第一次知道《血戰新世紀》，係睇《20世紀少年2》片頭trailer，之前對原著動漫完全冇認識，劇情同《Blade》相差無幾，賣點囡囡不算吸引，特技又奇怪（除左打機同睇日本動畫，你幾時見過斬死人條屍唔係噴血柱或血花，而一粒粒血飛出黎？），預告片氣氛夠暗武指亦唔差仲要相當血腥，加埋《臥虎藏龍》同《英雄》監製江志強搭于仁泰導演，而且「以魔制魔」題材向來頗有興趣，聽人講原著動畫仲非常好睇，就入場了。應該話，就俾人呃左了。
睇戲前，又要講講戲名啦。香港點改中文戲名我自己都講到cliche了。今期流行吸血僵屍片係《吸血新世紀》（其實個名好娘），再之前有套唔關僵屍事的《血戰》，既套戲又講僵屍又打到周街血，兩個拼埋就一個新戲名。叫得呢個名，就梗係要去新世紀廣場睇至應景啦。同一個題材太多人做過，鬼佬已經有《Blade》，所以故事唔講都知道：主角實係半人半吸血僵屍、實係有晒僵屍長處而唯一弱點係需要飲血（點解調番轉唔得呢？）、實要活在「要為人類家人報仇雪恨」劇情中、實係立志殺盡所有吸血僵屍（點解冇一個故仔混血主角會打算做壞人？）、實係講殺僵屍之餘又要飲人血感到矛盾、實係保護人類時人類因佢半僵屍身份持敵對態度唔領情、實係到最後發現原自己某個家人係僵屍係對頭人甚至做大佬。基本上前述所有《血戰新世紀》（同《Blade》）都發生晒。就同中文戲名一樣咁cliche。
既十套不離九套係噉，劇情完全行貨欠驚喜冇所謂，我當睇打戲算唔理故事就得，睇過trailer都知乜野係重點啦。點知坐低發現好難完全唔留意劇情，非常遺憾，令我諗番起一套我點都唔想再聯想到之電影、2009最垃圾外語片《龍珠》，兩套都係荷里活改編日本動漫。其實故事前提咁灰暗咁多弔詭，我諗原著會講多ｄ人性魔性衝突、不平衡心理卦，唔係動畫版唔會俾人一面倒讚好啦？當你乜都唔講齋打，都冇預過會拍成青春劇，兩個後生女坐埋講講友情之類咁戇居，預告片賣點係邪惡同黑暗，點解編劇咁鬼死陽光？同勁多橋段極度老土，估到晒果ｄ已經算寫得較好，有部份直頭嚴重白痴，根本唔應該在呢套戲，甚至唔應該在廿一世紀出現，你叫我點頂？最頂唔順係一如傳統，主角最後撞到已成僵屍元老之老母，與《Blade》異曲同工，老土唔係問題，難頂在點解身為日本人，阿媽要講英文？佢對白根本唔多，同戲入面唔少戲份係日文對話，點解反而兩個日本人之前講日文，大家會面反而變成講英文？而且佢英文根本唔多得勁難聽？
好在打戲尚算可觀，就係貪佢夠暴力加設計得好，預告片覺得正唔正先？可能你同我一樣，覺得正而想入場，就可以唔理套戲了。開頭我都諗住一定會打到仆晒街，點知全套戲所有武打場面，九成幾已經剪晒落預告片入面，剩番果一成唔夠錯過亦冇損失，總之最精彩場面集齊晒，而且仲好睇過套戲，因為入到戲院先發現貨不對辦。標晒血梗以為三級啦，買飛見到二級已經知大件事，打戲果然cut到飛起，就好似當年亞視播《北斗之拳》，影到佢出拳，下一個鏡頭已經係「贏左」，最想睇中間爆晒果段甚至條屍永遠冇得出鏡，噉睇黎有乜意思？最灰居然覆蓋層面廣闊得多之預告片會足本出街無刪剪，點解上畫反而剪咁多？可能本身劇本同畫面已經是個錯配：以香港保守標準計，唔少場面一定屬於三級，而劇情本身極其量只是二級，電影公司為票房剪到二級標準上畫，到頭來高不成低不就，冇場面冇劇情我不如睇番《Blade》，起碼大家都二級但暴力得多？而家連睇trailer都開心過入戲院睇，除左仲精彩多血過正場，仲唔需要睇好多頗為垃圾之劇情／場面，例如大陸級人馬打之前要變身，不過由人形變成超樣衰灰黑侏儒怪物，唔止個「真身」同僵屍完全冇關係，點計都係將自己降格唔變好過變，更同《龍珠》入面無端白事出現的雜魚幾近一樣，而當一套戲似《龍珠》，99.9%脫離唔到廢片命運。
好好彩，未至於強（弱？）到可以擊敗《龍珠》成為2009年最垃圾電影，不過都尾二了，僅贏在故事背景同武指，即使得唔到應有發揮仍夠支撐大局，《龍珠》入場一個字已經想走，《血戰新世紀》越後越喊起碼捱到去完場，但信我，你睇左預告片就夠晒，感受故事氣氛又好為睇打鬥流血又好。2009年過左一半，暫時廢片排行榜第一位《龍珠》（廢到我寫左一半都寫唔落去放棄）、第二位《血戰新世紀》、第三位《The Spirit》（其實都係靠鏡頭風格救番咋），相信好難再有戲爛得過佢地 － 港產片除外。太灰太唔開心，《血戰新世紀》血戰新世紀後無聊到煲番《Blade》全線，連最唔掂之第三集都好過佢，大家同樣漫畫改編棄深度走淺白路線，唔明點解可以相差成噉，唯有奉勸一句美國佬，千祈唔好再拎日本野黎搞，自己地方漫畫好地地，但日本文化非常唔同，你用西方角度去睇同講日本野，死得啦。
除左煲《Blade》，仲特登搵番《Blood》出黎。不同於《Blood: The Last Vampire》，此《Blood》係十幾年前九零中出品PC game，位列個人心目中'90四大2.5D射擊遊戲。兩者故事其實幾相近，都係講半人半鬼主角斬妖除魔打倒超自然邪惡勢力，不過作為第一身射擊自不然唔會同你講乜野劇情乜野深度，而擺到明扮B片扮cult片加玩寸大量經典恐怖電影，設計到勁超現實勁荒誕，我玩過咁多第一身射擊遊戲佢都算最異色之一。《Blood: The Last Vampire》拍埋《Blood》（甚至《Blade》），好易睇到美國佬同日本仔心態分別，同明白美國佬應該做乜：一味死爆死暴力或者死cult死on9，但唔好又想商業又想有內涵兩頭唔到岸。
「如果揀改編隻game而非動漫，會好玩好多。肯定冇而家咁白痴咁廢先。」