好多,d高達唔似以前一掂即爆,就算斷手斷腳斷頭中幾槍都唔會即爆,直到真係俾人重創或者擊中重要部份先會爆,真實番d(因為科技過左?)。戰鬥繪畫亦更細致。單講美術呢套已經係最成功高達作品之一。只不過靚係冇用,踏入90年代,真係宿命地冇幾多套高達有以前八十年代時咁有吸引力,往往就係衰劇情同深度。

故事年代已經去到UC0123,冇晒自護泰坦斯呢d「奸角」變成全新局勢同故事,當然不離地球政權同殖民衛星勢力對抗,按照元祖高達傳統主角實係後生仔一個,一班柴娃娃靚仔靚妹住緊個衛星俾人攻打誤打誤撞入左軍部,跟住未坐過機動戰士打仗的主角無端端被屈做左高達機師,要用高達幫處於劣勢的地球聯邦反攻太空。全電影個半鐘就係講呢樣野,但劇情完全冇驚喜完全唔特別都幾失望,因為得個半鐘交代晒正常要二三十集先講得晒之內容關係,套戲去得太快,好多地方唔夠清楚或者跳過好多步冇講,好似話有敵人變節,兩個字前仲係敵人果邊,兩個字後突然變成自己友仲要順理成章得好似一早已經係自己人噉,最後朵食人花咁勁點知主角仲勁唔知點解臨到唔夠抽時最後一刻多左招分身,搞到隻食人花戇居居做低自己又係吹脹,係型都型得合理d解釋番下啦大佬,實在係太快同太求祈,打雖精彩,故事有好多野都可以延伸同解釋。睇完之後,只會覺得一定唔止咁少,以F91之潛質,肯定唔(止)係一個個半鐘電影project咁少咁浪費,人物非常之多亦有晒成個完整世界觀,當年打超任隻game有出F90系列(N咁多個裝配,相信係歷史上最多型號之高達),而F91設計靚、武器多(基本常規裝備可能係所有高達之中最多果部),又有超勁一炮穿盾之VSBR令佢成為火力最勁高達之一,仲有屈爆機絕招分身,打機戰果時F91都係最勁高達之一。既然有咁完整設定再加埋F90歷史,仲有「後傳」Crossbone,造出黎點會只係為左呢個半鐘咁大把,淪落到主角一開波第一次用機動戰士已經勁過晒全隊其他人,又冇乜探究過對殺人之反思,d機能太快發揮晒出黎,最後又老屈地開到招分身贏埋大佬,搞到冇晒發展同太理所當然好多吹脹位。如果成為電視版相信可以成為一套小/半經典,已經夠晒料砌電視版丫,點解唔去做?(雖然我覺得呢個故事同宇宙,改成電視劇都唔會夠以前(新)自護年代時咁具思考性同哲學性),所以成個F91世界,最精彩唔係F91呢套戲,而係F90同之後Crossbone呢d小說同漫畫,精髓全部留晒俾螢幕以外。搞到我對Crossbone好有興趣。

睇完套戲,未完,仲有片尾。十套戲有九套唔會睇片尾,但F91個片尾係萬睇不厭,當然唔係睇字幕啦,而係F91首片尾曲係我最愛高達歌"Eternal Wind",聽到今日都仲係咁鍾意聽的一首J-Pop,當年睇完套戲之後係噉倒帶就係為左重播片尾聽歌,又冇soundtrack又冇mp3要聽歌就只有呢個方法,今日自然係歷史重演倒完又倒連聽幾次,實在太好聽喇。聽埋歌仲有喎,片尾之後隻VCD仲要加埋果年所有同F91有關之宣傳片電影模型都有,製作超專業。就係因為呢隻VCD,令我對F91印象持續正面,你唔鍾意一回事,有好多不足亦係一回事,我就係鍾意F91,因為可以話係最後一套好睇之高達(仲有緊接住之0083、08小隊同Turn-A)。之後V開始,除左Turn-A冇幾多套提得起興趣。唉。