最初知道套戲，見係英國病毒片，覺得似《廿八＿後》。
知道劇情之後，覺得似《I Am Legend》。
睇埋預告片，頭半似《異形》，後半似《Mad Max》加《Escape from...》系列，仲有少少《Bio Hazard》feel。
上畫時，導演整左個list出黎，話邊幾套戲啟發到佢拍《Doomsday》，同幾套佢覺得概念上大家相近的電影，可以視為睇《Doomsday》前的「watching list」，當中當然有《Mad Max》系列加《Escape from...》。請恕小弟膚淺，除左呢兩個經典暴力電影系列，其他大多未睇過甚至未聽過，始終我唔係專家。因為劇情性質非常相近的《I Am Legend》冇幾耐（都大半年前）上左畫，單劇情簡介唔覺有大分別，加上《廿八》呢個成功個案在前（只限《日》，《週》出軌了），初頭冇諗過入場，但睇到預告片相當精彩，唔係劇情片而係動作片適合唔用腦的我，加上拍攝手法十分old-school，女主角型格又吸引，
「得！磅水！」
劇情，厭其煩都提多提，雖三幅被：愛爾蘭爆發不治瘟疫，拯救無效下全國被圍牆封鎖，愛爾蘭消失世上。廿幾年後，倫敦再次爆發疫症，而愛爾蘭被發現有生還者，主角女特攻被選中入災區搜索生還者製作疫苗，過程中少不免打到七彩，套戲三級架大佬。我講之前，先聽聽R7HK專講囡囡的客席主持176嚮導，同大家分享佢朋友睇《Doomsday》的經驗：
「睇完預告片，打喪屍打到爆晒肛喎，我朋友立即買飛入場，點知睇左半個鐘，一條喪屍都冇，淨係見到人扮喪屍，佢接受唔到套戲冇喪屍，睇左半個鐘就走左！」
我初頭都以為打喪屍，俾頭先提過幾套病毒喪屍教壞左。但最大分別係，《Doomsday》病毒係真正奪命果隻，中左招會死而唔係變種。我非常欣賞由序入正題簡單直接易明慳時間，頭三份一進入死城蘇格蘭，之後發現世界上沒有喪屍，只有人類，解釋係病毒屬不治之症，最後死剩班人類係免疫者。噉都好ｄ，唔係另一套《I Am Legend》。區內人類分成兩股勢力，一班係無政府無道德punk友，暴力大晒弱肉強食！punk格野人造型同文化，擺明取材自《Mad Max》＆《Escape from...》，分分鐘《北斗之拳》都有份（《北斗之拳》又何嘗唔係向當年呢ｄ經典電影借鏡呢），仲好鬼metal。「punk政制」進化到盡頭，相信同電影中描寫差唔多，有理由相信，單此部份昆到(HK) punk友入場。真係好MK架。
但最抵死係另一派。一班死剩種要做皇帝，另一班避世隱居，倒退回中世紀時代，預告片好似冇乜出現過喎呢派，所以睇見戲入面頭半咁punk，隔個字突然有班騎士走出黎玩晒刀劍射晒箭，連城堡都出埋玩埋鬥獸場式對決，有ｄ新意喎！但呢部份篇幅好短，尤其對比之前野人果段咁仔細，成本高卦，同講睇，點都係一班punk友開晒槍開晒車好睇加合理過現代對古代啦，主角一開車，幾大隊騎兵都追唔到，玩晒，仲有乜好拍？
「但係噉樣先好玩喎！」
導演擺到明拍套戲為滿足自己多過你我，睇老戲睇上腦，自己想拍埋一份，又搵到老細掟夠錢出黎，就玩了。全套戲tribute意味非常重：城牆圍國、牆內無法無天、全部人勁punk勁暴力，末世反政府意識強烈，全部係當年經典電影皇道（甚至係thrash metal的皇道！），就連主角都要係個獨眼反英雄，擺到明學足《Escape from...》主角Snake。
「玩Metal Gear的朋友們，知道咩事未？」
只不過覺得導演太過為自己開心而拍戲，好似入到城牆內，用好長時間講野人生活、睇佢地食人，描寫得咁仔細反而悶同長，之後中世紀現代古代衝突，除左一段主角同狂戰士對決，其他草草而過，而問題在於好多場面單著重片面，感受唔到取材自之經典原來份末世同亂世感覺。玩tribute玩得太多太大喇導演。
但玩old-school對老餅黎講好處多於壞處，特別係動作場面，你幾耐未睇過有新荷里活動作片上畫，唔係以香港武指作賣點？睇得太多，而家《Doomsday》玩番大開大合唔多花巧冇威也飛天冇CG的八幾美國打鬥，埋身冇咩招式可言先鬥槍後成村人互毆爛仔交，睇太多港式動作片，係時候中和番下，不過套戲叫做三級，除左食人叫最恐怖，我嫌唔夠多血／死／爆／斷。另一好睇係果個年代最興的大陣仗橋段，女主角成日危機中諗屎橋搏命，最後當然搏得到啦，呢種絕地逢生同死爆爛爆驚險場面，係以前動作片好睇之處，而家ｄ戲就係一味死打，唔記得左緊張刺激呢樣野，只係導演可能要玩攝影風格，不論平時講野定動作場面，好鍾意幾個鏡頭間飛黎飛去，可惜唔係次次飛得好，間中亂到你唔知乜。要小的都有，就係連好多舊世代cliche都保留埋：故事中病毒出現至主要劇情之間相隔近三十年，主角搵到架靚車，首先汽油仲未變質、仲開到車？架車仲要咁新淨咁靚一粒麈都冇？而且最後五份一套戲集中主角同punk友飛車追逐，玩公路戰自然會話班人飛身跳上主角架車，即係本來車追車幾十個急彎追到上埋山，點知一有人跳左上主角架車，立即入到大直路唔睇實架車都唔會出左路面or炒or撞？預告片都睇到有幕係成架車飛起撞穿部巴士，居然俾人地十幾部車追加撞，最後巴士都撞爆埋，主角架車乜事都冇花痕都冇條？
「這些cliche，或者都係tribute的一部份？」
但整體我幾滿意，一向好鍾意呢種北斗之拳式無法紀末世觀，主角最後殺左大佬自己做皇后個結局最正，《Doomsday》正正係'80 heavy metal － 要特別註明係thrash metal － 的世界同精神。即係如果連soundtrack都可以多ｄmetal野就好，而家連配樂都要玩老土交響，衰在真係好老土，係失敗之處。同《LXG》、《Eraser》等一樣，又係睇電視撞到、知道電視會做，必重溫。
「只係有樣野，睇晒套戲都唔明。一百萬蚊題目：個戲名關套戲咩事？」