每次有戲上新一集，電視就會瘋狂重播舊作，搞到我廿四個鐘內睇左四次《G.I. Joe》。琴晚明珠930做完到有線做，今日訓醒晏晝有線又播多次，本身夜晚要出街同親戚食飯就順便睇埋第二集，繼當年《妖夜尋狼》夜晚皆旺睇完第一集立即衝上新世紀睇第二集午夜場後又一新紀錄。可惜新世紀GV已RIP。

我要求好低好過上集就得，不過想差過其實好難，上集真係甩皮甩骨到拍黎擺明為sell玩具真正孩之寶心態，起碼今次編劇同導演冇咁卡通片似返套戲先，個局叫唔錯會覺得真係有陰謀，劫獄同最後呃晒全世界一齊射核彈兩段我幾鍾意，雖然中國控制核彈部電腦螢幕大大隻字「雅虎香港」射核彈個掣仲要寫住「準備好」就真係笑到你仆街。同，咦，點解部腦會用繁體字，同係香港控制全國核武？義勇群英果然係反中亂港的邪惡外國勢力，難怪戲入面美國政府都要剿滅佢地！

打都多同好左，雖然忍者條線除左為攝時間同擺全系列最有意思的忍者入去完全冇意義（到頭來，G.I. Joe半個存在價值始終係為賣商品）（另外半個係乜？咪就係等班靚仔睇完以為做軍佬好型呃佢地大過入伍囉，其實當年好多美國卡通商業得黎好重政治意味），但基本上上集班人冇幾多個今集再見得返，永世見唔到樣的蛇眼同毒蛇司令就搵邊個做都冇所謂啦，原來The Rock先係主角，而Bruce Willis係個超級大路人。呢樣我都冇咩問題，但係上集明明兩邊女角都好正，到左今集，喂，囡呢？？？