唔夠一個禮拜之前，成班人上黎TRHK排排坐睇《The Machine Girl》，睇到連門口都聚集左大量觀眾，金融海嘯後皆旺商場冇幾可出現過如此盛況及人流，臨床試驗證實想吸引客人，舖頭內播cult片or柒片成效最大。為再度刺激顧客及資金流動，推動皆旺區經濟發展，決定搞多鑊cult片同歡，既《The Machine Girl》香港算藉藉無名都能夠吸引到咁多人圍觀，今次出到香港cult片帝王《伊波拉病毒》，今晚仲唔引晒全旺角區上黎皆旺人山人海？
冇一個人睇完套戲唔係怒笑或怒小，一講香港cult片，十個人九個第一件事即撻佢出黎，不過之前我完全未睇過，所以以前人人話套戲王晶出品，今日至知佢只做監製，導演係香港名導邱禮濤。就知大鑊了。皆因邱禮濤最著名就係同黃秋生合作加造就香港史上第一個三級影帝之《人肉叉燒包》，另拍過大量電影，題材及戲路勁多元化而且商業又得獨立又得，好多大家睇過甚至已達本地近代經典級數，唔講冇乜野一講就會「嘩乜原來呢套戲佢拍架？」但個人對邱禮濤認識來自音樂方面多於電影：除左拍戲夠cult，仲出名係超級band友，94年魔岩三傑加唐朝黎香港紅館開過show － 冇寫錯，的而且確大陸殿堂級樂隊結盟上紅館開rock show，仲要係張炬臨終前全盛期唐朝，場演唱會被邱禮濤拍低成《搖滾中國樂勢力》，不過我只睇過LD片段冇緣睇晒成場，VCD同DVD都唔使旨意會有出過喇，如此紅館rock show相信可一不可再，主辦單位自己都覺得出碟都晒九氣。除左拍戲，甚至出過音樂散文集《大搖大擺》，圖書館我睇過架，而當一個藝術工作者可以活得咁搖滾、rock得起，我就認定佢一定有料到必撐佢，《伊波拉病毒》再遇著王晶監製，就肯定正野正頭metal了。最正軒爺班到隻「法國版」返黎，抵死在「法國版」封面似足《28日後》海報／封面。
「港產片都要法國版？有乜分別？」
「法國電影有文藝氣息嘛！你拎住隻法國版，唔覺得自己高檔左咩？」
單頭五分鐘，已經後悔自己遲左睇，問自己點解唔早ｄ睇呢套戲。開場講黃秋生勾二嫂，唔使十秒鐘已經有野睇（有咩睇？自己想像），點知撞到大佬返黎就殺晒佢全家，大家睇完周星馳都知摺凳係七武器之首，但邱禮濤講你聽摺檯係七武器之神，摺檯殺人見識過未先？殺到黐線標晒血，仲要唔係《The Machine Girl》流過特攝片明拍到假種（扮）低成本製作，而白入紅出成攤血水噴出黎勁真實，加埋所有角色嚴重市井句句對白粗口流利，一面殺一面標血一面爆粗，五分鐘已震撼過晒我睇過任何一套港產片。片頭黎咋喎！正戲你話點算！
過左片頭套戲主要分四節，抵死在個個部份唔同氣氛又串得埋喎。話說黃秋生殺晒大佬全家後著草到南非，非常奇趣地加左段實地拍攝非洲歷奇劇情，屙尿撞到隻真老虎笑到你爆咀，入到森林仲有土著，全身化正宗屍妝再殺雞灑血作法超級black metal，而感染伊波拉病毒途徑唔睇絕對估佢唔到，笑到你仆街難怪套戲cult爆。跟住梗預左所謂「一千萬人中先得一個」之免疫者就係佢，殺死老闆全家將病菌傳晒俾成個鎮，就拎住老細副身家著草返香港，講完回港荒淫無道生活加繼續累街坊，結局正路同周華健督察攤牌。老實講，我覺得導演想正正經經拍套戲，但實在忍唔住成品太好笑，黃秋生一個已經冇得頂啦，《人肉叉燒包》個角色係癲佬的話，《伊波拉病毒》就係傻佬，都係心理變態但黑色幽默得多，從頭到尾百分百真情流露，甚至唔使演，單你望到佢個樣已經覺得入型入格，絕對係香港史上最佳演員之一。但比其他「最佳」更佳，係冇幾多人敢學佢唔要面子放下身段去演活到絕對唔係好人但作奸犯科大家又會同情佢之不正不邪悲劇人物 － 可能你問番佢，佢會話根本冇放下過佢本身就係噉，戲入面只係做番自己平常一面。睇佢做戲邪門得黎又好鬼好笑，香港地只此一家、空前絕後。
雖然由頭帶到尾，並唔係只得佢一個，戲中角色男者粗魯女者淫蕩（「正派」角色除外），不論大細性別老幼個個粗口橫飛，尤其做黃秋生老細個羅莽爆粗爆得仲勁過佢，假如黃秋生對白粗口出現機率係70%，羅莽係90%以上，甚至隨便捉個路人三句唔埋小狗懶擦鞋任擇其一，更多失驚無神你最估佢唔到的時候無端端飛句粗口埋黎笑到你反肚，套戲cult得有道理架！就連字幕都抵死過人，我鍾意套戲洋人話洋話，唔似而家好興無端白事又要幫外國人配中文，而且戲中人好鬼好個個爛口到喊，英文粗口來來去去非fuck即shit冇中文五字咁多變化，難得字幕組有創意，除左全廣東話（市井至《伊波拉病毒》仲要書面語出字幕，咪仲戇鳩過套戲？），英文粗口一時照原文出之餘夾得好笑，一係自己譯做中文，簡簡單單一個shit字可以變成陷家產，有動感同迫力幾多！睇完套戲，立即感受到廣東粗口幾咁偉大！全套戲九成對白值得sample黎做電話鈴聲，單一句黃秋生大大聲
「恰鳩我？？」
搭緊地鐵時電話突然爆呢句出黎，都咪話唔正！不過最想sample係黃秋生對伊波拉病毒的天譴論解，真係好撚有道理喎！根本就係grindcore sampling！點睇都覺得套戲根本冇劇本，導演落場同演員講「今場戲講乜乜乜，對白你地自由發揮啦！」由班演員鍾意點玩就點玩，唔係噉冇可能咁自然咁流暢咁cult。場面更多笑位，荒謬荒誕橋段及對話數之不盡，大幽默中又有小幽默，留心好多細節，導演成日玩野搞笑，好似南非佬講中文之餘鬧人唔識聽中文，同最經典鏡頭由黃秋生個口出發影佢口入面病菌飄黎飄去再吹入人地口鼻，實在柒到冇人信。最柒梗係套戲除暴力加送大量色情，基本上除左「正派」幾位女角，冇幾多女性角色冇除過衫／冇俾黃秋生搞過，一直到最後鬥差佬之前，全程見女就搞連土人都搞埋，都唔知黃秋生係咪有份做編劇，定還是佢同邱禮濤好鬼老友所以導演明益佢，就連羅莽都有得搞番場。
「《色戒》ｄ特技床戲好勁？睇左《伊波拉病毒》，你就知李安都係受邱禮濤啟發咋！」
全香港粗口爛舌加黃秋生逢女就搞令套戲cult上加cult，不過原來焦點、伊波拉病毒同見人就殺血腥暴力，即使拍得凌厲，拍埋卻有點相形見絀。摺檯殺人、用門夾斷頭呢ｄ指定動作實有啦，重點場面之一係中間殺左餐館老闆一家再電鋸分屍整人肉漢堡包，呢野所謂「非洲叉燒包」之人肉漢堡包擺明tribute番自己，不過唔夠時間拍、cut左、定廢事重覆？整包果度去得太多，鋸幾野睇隻手飛走左再成檯血，下個鏡頭已經大兜骨頭加整好晒，冇乜癮喎。另有ｄ位硬係覺得少少cut左，好似門夾斷頭，夾到斷果一刻無端端跳左，就去到下一幕黃秋生講句「斷左喎。」cut得好明顯，是否「法國版」緣故？可惜呀，因為相信大量精彩場面被剪得好犀利，睇殺人爆血雖cut左還剩有餘，但真正露骨只得一場解剖死屍，直頭可以拎黎做fan-made CARCASS MV。怕你唔夠，其中兩幕又係可以sample黎做death metal/grindcore MV：南非第一場戲，已經有黃秋生中餐館怒斬田雞斬到支離破碎，過多半套戲，有幕勁無聊連搭的士過場都要整幕的士碌死老鼠，一車碌過連碾兩野果隻，係呢ｄ場面擺到明無聊，但唔加又唔夠cult喎！雖然cult cult聲，唔好諗住套戲係普通白痴戲，即使套戲點睇都似，睇完發覺套戲都幾認真，由最初到中間賣血腥殺人，一小段探險歷奇有點怪異，返到香港賣荒誕賣恐慌，臨尾同警察對峙變成緊張，通通合情合理加順理成章，而且各段氣氛唔同而起承轉合得到，邊個話cult片劇情一定戇居或亂咁黎？《伊波拉病毒》肯定係劇本最完整cult片之一。唔知係咪王晶監製影響，就算故事大綱行貨，好多出奇不意情節令全套戲一路睇完全唔老土，好似臨尾女主角街頭追黃秋生，你實預左追入後巷之後唔見左人，但入到去遇著兩個基佬撞破左佢地好事再換黎連串粗口笑到仆街，就係靠好多呢ｄ估佢唔到王晶式細節，普通橋段就變得好唔一樣，同cult上加cult；如果同一條橋用於另一套戲例如某王晶電影，睇完唔會覺有乜特別又或好似好爛，《伊波拉病毒》一開始已經做到自己咁脫離正軌，呢ｄ橋反而幫到佢錦上添花。另外鍾如最後正派全部死晒，例牌陷家產生還者即一開波大佬個女同「英雄」周華健督察兩個都中左毒，正呀睇戲有幾可會正派全軍覆沒咁堅呀！不過女主角又會咁蹺撞得番殺陷家仇人就搵戲黎做左少少，而且佢個角色佢條線完全刪除，都唔會對故事有任何影響，純為加番個好樣女演員落去的商業考量，另似乎唔知個故事應該點收場，就整左個無可再open的open ending，不過不足以削弱套戲魅力。導演功力其實好高，只不過演員太搶，搭著黃秋生仲要係影帝黃金期的佢，邊個得閒睇實劇情？齋羅莽已經夠笑死你啦！戲中有一定反思深度，好似黃秋生個角色係咪真係邪惡，做壞事係自己想做定其他人迫成？同你見到佢，就同見到萬千個日日撞口撞鼻黑口黑面乜都嘈一餐怨一餐有事時你有問題唔係我有問題的香港人，黃秋生個角色某程度上影射左香港社會，但你會諗到咁深入嘛？都係志在睇佢講粗口斬死人起雙飛最後拎住菜刀跑街係噉吐口水噴血傳毒俾人笑餐飽嗟！
抽水係電影慣常傳統，時事脈搏都係一股潮流，九幾年非洲爆發伊波拉疫症，立即勁多病毒戲，好似今晚睇《伊波拉》DVD冇幾耐前，有晚明珠930就做左又係九十年代中出又係講小鎮爆發致命病毒之《Outbreak》，但睇過咁多病毒戲，正正經經人文學術的《Outbreak》好、賣文藝倫理的《28Ｘ後》或《I Am Legend》好、掛羊頭賣狗肉的《Doomsday》好，《伊波拉病毒》無雙無敵，而且劇情實際上唔太著重病毒而以演員作重心，娛樂性豐富得黎，認真研究又確有其反映社會同人性之深度。個半鐘過去，讚嘆萬番，不愧為香港香港cult片之霸，同「前傳」《人肉叉燒包》比，《人肉叉燒包》陰森恐怖（相信係氣氛最不安港產片之一），《伊波拉病毒》就成套笑版《人肉叉燒包》噉。想知乜野叫cult片，睇睇呢套本地代表作就知，直頭可以當教材：低成本製作（雖以港產片標準，有半套戲飛到南非仲要深入深山野嶺拍攝，都唔算小本了）、嚴重荒謬甚至無聊、極度官能、超現實又或比現實更現實、大量離經叛道及反商業元素集合、完全不能以常理想理解、猜想、預期、內容可以全無深度喻意以至無目的方向可言，所以我只會叫《人肉叉燒包》做classic／「半cult」，《伊波拉病毒》先係cult，一部cult classic。噉做classic定做cult好？梗係做cult好啦，通常cult係俾人鬧出黎，而俾人小絕對開心過俾人讚，有得做cult點可以唔做？
我最愛香港電影出現了（再自問一次：「點解我唔會早ｄ搵黎睇？」），睇完已經唔需要再睇其他港產片（都需要的，例如邱導演其他戲），因為再冇一套戲可以咁露骨咁寫實帶出人性，同噉先似番真正的香港，而家所謂追求高檔追求藝術，太假太夢幻喇，養成新一代香港人只著重包裝，同令真正三級片埋沒。電影市場已經細、港產片已經冇人肯入場睇，邊有老細再夠薑投資呢種港產片？單有角色及得上黃秋生咁癲已經難，未論新一輩演員中冇一個夠班，單現今社會尺度同接受性遠低於以前，已經抹殺左香港cult片。記唔記得最初三級片整黎做乜？對政府同家長黎講，係杜絕靚仔入場睇鹹片同不良電影；對電影業界黎講，係一條新財路同新藝術發展路線，因為界線分明後，在三級領域中等同於有近無限大自由創作空間，進而衍生出呢類地下經典、邪中之霸，而家ｄ三級片拍埋，已經失去真正三級意義。唔知有幾多人記得珠江戲院，座落馬頭圍、曾因是全港數一數二大規模及左派思想揚名之名戲院，我正正住珠江附近，《人肉叉燒包》之後連串抽水《人肉ＸＸＸ》電影出爐，好記得當年有套《人肉天婦羅》，手繪油畫電影廣告畫左對人手天婦羅（噢，原來《The Machine Girl》幕天婦羅炸手都係抄港產片！），大大個成街都睇到不知幾型，而家ｄ電影廣告邊有可能噉樣出街法？分分鐘俾人投訴到執笠。果個年代連港台節目都可以大模斯樣講粗口，而家連《性本善》都可以有人投訴直情唔播（得），試問社會態度逆發展保守成噉，港台都冇野好玩，《人肉叉燒包》時已衰落之港產片仲可以拍到乜出黎？而家ｄ三級片，事實上又有幾三級？《伊波拉病毒》絕響性質，又是令其進入cult殿堂原因之一。
後記，有三。《伊波拉病毒》娛樂性同搞笑力永恆，無論睇多幾多次依然咁好笑，好笑到我睇完套戲第二日返工，公司做緊野時諗番起立即笑，隔籬位師奶仲問我笑乜，差少少想推介佢睇，仲要陷家大細搵埋老公仔女一齊睇先夠癮。
二者，話說從事影音業的176，某日佢同事帶左隻碟上舖頭「試機」，邊隻唔使再講啦，播左半個鐘立即俾老細狂屌。笑爆咀。
三者，軟件白痴的我，正研究緊將隻DVD轉落電腦，再將戲中全部精句sample出黎，整番個《伊波拉鈴聲》特集。相信全部電話鈴聲檔案夾埋，會超過半個鐘長。重點，梗係而家大家online立即互爆的
「恰鳩我？？」