呢隻斯比頓星由九月起一直「寄存」TRHK，事隔三個月到2006年尾二一日，
呢條友終於捨得買左佢，107亦正式收到錢。
「喂107唔係喎！你隻野放左係我間舖咁耐，
係咪應該我收番你廠租至合理先你仲好意思收我錢？」

呢隻野四舊水，幾錢唔係重點即係擺定舊錢俾107賺／昆就預左，心頭好幾貴都捨得啦，
何況呢隻野質素比預期中之國產貨高，齋個盒都靚到唔捨得唔要，
你睇條傻仔開盒開得咁開心就知佢幾滿意啦！

「出黎啦斯比頓星！」
萬眾期待的一刻終於來臨。有陣時都不得不佩服大陸工廠班工人，就算件產品有幾差，
有樣野一定會做得好專業，就係包裝，呢個係我買國貨同做廠多年之經驗，
好似呢隻野睇落好少野，都同你用足幾塊紙皮同幾十條紮帶紮到實一實保證點郁都唔爛唔散，
未開始玩四條友齋拆部野出黎都搞左兩個字。

斯比頓星英文名係Cybertron，叫得做「星」就梗係一個星球啦。故事當中呢度係變形金剛種族家鄉，
起初變形金剛係Quintessons族人製造出黎之機械生命體作奴隸用途，後來變形金剛革命趕走左Quintessons族，
之後斯比頓星上之工人同軍人變形金剛分成博派同狂派，因為統治權同資源不斷打仗，
最後斯比頓星資源耗盡同破壞過度，兩幫人飛到宇宙另尋能源同居所，糾纏間跌落地球。
發展落去，Cybertron唔止係一個星球咁簡單，仲會甦醒變成機械人型態，
而呢個玩具有星球、戰艦同機械人三個變形，大隻得黎多機關好玩又靚，物有所值。

後面中間黃色果個位係特別挖空再嵌一塊銀色碎片上去非常顯眼，睇埋四周紋路，
似太空船或者星體撞擊點或者火山口之類，相信同變形金剛同斯比頓星歷史有關，
可惜當年冇機會追晒變形金剛動畫，漫畫更加唔使提，買完呢隻玩具好想追番睇睇到底劇情係點。

個底有四隻腳令星球可以平放，機械人型態時亦用黎做腳部變形同企立用，值得加分。
星球外圍報滿好多黑色建築物／收發站／炮台，雖然郁唔到，呢類突出裝飾部份全部係用軟身膠料製造，
可能因為預左玩得耐變形太多會撞崩拗彎，就好似我呢部噉，
睇埋落去可以發現呢部「新機」已經有唔少瑕疵。

最頂呢個窿係全個斯比頓星之戲肉黎，陣間就知點玩。細心睇會睇到四個突出位，
每個可以裝一部迷你變形金剛Mini-Con，全個斯比頓星可以裝七部，當然係要另外俾錢買啦。
呢個角度敗露呢個玩具最大美中不足：右上半球好明顯係唔可以完全嵌入主體而有條罅位，
買到返黎已經有呢個問題，不過107唔使驚我唔會要你回水（住），
唔知係模具有問題定係榫位造得唔好，連官方發放圖片甚至說明書一樣合唔實，
有興趣不妨上網搵下，官方圖片係刻意盡量避開會明顯睇到呢個駁位之攝影角度。

故事入面一個巨型黑洞即將毀滅捐毀嚴重處於沉睡狀態之斯比頓星，
只有集齊傳說中之Omega Lock同四條Planet Key，先可以喚醒斯比頓星拯救自己同宇宙。
玩具亦跟足原著送埋Omega Lock同Planet Key俾你，只不過，問題黎喇．．．

問題係，Planet Key只得一條。
「點樣可以集齊晒四條呀？」
「俾錢買多幾部變形金剛囉！咁簡單都要問！」
每條Planet Key背後仲有個獨立密碼，可以上transformers.com睇到特別劇情同玩遊戲，
得一個code都可以上去玩，但係當然唔會玩到完整版啦。
「隻online game玩乜？」
我懶，冇試過。（．．．）

斯比頓星拯救行動正式展開。星球頂部果個窿，其實就係安裝Omega Lock之匙孔。
傳說之中要集齊四條Planet Key先可以啟動斯比頓星，而家我先得一條，會唔會開唔到架？
搞到我好驚添！
（另外，右半球合唔埋個情況，可以睇得相當清楚。）

戰戰兢兢手震震噉插入去，嘩，曉著燈喎！
係咪即係我成功左？咦乜唔係要四條匙先得咩點解而家我得一條都可以？
「喂柯柏文你唔使打得咁辛苦喇！搵到一條都爆到機呀原來！」
可惜，果條罅．．．
「唔掂呀107條罅真係闊到頂唔順呀快快回水！」

插實之後向下拉，上半球立即彈出，仲要有聲出添！
「斯比頓星，啟動！」

中間拉開，已經可見機械人形之相，
不過變機械人之前，先玩另一個變形 － 宇宙戰艦先。

其實打開左個星球再調番轉已經差唔多變完，只差好少。
跟住到戰艦變形之戲肉：
「星球之鑰．奧米加之鎖，插入！」

「起動！！！」
將Omega Lock插入腳側邊兩個窿再轉動逆轉外側，反出內部機關同中心部份炮台。

仲有艦尾兩個炮台，唔好睇少呢兩支野有野玩架！等下啦陣間就知！

斯比頓星．宇宙戰艦型態
Cybertron Battle Station Mode

雖然好簡單，但非常之靚，好鍾意保留機械星球特質果份原始，
我甚至受呢個戰艦型態多過機械人型態。

當然，你會問：
「成個星球咁大，仲變戰艦黎做乜？星球型態果陣自己都識飛啦！」
「聽古唔好駁古啦我鍾意就得啦！係唔係都咁多錢送多個變形俾你唔好咩！」

玩完戰艦，就到最終極變形 － 機械人型態。
將對腳一百八十度扭轉，只要完成埋最重要一個步驟，斯比頓星就會正式甦醒。

呢個重要環節，當然唔少得劇情當中叫醒斯比頓星之工具，
大家準備好未呀？一齊嗌喇喎！一，二，三！
「星球之鑰．奧米加之鎖，插入！」

向上一推，膊頭位、對手同個頭立即彈出，仲曉發聲對眼仲會閃光添！
不過要要用力到連自己都勁會整爛部機同整斷條匙咁大力，
再加要識得點樣借位就力先推得開，夠晒解除封印feel，
但係說明書話呢隻玩具係「五歲以上適合」，喂，一個五歲豆釘唔會有咁大力同咁聰明自己開到卦？
（老實講，我嚴重懷疑一個五歲甚至十歲以下小朋友，有冇可能單靠一己之力同說明書變形到呢個階段！）

仲未變晒架。唔止Omega Lock，單單係一塊仔Planet Key都有用處，
就好似手腕支炮，將Planet Key插入去就會自動彈開。
唔難發現成隻野最值錢就係呢舊Omega Lock同Planet Key，唔見左真係唔知道點算。
再完成其他細節變形同微調，

"Primus, unleashed!"
變形金剛宇宙中有兩個神，創造神Primus同邪神尤特龍Unicron，兩者彼此對立，亦各自成為一個機械星體，
Primus之星體化身就係Cybertron，以Omega Lock同Planet Key復甦，Cybertron就會變成機械人型態Primus。
因為係成個星球變成，所以Primus同尤特龍係變形金剛宇宙入面最巨型機械人。

唔止前面，後面一樣咁型！
真係不得不佩服設計師諗到點樣令一個星球完整變成一個機械人！

冇睇過原著，所以未見過Primus本來個樣，
但單睇呢個玩具，對Cybertron同Primus之印象非常正面，細節位做得非常豐富，
分分鐘睇完動畫版之後反而會冇咁鍾意，因為動畫都未必會做到咁細致。

呢對係Primus主炮，隨機附送兩粒彈俾你，裝上去真係可以射出黎架，
係一個幾好玩同幾陰濕之機關，機械人同戰艦都有得玩。

連對腳都做得精細，用Omega Lock扭轉兩腳外側時中間會伸出炮台，唔會射彈但做得幾靚，
而兩側除左可以突出飛彈倉之外，仲收埋左迷你機械臂各一隻，
用星球表面炮台果種軟膠料製，又係預防郁動太多同太大副度導致破損之設計，
只不過我仲係覺得太牙煙，伸出黎擺個甫士再塞番入去已經驚整爛，自己都唔敢成日玩。

黎到呢個級數之機械人玩具，其中一項要求自然係全身關節必定要夠多夠靈活，
Primus因為體型同裝備問題，手腳扭動副度唔係好大，好在手指有得水平一百八十度擺位，
要整呢兩個metal友最愛手勢，易如反掌。

最後Primus擺番個靚甫士送俾各位朋友，係參考Ken Sir的經典動作：

「至柒係你喇！」

雖然新買返黎已經有少少瑕疵，同埋唔夠一個禮拜已經玩壞左（．．．），
我對呢隻斯比頓星算相當滿意。
「玩完？仲未．．．」

呢套斯比頓星係所謂「特別版」，除左斯比頓星本身仲加送尤特龍頭乙個。
補完電視版第一二輯之間之劇場版當中，尤特龍不斷吞噬其他小星球，
最終目標自然係沉睡之斯比頓星，最後一戰尤特龍變成機械人同博派對打，
最後繼承柯柏文之博派新首領洛迪文內部破壞尤特龍，全部機械人只剩一塊殘骸於宇宙中飄流，
亦即係呢一個頭部。雖然冇得玩得個擺字，亦唔可以同斯比頓星「合體」重演尤特龍企圖借斯比頓星軀體復活，
特別版之「限量」意味同本身唔差之設計同手工，令呢個尤特龍頭成為另一吸引力同賣點。

「黎到呢度，故事當然仲未結束，
既然有正義之斯比頓星Cybertron Primus，
自然有邪惡之尤特龍Unicron。
且看下回分解。」