中國合伙人



《中國合伙人》好睇,你可以話陳可辛想拍一套中國版《社交網絡》,同樣創業做主線講錢講女講友情,不過由facebook變成瘋狂英語,非常有劇力演員做戲又唔錯,導演編劇又犀利非常地道之餘唔會好土,唔講都估唔到係香港人班底拍,但又或者有D野只有香港人先拍得到,例如全套戲實則非常曲線地宣傳美國主義同寸大陸人理想就係唔使再做大陸人,而居然可以包裝到好光彩過得到審查,乜你唔覺得靠幫中國人入籍美國可以做到越洋去美國上市有三十億美金生意,如此量化表達國人離心,係非常諷刺咩?


如果係band友聽soundtrack都夠爽大量金曲,單頭半個鐘已經又唐朝又崔健又蘇苪,Beyond都出埋而且首歌用得有意義,完全帶回八九十年代黃金歲月回憶,然後睇返果個年代中國人幾咁搏命讀書學英文(雖然只係為左逃離中國),再睇而家中國,大陸人一樣以離開中國為人生目標,但係已經由靠實力靠苦練變成只識得靠錢靠拿渣。


呢套可能會係我最鍾意陳可辛電影,老實我寧願佢可以拍少D史詩片武俠片,拍多D呢種小品式題材,好可惜頭威加聲勢超強,就係衰收尾。其實最後逆轉果下好精彩,點知跟住無端白事變左黃曉明用都幾難聽既英文幫「而家全世界最撚強大的中國」打左成個字飛機。立即搞cheap晒套戲。此乃一個超大敗筆。始終,正如黃曉明所言,無論你係咩地方人,到頭來想賺大錢,都必須要先放下身段討好大陸呀。