放工去左豪華睇《Battleship》（中文名太柒唔會叫），豪華星期二晚場三十蚊咋抵到爛啦，而且音響有進步了終於感覺到嘈，大家都係播AC/DC但之前睇《Iron Man 2》乜叉都聽唔到。初頭諗住，返到屋企十點半開明珠台睇《Falling Skies》會仲好睇，點知居然拍得幾好。估佢唔到係改編海戰棋，即係以前大家上堂用數學簿格仔紙畫幾架戰艦，大家講座標鬥快炸晒對方（雖然兩個人玩單靠講個信字，永遠只會話人地炸唔中），變左套戲居然真係複製到大家格仔上面盲摸摸互炸咁抵死 － 當《Doom》都可以整段第一身射擊咁戇居，仲有乜柒野唔會發生？有，臨尾玩到連戰艦都可以甩尾，導演係咪睇《Speed Racer》睇到上腦？

當然套戲其實真係好爛，好似主角「變身前」戇鳩得太刻意開竅後又無端端醒得不合情理，外星人可以飛半個宇宙黎到地球但科技咁低同策略低智到暈，加到頭來都要大美國到嘔（有進步了今次加埋日本仔一齊拯救世界，中國只負責派香港做代表俾外星人炸同執殘骸研究，其實係咪有政治暗喻？），睇特技同香港俾人炸段戲都抵的，以三十蚊計的話。香港有幸成為兩個受害城市之一，而且唔止得幾個鏡頭而拍足大段戲睇佢點俾人炸＆拍得唔錯，的確好正，即係你寧願香港好似戲入面噉仆街，都好過似而家個仆街法啦。