每隔一排，戲院都會上一兩套路線偏離典型主流、有點兒扮cult的懶cult片，即係前提往往超現實或超自然甚至完全冇前提，一個人或一班不相識人士聚首（多數係封閉式場景），然後「幾個人被迫為某目的鬥智鬥力」（《Cube》或《Saw》）or「做左一件事可以有大量好處但同時會有各種反效果你做唔做」（《一百萬連鎖兇殺》），重點是鬥生鬥死過程同意外結局。拍同睇呢類戲風險非常高，因為cult同鳩只係一線之差，而且條線非常短非常幼，好易因為之前玩到太大收唔到科結果草草了事衰晒。雖則噉講，逢見到呢類懶cult片上，不論cult定鳩我照會捧場。
所以好易估到，《血聘》劉Sir一定會睇。八個人考招聘試爭一個職位，八十分鐘內一間密室做乜都得，只要最後講得出試題答案就得，但問題係．．．冇問題，試卷只得白紙一張。聽落非常似《Cube》同《Saw》之類（基本上而家講親呢類片一定會拉到佢兩個系列），不過唔玩血而文鬥吹水為主。充滿indie味，個半鐘入面只出現過一個房景（如果你連片頭介紹角色出過少少的洗手間都計，咪兩個景囉），加八個考生一個考官一個實Ｑ十個人，全套戲就係得咁多，多個人多個景都冇。就連八個考生背景，都只靠大家議論期間自己揭曉或互相估到，唔會老土地特登加段回憶片段俾大家睇或好特登地洩露（睇番頭先提到兩個系列），連外景都冇全套戲困係一間房貫徹始終，其他人我唔知，自己就好受呢一套。
當只得幾條明確規則，考試卻冇問題提供，最終只可以有一位勝出者，並暗示你可以用任何方法達成目標，就可以估到劇情發展係點，例牌地首先大家合作搵問題，試晒任何方法都失敗，就轉向勾心鬥角同內訌用計淘汰其他對手，限時將盡當然訴諸暴力。過程唔算太具新意或心思，亦難以避免部份已成行貨橋段，例如全隊弱到出面果個另有重大身份，離開時留下解題線索，未免過於明顯；一定有個有實力得黎高調，做唔成領隊就四圍害人，然後出事俾其他人救番，救完一樣只會以怨報德；角色設計亦過份刻意，戲入面班人都自己講，四男四女、八個人都唔同種族各有特徵，真正招聘試會唔會巧合方便成噉呀？造作到我都一度以為係衛斯理小說式外星人實驗，好在唔係，真係外星人實驗或秘密單位心理測試之類就灰了，咁七八十年代科幻電視劇式劇本，聽到都覺爛。
有兩樣野我到而家都覺得整得好差：講到間房原來可以聲控開燈熄燈，一個可有可無的設定，何解咁無聊無端端間房可以開句聲開閂燈？原來係為左最後俾「主角」反勝「奸角」而特登整出黎的一著。非常夾硬作得，特別冇左呢招，你會發現「主角」根本冇可能贏。同，方便拍攝。一個大錯誤：會玩燈，因為班人諗住白紙用左特別墨水，要用唔同光先睇得到試題，打爛左好多燈最後間房著左紅外線燈，跟住聲控熄燈再開，ｄ燈明明爛晒，點知再開變番正常光。喂唔係話本來ｄ燈同光管打爛晒先開紅外線燈咩做乜突然又話ｄ燈好番晒？用番正常光拍易睇ｄ卦，同如果全下半場都用紅外線光，會搞到好似《Cube》。另一樣野係「奸角」病發，已經發晒羊吊暈晒流晒血，講到佢病發到末期差少少就死，跟住俾藥佢食，一食完，半分鐘唔夠立即冇晒事加仲精神過病發前。你平時普通小病傷風感冒，藥丸藥水隊晒都唔會即時冇事，都要訓訓抖抖先好得番晒啦，而家病發到頻死，粒藥丸一入口腸都未落到立即冇事。平常呢種情況只會出現於兩種場合：一係港式武俠片，不論中左咩毒，解藥一入口立即好番晒；同埋龍珠食仙豆。
最必要講，係結局同含意。即係你以為個局咁玄，最後開估會好堅好猛料？點知，原來係玩「從前有隻龜龜前有隻雞雞後係隻龜龜後係乜西」的IQ題，同其實答案一早呼之欲出，最無謂係本身重點係冇試題，點知最後話雖說白紙一張其實真係有題目，可惜按正常思考根本冇多少可能搵得出，只有似而家劇本噉發展加突然開竅至得，我覺得有點糟蹋晒個佈局。個試其實係用一條IQ題包裝的EQ試，解題方法係你知道IQ題答案，之後個半鐘咩都唔使做等夠鐘就得，問題係任何人身處同一個困局式場景、面對其他競爭對手逼迫同精神壓力，就算知道正確答案，都好難把持得住八十分鐘，正如，唔係吹水，其實我睇完考官講規則已經知道答案，只不過拖足個半鐘，咁多人咁多反應擾亂，就算心知肚明發生咩事，都難免動搖覺得是否局中有局。敗筆就在於，既然一開始係講信心講堅持，最後突然以一個比畫蛇添足更加多此一舉的手法畫出腸，就浪費晒全盤心思，單講佢思考出答案就夠晒。
而八位考生，性別比例平均，各人代表一個族裔，如戲中人所言，一個非常明顯搵戲黎做的舖排、一個做黎比第四面牆以外各位觀眾睇的安排。電影中性別同種族主義非常強烈，但講《血聘》前先睇大圍。有興趣不妨回顧，2000年前西方特別美國涉及動作或死亡場合電影，成套戲好難冇黑人死，再當中超過半數甚至更多，出鏡第一個死必定係黑人。不過俾人鬧得多，加上九十年代打後黑人消費力上升，電影中黑人地位日高，但唔知點解外國電影總需要欺壓其他膚色人種以顯白人優越性，既黑人開始唔得罪得，港產動作片同香港打星又正式打進世界，受罪之位自然落到次算東亞地區黃種人身上。繼而出現《Rush Hour》同《Cradle 2 the Grave》呢類黑人同中國人合作瓦解（多數係中國人／東亞人組成的）黑幫陰謀電影。發展至今時今日，現象已成為黑人好多時擔當電影中權威性角色，相反亞洲人尤其中國人做番佢地十幾年前個位，即係行先死先、用黎搞笑、蠢同戇居。此有趣之處開場頭兩個字已經睇到：名正言順主宰各人未來同生死之考官，係黑人。開考後第一個嘗試解題係中國人，規則一「唔可以整花試卷」，佢冇試題都照寫野換言之犯左規（老實講，在場的話點會諗唔到呢點？）一開波就拜拜了。臨走前仲要喊晒口送多句廣東話「我唔想架」俾大家。潛台詞是，中國人都係愚蠢的，只識盲目做事唔識思考，仲要講廣東話添，仲唔係寸緊身在香港的你同我？
「相當無謂。特登搵個好樣的model做呢個超究極花瓶角色，都唔知為乜。」
順帶一提，八十分鐘考試時間過去，考場內「主角」之外剩低果位，係個大難不死的黑人。同八人中只有兩個反派，一個係白人，一個係亞洲人，其他歐美人士同黑人都是和平的。好多野真係出晒面。都唔夠結局咁政治不正確。承接「整個考試本是EQ試」一點，結局解釋其實係間製藥公司請人，所以用呢個心理測試搵出最會留意細節、最會關心其他人、最善良果個做公司職員，只可惜用一個最無道德方法試探出最道德者，的確只有搵戲黎做先做得出。亦按此劇情需要，睇晒成套戲，到最後見到最唔似會贏果個後而贏左，當堂灰晒，因為全個考試過程，每個人都有為解題付出過、努力過、比試過，但全部衰晒，唯獨冇乜做過野、冇乜幫過手、冇乜出過聲、直頭冇任何長處果個留低；八個考生，七個交代左背景、提到點解會搵呢份工、講最終目的係乜，得一個人完全冇交代任何野，你知邊個啦。解話係「噉證明佢最細心最善良」，實際上？教精你，醒，高調，有實力，進取，係冇用的，反而你唔多出聲唔多做野掩掩揚揚，得閒出黎抽抽水，即係你有事我咪呵下你同你傾幾句囉，但平時我咩都唔會做只會匿埋一二邊等你地爭餐死，等你班傻仔爭完我就出黎執雞，噉先上到位。電影中定義「呢種人先至係好人」，查實乜都收收埋埋唔俾人知，永遠唔直接參加競爭等所有事平定先出現，通常呢種人先野心機心最大呀。
「再次順帶一提：最後勝出者係 － 其實又唔多使特別講，皆因太過stereotype － 係個相貌才華皆平庸的金髮女郎。冇錯，而家呢一類片、呢種考試，九成最後都會俾女人贏，即使有其他更優越選擇。某程度上，反映左現實。」
全套戲最唔得我心正是此。競爭性電影其中一種最失敗結局，係結局留低勝出果個，係最唔似之餘大家覺得最唔應該係佢果個，用《Cube》頭兩集做例子，第一集死剩個白痴仔，不過係全隊人真心犧牲救佢，你會為佢喝采；第二集女主角背負任務過關最後走甩，全靠自己。睇番《血聘》，既非任何原因獲其他人成全或值得被成全，為自己為他人所作努力亦微乎其微，見到佢贏唔係因為勁，只因鬼鼠，只因其他人戇居，睇完不禁爆句「唔Ｘ係卦」。考試戲、困局戲、競逐戲等等，最驟忌就係呢種難以服眾之反高潮結局。
雖冇乜突破編劇亦有點失望，都有可取之處，如此獨立製作，情景及角色限制亦大，導演同分鏡仍見功力，而且全套戲除左黑人考官認得，其他全部演員冇個識，但演技比想像中出色，幾個主要角色交足晒戲對白又度得好，幫套戲拉番唔少印象分，因為睇過好多低成本戲獨立戲，劇本拍攝唔差，往往就係演員唔識做戲搞到淡晒。同類電影中，《血聘》算較為完整一套，或者因為最貼近現實，加上講搵工、爭高薪厚職爭上位，總比失驚無神俾人捉入恐懼鬥室之類「半個鐘你唔斬晒自己手腳你就死」之類更有共鳴。一套欣賞其特色同誠意，多於實際質素之電影。但好難講第時電影公司仲夠唔夠膽買多ｄ呢類戲，因為我覺得實大把人小同話悶。