近來好多應節電影。你可以估到撞正保釣熱潮最高漲時上的《精武風雲》，本來已註定全國大收，而家分分鐘唔使自己特登宣傳都自動賺多一倍。半個月前上水有部電梯急降，跟住話有套戲叫《升降凶間》玩電梯驚嚇，情況同之前講失心瘋病毒之《瘋殺禁區》上畫前夕撞正有個靚仔無端白事發癲斬死自己老母一樣，多左免費的禁忌宣傳。不過應該幫唔到多少。因為套戲拉到馬蘭身上，而佢個朵已經太臭了。
原來唔覺唔覺，我差唔多追晒佢全線，最後一套睇佢係《The Happening》，當中講左對佢舊作感想呢度唔重頭，較新一套《The Last Airbender》（中文名太柒了我唔想提），老實講原著動畫只睇過少少但印象唔差，一出已經改左中文名《降世神通》，因為係套鬼佬創作的中國武俠小說式武打動畫，講世界分四個國度各控制地風水火一種元素，奇在畫面、動作設計同故事居然唔會怪雞仲幾OK（雖然四大元素呢種設定似AD&D多過武俠小說），重點是全名其實叫《Avatar: The Last Airbender》。動畫早過金馬倫套戲幾年，但金馬倫出名大晒，佢套戲上話時知道部動畫都會拍真人版加同年上畫，立即壓人地「我套戲叫《Avatar》所以你唔可以」，結果明明早過人地作，自己套戲反而唔用得全名，再加諷刺是金馬倫套戲個Avatar標誌，我硬係覺得同套動畫Avatar個字好似。冇睇《The Last Airbender》唔係因為冇《Avatar》個字（問心，《阿凡達》冇晒技術包裝，整體比「一般」、「平平無奇」層次高得了多少？平時一套大製作我會入戲院睇兩次，呢套睇一次就夠晒數冇咩稀罕了），trailer都唔差的人設我亦接受，實在太多人小喇，對上《The Happening》海報仲好睇過套戲更加失望，加上3D令我反感，現今立體電影技術根本未成熟，只跟前多邊形仲玩緊2D sprite時代的街機光線槍射擊之彷／偽立體2.5D系統如出一轍，同陳年缺點都未克服到就話係新科技，點令人信服？套戲加3D個字立即收貴半張飛，黎緊仲話要自己買／帶立體眼鏡，近來有幾套戲想入場，如《Bio HazardResident Evil》同《Blade》一樣好但第三集勁唔掂，想好頭好尾有心入場支持，都因3D之掠水藉口放棄。
心諗條友連續咁多套仆直應該快收檔了，點知話咁快又有套《Devil》。始終對佢有份情意結，點唔情願都要搵ｄ理由令自己入場。好在唔少。首先，原來今套馬蘭只做監製，難怪同《The Last Airbender》檔期咁接近，知唔係做老本行導演，當堂抒懷了一點（你話幾灰，已經對佢失信心到噉）。前提同trailer亦唔差。最最最重要，又係懶cult的high concept戲，正如《血聘》 佈到個局懶懸疑呢ｄ實睇啦。同埋，冇3D。（．．．）
「想搵樣野夾硬要我唔入場，唔係冇：大佬，套戲英文名會唔會簡單得滯？中文名又太港式求祈夾戇居。唔係好彩睇到trailer，齋望到中英戲名，我只會當成又一套白痴戲理都廢事理馬蘭都冇面俾。」
但原來個名有典故的。全套戲緣於一個唔知宗教定聖經定民謠定寓言故事：好簡單，做壞事，會有天收，正確黎講係魔鬼，只要你做壞事，魔鬼就會黎折磨你一輪再整死你，邊個咁唔好彩佢佢玩死緊人時插手同樣會慘死。套戲就係用摩登情景演譯呢個古老故事。五個人坐電梯，點知電梯死左，跟住隔一陣死一個人，警察到場再搵消防救人，最後五個死剩一個，真相大白發現電梯入面偷呃拐騙傷人殺人所以死有餘辜，加原來睇落冇關係的主要角色原來同全宗命案大有關係。幾似《死神來了》，又係時辰到點走都走唔甩的主旨，但分別在《死神來了》擺明係扮有哲學格調的商業娛樂電影，大家入場只為睇佢點死唔應該理劇本點唔掂法，《升降凶間》則走番嚴肅路線，亦好在未流於《死神來了》之類咁流。事前冇諗過交得足貨，令我有而家咁滿意。
當主題是「魔鬼與我們同行」同「罪人必得報應」時，你可以預期劇情無任何常理可言，始終只為睇點解要死，同電梯入面邊個係魔鬼。只係部份情節有點過度故弄玄虛或虎頭蛇尾，好似一開始跳樓，咁巧合跳時成條街冇人，唯一在場果個又睇唔到聽唔到，跳左落車頂跟住架車又會自己開走去第二度，從而將幾條街以外唔關事的主角差佬引到現場，未免太神化了。電梯入面第一次出事係黑晒之後靚女背脊俾野咬，再加怪物爬行聲，整到好似好勁好邪以為真係有妖魔鬼怪，點知後來冇左怪物件事，只為加落預告片等你以為好堅料，查實每次死人都係電梯突然黑晒，著番燈已經死左件（除左第一次熄燈靚女只俾野咬左啖唔使死，加佢係最後死果個，證明靚的確是有著數的），仲要死相只得割喉斷頸之類基本動作，怪物食人等等唔好意思是冇的。而且班人幾戇居，點解咁多次停電熄燈，冇個諗到可以用電話照明，最醒果個實Ｑ用火柴（．．．），到最後差唔多全部人死晒加差佬提先用手機當電筒？戲入面間接解畫是次次一有人以電話作光源就會死人，換言之唔「順其自然」只有死得更快，但戲中人又點會知呢樣野？而成個格局似魔鬼想迫幾個人歇斯底里繼而自相殘殺，噉先係折磨到死嘛，但每次你大我我大你臨到埋牙之際，熄燈，開番，就死左件了。最後開估誰是魔鬼亦全無驚喜。如果以《死神來了》心態入場，肯定會非常失望。
死亡場面如此隱誨、暴力格局如此收歛，我會推論成為左完整帶出主題。魔鬼搵你，一個目的係要你認錯、要面對同承擔責任，而電梯入面每個人本身都有罪，每次有人死，熄燈之前果個人都有傷害電梯內其他人之企圖，可以話魔鬼俾足晒機會你，去到呢個地步你仲未肯認錯仲想害人，所以要死。當然如此假設是相當戇居，任何人身處同一個處境只會覺得撞鬼，邊可能聯想得到撞鬼之餘隻鬼係要大家讖悔承認自己曾經做錯先唔使死？只有最後一個「大奸角」識噉做，其他人擺明俾魔鬼做死，跟住四（三？）屍拱照下魔鬼現身佢先醒覺要認錯，才能免於一死。跟住老婆仔女幾年前俾佢車死果個差佬見佢認罪肯原諒佢，亦是全套戲主題思想之一。但其實我更想睇係佢唔原諒條友殺左佢會點，魔鬼係咪又會蒲頭殺埋個差佬？更大謎團是，點先合乎被魔鬼睇中資格？睇番五位朋友處境，黑鬼實Ｑ鍾意打人、靚女專呃男人錢、西裝友傳銷式行騙、阿婆係扒手、剩番條友就係撞車差佬一家不顧而去，罪行輕重之距相當廣闊冇一個可根據定義，撞車撞死人要死我接受到，打荷包都要死？而且最後發現，罪行最輕果ｄ反而一定要死冇得走，最重果個魔鬼特登現身俾機會佢認罪唔使死（之前幾位時又唔現身？佢地真係死得唔抵呀），嘩咁灰，係咪變相鼓勵大家假使有日做錯左事（換言之，日日），反正大錯小錯都要（慘）死，不如傷天害理到盡死都死得抵ｄ？教壞細路呀真係。而最後差佬原諒仇人、全套戲結尾係「有魔鬼自然有上帝」，中間間唔中拉埋宗教落水，原來係套曲線曲線耶撚片，話俾大家知信者得救，你做錯野最緊要認、最緊要投入主的懷抱，唔係？仆街喇你魔鬼陣間就黎搵你。同埋千祈唔好多事，天要殺人時你唔小心行過都要死，唔係因為你有錯，只係因為你唔好彩，天要你死你就要死，無論點唔合理都係合理，你熟悉聖經故事都知道，好多時神靈殺人，可以因為無關痛癢之小事，或者人地有罪順便燒埋唔關事的你果疊，甚至完全無辜純粹佢覺得你需要死你就要死。只有唔好理其他人，人地有事都扮睇唔到只顧自己，再無時無刻重覆「我有罪上帝救我」，魔鬼就唔會搵你了。
「非常典型的耶教式激進靠嚇踢你入會格。而馬蘭除左做監製，故事都係佢寫。其實佢係咪想拍套黑色福音電影？」
「同，唔好而家噉成隻魔鬼實體化棟係度話『仆街喇你今鑊』，而用其他方法隱誨帶出魔鬼存在、使罪人明白認錯，可以立即高幾檔。出晒腸家陣。」
戲外仲有樣野唔太滿意。就係宣傳資料相當混亂。海報寫「五人被困六人受害七具屍體」之類，睇劇情簡介，「五個人有六條屍」見過「五個人得四條屍」又見過，「明明得五個人點知多左個」都見過，全部唔一致。但睇完套戲你發覺，綜合電梯內外所有人物，又個個講法都可以夾硬黎地講得通先吹脹。但有咁多唔同講法，並非公關部精明，明顯係佢地自己都唔太知套戲內情，最後錯極都兜得到，全靠套戲本身唔正常救左佢地。雖則一路鬧，整體我仍然是滿意的，可能因為今次馬蘭終於肯放手俾人（佢負責寫故仔，但唔知拍出黎個故仔同佢個原版差幾多，會唔會靠人幫佢大修一番先似而家見得人？），整個故事夠緊密冇乜悶場，八十分鐘算短但以此類故事黎講叫剛剛好，五個罪人每隔一輪先殺一個係明拖時間，但夾埋電梯外發展同其他枝節、回顧，八十分鐘長度即顯合適。我反而覺得衰在在intro。上下倒轉城市景是型的，可惜如之前提過，當《Inception》做過，就算採用同一個概念而非有心抄襲，都難免遭到比較／比下去。畫我冇問題，但配樂實在太誇。到而家仲認為最敗筆係片頭段誇到仆交響樂，旋律老土編曲沉悶之餘根本唔夾套戲氣氛。
「同埋，有個bug：因為路過而俾魔鬼老屈的電梯師傅，爬電梯槽時跌左落電梯頂跌死。但最後救人時，電梯頂好似唔見佢條屍？」
其實全套戲製作規模同格局，更接近電視電影或者直接出碟之類小品／獨立製作，睇攝影質素低下雜訊多到仆就知幾indie，可能就係咁indie，同令我諗番起無記經典恐怖單元劇系列《幻海奇情》（無記而家仲點會／點敢拍呢類劇集？所以收晒皮囉），自不然咁有好感，當B片頭A片尾級數睇，是十分唔錯的一套。而片頭一開始已經講到明，《Devil》只係《The Night Chronicles》三部曲第一部，仲要連製作組都叫The Night Chronicles Productions，睇黎馬蘭衰左咁多年，好有決心唔再俾人睇死。有時衰到貼地都有好處，就係只需要彈番起少少，人地已經覺得佢回勇進步紛紛正評。未知餘下兩部曲拍乜，有樣野就大家都知：唔想衰，好簡單，千祈唔好自己做番導演呀大佬。