唔記得睇《蒸發密令》係中四定中五，當年唔識睇戲，但撞正（翻版）VCD當道，去人地屋企見到拎左去睇，最少睇左兩次。之後耐唔耐明殊930 (R.I.P.)或者其他頻道爛片台重播，次次撞到都睇，電影遭外購劇排擠後，久違了的明珠台終於揀個禮拜六晚再播，懷念明珠930，又睇。套戲分分鐘睇左十次都有。

「好好睇咩？」
「唔算。」
「噉你又睇？」
「撞到嘛。」

一向鍾意睇亞諾舒華辛力加主演之動作片，外型同功夫紮實之餘，荷里活大隻佬中佢係具演技一個，加上八九十年代動作片因為未有CG，全部玩硬橋硬馬真功夫，以大量動作同驚人特技壓場（驚人在真係演員有血有肉地落場，唔係靠電腦加工扮驚險或者做排場，同睇完訝異完唔知點樣完成到個鏡頭），同編劇真係可以做到高潮一浪接一浪，例子除《Eraser》仲有《Die Hard》系列（Bruce Willis拍到第四集五張幾都自己落場搏命值得尊敬），同正正《蒸發密令》之前套《真實謊言》（又係亞諾舒華辛力加又係差唔多睇過十次），就係唔知點解而家科技進步左，無論動作設計還是編劇反而呈倒退。佢拍動作片居多，當中戲路都慢慢轉變，八幾年《Terminator》、《Predator》、《Commando》成到名搵到食之後，踏入九零年開始嘗試加少少溫情，同做到阿諾特色動作喜劇（佢出演之電影有一份得佢表達到之幽默感，所以我鍾意佢多於其他大隻佬例如史泰龍），唔只一味打，跟住拍打戲拍到做埋加州州長，非常圓滿的人生。《蒸發密令》係佢中後期（九幾中）出品，亦即大家開始睇呢類戲睇到飽晒厭晒，同開始進入電腦特技時代之作，唔算非常出名或成功。你見劉Sir睇戲，出名、經典同好片唔多，一係睇爛片，一係睇有重要性或開創性之電影，《蒸發密令》就係，如果你同我一樣係九十年代PC game迷、第一身射擊迷兼美國／荷里活（商業）電影迷，或者會明白箇中原因。

劇情簡單過簡單：主角係保護證人組要員，刪除個人資料同過去令證人人間蒸發（故謂之eraser），最新保護對象係掌握軍事秘密女證人，當中涉及政府內部人員計劃輸出高科技軍火俾海外恐怖份子，其後發現主謀竟然係主角師傅，主角並屈作嫌疑犯同女證人一齊被追殺，最後少不免係噉爆炸打一大輪邪不能勝正完場順便宣揚一下大美國主義，典型荷里活high concept電影。當然劇情唔係重點（已經比唔少打戲通順同豐富好在），場面先係。除左大量肉搏槍戰（但有趣地，打得越激射得越多槍越少血），全套戲最大賣點唔係打戲，係跳飛機。中段一幕主角為逃避追捕超高空跳出飛機，凌空接過降幅傘後得而復失再直衝落地，幾個鏡頭跟住佢俯衝半個字，真真正正感受到驚險刺激，跟住果場入動物園打，有鱷魚fatality，場景度得好唔係一味飛車槍戰。點解成日話廿一世紀動作片，即使特技CG能夠令任何虛幻成真，演員功夫底子好左再搵埋香港武指撐場，都及唔上八九十年代？就係差在呢份「有血有肉」同心思。睇得多，你會發覺每套著名old-school荷里活動作片，總有一至兩個非打戲之驚人特技令你印象深刻而記得套戲，每次提起套戲自然會講起某個鏡頭；新電影上天下海大堆頭大陣仗通通齊備，就係差在過於濫用特技場面，整體欠缺突出之處，同咩都得咩都可以，就係主角唔會身陷險境九死一生，同好多「特技」得一剎那唔夠深刻。又唔係而家演員條命妗貴過以前？所以接近零電腦反當道而行之《Die Hard 4.0》極討我歡心。

但更大吸引力，係作為發展中心之高科技軍火railgun，亦係全片唯一電腦特技。
「甚麼是railgun？」
railgun中文譯名叫軌道炮（因為太難打，我叫番railgun算，易打＆懶），利用電磁場推動金屬彈頭至近極速發射，現時仍屬測試階段之概念兵器。聽落都覺未來，同似炮台或置艦級數之巨型兵器，電影中之railgun係重型步槍版本，發射後彈頭超速前進時磨擦空氣留低白煙軌跡，破壞力同穿透力相當驚人幾近無堅不摧，最特別係透視視鏡中綠色視角可以睇穿牆壁同障礙物（當然，「障礙物」唔包括主角匿係後面果舊），生物入鏡時會似X光效果睇到骨架（但內臟只睇到心臟唔知點解），係終極步兵兵器。最後一場主角俾幾十人圍攻，就係拎住兩枝railgun一個人爆晒全場，哨兵台同吉普車都係一炮搞掂 － 係我都知在場百幾枝槍對住佢居然一粒彈都射佢唔中再任佢魚肉係好吹脹，喂荷里活片係噉架啦，我知戇居但更重要係
「型到爆呀！」
設定歷久常新，就算十年後而家睇番仍然好前衛好有時代感。《Eraser》令我認識到railgun呢個concept，亦係由《Eraser》開始，railgun成為戲同game常見武器，有冇睇《黑俠》？李連杰做的第一集，唔係廢片第二集，壓軸戰最後大佬出場時先用railgun狙擊黑俠，雖然枝railgun係同之前出過場的某枝機槍一模一樣。電腦遊戲 － （即時）戰略同第一身射擊為主 － railgun尤其受歡迎，好似《Eraser》上畫一年後隻Shadow Warrior（仍然係我最愛第一身射擊遊戲之一，因為隻game勁白痴同多血仲有首笑爆hip-hop主題曲，但超難玩），個唔知點解叫老黃的日本忍者都要拎枝railgun出黎射射射，整得靚之餘更欣賞設計組開宗明義講到明係「向亞諾舒華辛力加同《Eraser》致敬」。再跟住C&C2最強之突擊兵同陸行要塞都係，而電腦遊戲中railgun往往屬於高階兵器，攻擊力超強之餘射程中所有目標通通不能幸免，好似C&C2陸行要塞版railgun就係強得過份，射程遠時全隻game接近所有建築物同地面單位捱唔過佢一炮，對得準一發殺佢五六隻敵人都得，勁到黐線+爽到暈。每次打機用railgun都令我諗番起《Eraser》，亦係railgun神功特技、跳飛機同鱷魚fatality，次次撞到都睇，一睇再睇。

「所以特技唔需要做得多，當你設計得好，少少簡單已經夠令人記住你一再回味。現今荷里活當應向此借鏡。」