歷年黎冇乜入過戲院睇港產片，《少林足球》、《無間道》、《功夫》、《戲王之王》，（等等，）冇辦法，港產愛情片笑片胡鬧片又一向冇興趣因為編劇同演劇真係太容易俾人「廢」的錯覺（賣點係靚仔靚女偶像果ｄ情況更嚴重），所以除左幾個風格化之導演，真係冇乜動機睇廣產片，包括去戲院同買碟，電視播又撞到就一睇無妨。而《墨攻》係呢幾年冇乜幾套一上即決定要睇之港產片 － 假如呢套香港導演跨國演員內地製作電影都算係港產片的話。

會睇，因為睇晒《墨攻》漫畫，同因為少見之大製作中港電影，更難得係香港導演拍呢類史詩作，呢樣已經夠晒吸引力。通常漫畫改編電影冇乜好結果不論港外，又見套戲成／得兩個鐘，起初係有少少憂慮，結果，我俾四粒星。有睇漫畫會估到大概劇情，「邪派」攻城正派搵墨家傳人幫手守城之類，雖說改編，大部份同人物皆屬原創，同時成品當中攻防只係次要，其中之人常倫理德行道理先係重點主題，動作戲戰爭戲冇想像中咁多咁大規模，但長得黎而文戲多當中係膚淺的我覺得唔太覺得有悶場，只係有ｄ攻防橋段太含糊冇交代清楚，敵軍諗完一個戰術之後守城果邊好似已經立即知道晒佢地想做乜、想係邊個位攻過黎跟住輕鬆打贏敵軍，點樣計劃點樣識破都冇講到，做到劉德華個墨家使者角色好無敵，同我好想知道趙軍退兵之後佢走入人地空晒個軍營入面整左幾煲趙國菜係想做乜，由頭到尾都冇交代過原因同結果？

睇完會發覺阿叔級數人馬永遠最識做戲，最老果班就係全套戲最有戲味果班，同時香港演員同大陸／國外演員，真係仲差一段距離 － 劉德華唔係做得唔好，只係我一向唔多識欣賞劉德華做戲，但佢的確做得出到主角果種墨家使者感覺。雖然我對呢套戲印象好正面，但相信會有唔少人持相反意見，本住睇動作片／戰爭片心態黎睇一定失望，真正之打戲唔多，但極多的文戲個個人都講好好好好叉多野，對白仲要文皺皺夠悶死你，但我冇乜問題，因為一面睇一面思考到好多野。《墨攻》其中一個主題，係千祈唔好叻，當呢個世界平庸同埋羊群佔絕大多數時，有才只會招妒，然後無仇無怨都會俾人敵視排斥；同在世唔需要對人太好，因為呢個世界十個人有九個都係自私，做得第十個，就要預左俾另外九個謀害，而對呢其他人越好，其他人唔會領情只會嫌棄排擠得更深。有趣地，全中國最醒果個，唔係劉華，係個黑鬼（中國古裝片都有黑鬼問你死未？）。某程度上，呢套片意識同《英雄》好似。

好多人會覺得悶特別係睇慣荷里活式即食即棄的朋友，但我好欣賞，因為係絕對有心之作，同埋夠真。冇睇同期另外幾套以色掛帥之中國古裝，就係因為太靚，一靚就唔持久就犧牲左深度，《墨攻》你覺得係大製作，但演譯完全唔靚唔浮誇，又係我好鍾意果種真實做賣點，成套戲冇乜幾多個豪裝或者靚，用色構圖係咁多就係咁多冇乜多餘扮靚位，先夠接近。但唔鍾意ｄ演員係配音而唔係即場收音？空曠地區太難？仲有少少唔完美，就係太多偶像明星，革離本身係一個樣衰細粒老人但搵左劉德華做，反正係寫實，點解唔徹底ｄ直頭放棄所有具商業潛質之偶像級演員？（當然，負責俾錢的大老細會肯咩？）如果連女主角都減埋會更好。同埋始終覺得短，好多野冇解釋或解釋清楚，如果有足本導演版DVD必買。非常值得入戲院睇多次。

一喜一悲。喜，在香港導演拍出如此國際級大製作，初步印象已經俾呢（兩三）年所有我所識之大製作中國古裝片之初步印象好好多，因為真實同務實。悲，在係改編自日本漫畫。有冇發覺有樣野好有趣？日本人對中華歷史、思想同學說比中國人同特別香港人狂熱得多。例如三國，你會諗起乜？會諗起電腦果隻《三國誌》，會諗起《三國無雙》，會諗起幾套有關三國的漫畫，頂晒龍去到陳某。但數下數下，差唔多全部係日本出品唔係中／港／台作。中國人反而唔會追隨同珍惜自己本身之文化遺產，而由外國人發揚；中國學說同語言冇乜華人會留意同討論，反而日本甚至歐洲、美國係好正統地學術式研究同學習。點解會搞到噉？特別係崇洋崇日的香港人。你有睇過幾多套港產中國古裝歷史電影同漫畫，唔係變左歷史為名武打動作為實？

最後，一條問題：
「《墨攻》改為《墨守》會否更正確？」