曾幾何時我係個超級狂熱Diablo fans，兩集都係一出即煲，煲爆正傳出擴充即買再煲爆完再爆，當年A-Level放榜，之前一晚我就係煲Diablo II煲通頂，打到朝早五六點殺死Diablo爆機，順便落樓下買份報紙睇放榜結果。不過之後轉向音樂，打機之時間同興趣都冇晒，加上畢業後日頭夜晚兩份工，呢種要不斷升level搵寶物之RPG系遊戲根本冇可能抽到空玩。直到正式自香港metal界退休有番夜晚時間，又開始打番機。
最鍾意上網四圍搵過癮Flash game，Armor Games是不二之選，07年一出已經成為Flash game加喪屍game經典之The Last Stand，到而家我仲有玩，年幾後出第二集複雜性加難度高幾級，我仲玩緊未debug之V1.0有好多蠱惑招，之後新版本全部「秘技」冇晒，攻略進度受影響停滯不前。可能The Last Stand同Ninja Rinseout太強，搞到好難再搵到覺得值得煲之Flash game。某次無聊撞到Agony: The Portal，作者明顯係Diablo fans，以Flash有限空間精簡系統又保留得到原作精髓，同玩Diablo一樣，一開始玩就停唔到手，太耐冇試過成個星期晚晚返到屋企乜都唔做係噉玩，連星期六日都唔出街勁煲機，大家見到個blog連續大半個星期成日冇新野睇，新野又求祈交差，係好正常的，我都唔想架大佬好忙呀升level。
故事預料之內地AD&D：古時人類戰勝九大魔王，關閉魔界之門，再將不死魔王封印古墓內，控制魔界之門之八件神器分別由Gonia王國八位皇帝保管，無數年後盜墓者錯手將不死魔王釋放，令佢決心向人類復仇及再次打開魔界之門。同類故事一早耳熟能詳，不過唔同在你即主角就係不死魔王，而唔係乜野英雄。這就有意思了。熟悉Diablo的話，系統絕對易上手：帶領魔王穿梭Gonia王國中，進入大小城鎮中於橫向平面動作情景單挑守城兵團，贏左就可以得到經驗值升級甚至搵到寶物裝備，以剷平八個皇城殺皇帝奪神器作最終目標，可以話係Diablo式橫向行街action RPG，操作簡單：左右箭咀或AD行、上或W跳、Space或U斬、Shift或I向前擋（只可擋前方攻勢，同擋一樣會扣血）。遊戲有四個難度：
Easy：唔使講啦。完全冇挑戰值價。
Normal：一般難度。仍然易玩到你喊。
Hard：先至「正常」，除左會計多20%經驗值，升級仲有額外屬性分數。
Insane：如其名黐線地難玩，所以每關有多50%經驗值，同其他升級獎賞。
第一次玩千祈唔好玩Normal，最少要玩Hard。我玩過一次Normal，到最後幾關感覺到有少少挑戰性，中間要打三十幾個城好易悶。Insane就真係會玩到你癲，分分鐘頭三四關夠你玩一晚，同Normal作比較的話，Insane頭三關，已經難打過Normal最後三關。
每次過關不論成敗，都可以按殺敵數目同技術得到經驗值，如果戰敗會只得退陣時經驗值10%左右。每次升級有五個屬性點，Hard同Insane再多一個有六點，可以選擇提升三種屬性：
每次加體能，除左會升HP同格鬥攻擊力，仲會影響移動速度及跳躍高度，高級時一跳可以跳到成個畫面咁高咁遠，應付後期勁大量敵人同飛彈非常重要。
加魔法的話，就可以改善施咒速度／頻率同攻擊系魔法破壞力。當後來魔法比物理攻擊來得重要，特別選擇挑戰高難度，就會明白魔法之重要性。
技能點數高低直接影響升級速度，因為技能值高的話，每關得到之經驗值會相對增加。除此之外更會影響物理攻擊出到會心一擊同暈眩效果之機會率。
基本上三種屬性都重要，雖然後來魔法重要性越來越高，但後期主要靠裝備強化，每次升級只要平均發展三項就可以，我自己通常每級Fitness+2、Magic+1、Finesse+1，Hard同Insane升級有六點俾你各二更加唔使煩，不過部份裝備可以提高機會率，要做到100%會心一擊同暈眩唔難，只要兩者基數夠高就可以將Finesse屬性點投資另外兩頂，特別Fitness。因為戰鬥系統無防禦力一項，所有攻擊以固定數值計算殺傷力，所以體力越高越著數，特別Insane敵人恐怖到你唔信，驚唔夠打升級時加多幾點體能啦。
升級仲有一個技能點 － Insane有兩點 － 俾你發展三種唔同技能，包括必殺技（藍色）、攻擊魔法（紅色）同防守／輔助系魔法（綠色）。玩過Diablo會對技能表見慣見熟，高級招式除左要升到某個級數，仲要先學識前級技能先可以更進一步。攻擊技入指令出，可以無限使用，而且相當重要，因為每關有一項連續技獎分。魔法則以數目字1-8出，因為冇MP值只以回氣時間限制，而升級後效能同回氣時間成正比，換言之同一種魔法級數越高使用頻率越低。
過第一關就學到之必殺技衝斬，基礎突進技，可以吹飛敵人，突擊、連招同撤退皆適合，缺點係攻擊力一開始-30%，要升到第六級先變番正數，同有秒半固定突進時間，如果近身出會變成後發。升級除左加攻擊力，仲會加長突進距離。
正式升到Level 1時可以學到跳斬，跳躍版突進攻擊，凌空接近可以跳過人牆同避開遠程攻擊，打大佬同只識打遠敵人非常有用，最重要所有必殺技中只有跳斬一開始已經係加而唔係減攻擊力，不過唔知係咪bug，雖然招式特性之一係加長暈眩時間，我未試過可以用跳斬打暈人，又唔會打到吹飛，如果敵人中左招唔死的話一定會被反擊，落入人群之中更大鑊。凌空時可以用左右控制落點，想熟習截擊移動中敵人要花一段時間，要記住跳斬有最短攻擊距離，同判定範圍模糊，如果敵人入唔到你前半個人就會打唔中。
睇名都知瞬間轉移啦，跳起都可以出不過會地面現番身，升級會拉長傳送距離。除左用黎著草，其中一個妙用係連招，雖然打唔到人，但於連招前或中間或後出都會當成一招，不過因為要Level 6先學到，頭五級連招好難多hit數。
非常實用，出招後會先打後再打前，起手快加打晒兩邊之餘距離長，而且中招立即暈加暈好耐，可惜頭五級攻擊力係負數。俾人包圍或者傳送／跳斬落錯位立即出可以幫到你解圍，而且用黎連招、控制人群效用奇高。
跳起再大力扳落地下，打走附近所有敵人，跳起出可以用左右控制落點，雖然清場管用，但起手式慢，用黎連招或突進一定會先俾敵人還手，而且到Level 16先有得學用途未算大。比衝斬同Stunattack好係升到第四級已經回復正常攻擊力。
攻擊系魔法第一式，升級後最多可以一次出三個火球，地面或空中都出到，有三種出法：就噉出會拋物線式掟出去半個畫面左右，複數火球的話地面出落點由遠至近而跳起出相反近至遠，不過因為飛行時間長，只適合打遠程攻擊敵人，又或先讀突襲入緊畫面之步兵；地面拉下會同空中平常出一樣，向前面斜下高速近至遠發射，即自己面前三分一畫面覆蓋晒，命中率高出招快又易用，但敵人行到埋身會打唔到；跳起滯空時拉下出會向正下放火球，無論引人走埋黎之後跳起出，定跳過人牆時順手出，在攻在守都非常有效。回氣時間短即相對攻擊力弱，一定要中超過一個火球先較有殺傷力，加上大多皇帝唔怕火球，除左回氣快出招快用法多，之後只實用於清場，防守性重於攻擊性。
Level 8可以學到之第二級攻擊魔法，升級後可向左右兩邊各發射一個電輪沿地前進，好彩的話行進途中可以打中敵人兩次，可惜缺點同火球一樣，就算等級高單擊中一次殺傷力仍太弱，而且回氣時間比火球長一倍以上，主要用途係後期敵人太多避免被包圍用。
最強魔法天降殞石，最多一次落四塊，可以打晒全個畫面，企正殞石群中間會判定成中兩粒，冇乜野中到正唔死，皇帝中兩粒都會扣最少一半血，殺傷力超高回氣時間亦合理，仲可以跳起出，玩高難度如Insane，後期基本上靠佢過關。
向前直射一條閃電，升級會前後兩條全畫面打晒，距離可達畫面以外，而且中招者不死即暈，所謂之最高級魔法，我卻覺得同殞石差得遠。雖然所寫攻擊力比殞石高少少，但唔同殞石範圍式轟炸可以一次中兩粒殺傷力乘二，電殛只扣一次血，而且判定相當有問題，好似打唔到吹飛中敵人，同行緊時出有機會發生射失情況，好多時見到明明射中點知個人冇事仲可以行埋黎斬你，條氣點順呀大佬。同級回氣時間長殞石一倍，又冇100%命中率加90%死亡率，除左大佬關殺卒同時射暈皇帝實用，殞石所有方面優勝得多。
最重要最重要最重要魔法，一出立即回復最高體力值一定百分比，最高可以升到十級，每五秒補你三分一HP。玩低難度升三四級夠用到爆機，Insane的話就算升爆十級，你會發覺隻手指無時無刻伸去個5字度。
識遠程攻擊之敵人有兩種，一種係水平飛行如出波，一種係拋物線如掟矛，後者可以用此重力魔法牽制，使出後限時內所有拋物線型遠程攻擊會被強制扯向地面，免去你唔少麻煩。因為後來屬水平攻擊型，效用冇所想中咁大，不過回氣快有效時間又唔算短，同補血一樣你一冇野做時就出實冇死。甚至需要，Insane的話。
嚇走敵人之救命招，除左必要時用黎保命，仲用於控制人流，將散開之敵人趕到一邊集中再出殞石／電殛。
惡夢強化版，以自己作中心點，範圍內所有敵人即時發狂攻擊自己友，你打佢都唔會解咒，如果中招者係全關最後一隻就會企定唔郁，總之施法者絕對安全。初時範圍唔算太大，升到最高第六級，可以令畫面見到所有敵人內訌七秒鐘。雖然過程唔會整得死多少敵人，但走佬順手，或消耗敵方軍力再伺機執雞，或搵位落殞石／出電殛，七秒鐘綽綽有餘。
似乎必殺技同攻擊魔法冇級數上限，輔助系最少補血同發狂有。如何分佈技能點可視乎難度。Easy同Normal可升使用頻率高如必殺技及火球、電輪，因為殞石、電殛同補血唔需要太高級已經夠用，加上部份魔法寶物有得加技能，倒不如強化常用招式。玩難的話，我會建議技能點集中投資最實用幾項。
必殺技系每樣只升一級就夠，基數已是倒扣攻擊力幾招要升好多級先補到，只有跳斬用Stunattack之實用性值得投資，想慳皮甚至Slambomb都可以唔學，因為學成之時（Level 16）其實唔多用得著，再者Insane必殺技除左用連駁連招拎經驗值，後期敵人個個勁到爆，你仲打埋身話咁快收自己皮，無必要投資太多。升唔升傳送睇你喜好，我個人用黎連招多過著草，升左級閃遠左連招反而更難，所以一直將傳送維持最低級，就算有寶物可以升級都盡量唔要。
輔助系重力同惡夢升一級就夠，最主要為學Frenzy舖路，但Insane一定要升爆補血，而Frenzy學到最高六級冇蝕底，不過搵到寶物幫你自動升級的話可以慳番幾點。攻擊系魔法中，初階升到三火球同雙電輪應付初期需要就夠，剩低同之前儲落之技能點，全部投資落殞石同電殛，尤其前者。殞石是Insane破關之道。
要事半功倍除左升級同練好魔法，當然要搵到好裝備啦。逢過關都有機會執到寶物，作者將Diablo一套搬過黎，隨機產生參數同名（九成裝備名奇柒，作者似乎想串Diablo，呵呵），亦往往有其他特別效果，好似加某項屬性、某技能升級，同其他更特殊強化功效。所以執唔執到勁裝備全睇遊戲進行階段同彩數，而全個地圖多城鎮到你怕，除左做到隻game勁長好似抵玩，仲為保證你有充裕機會搵到高級裝備。寶物共分六種：
武器：可以使用之武器只得連枷，唔明咩黎睇睇片頭魔王拎住枝野，即長棍版流星槌。影響參數包括物理攻擊力、會心一擊機會率同暈眩機會率，武器獨家之魔法效果係有15%機會出第一級火球或電輪或電殛。
盔甲：最主要加HP，需知此遊戲HP等同防禦力，額外效果全是正路野加屬性升技能之類，特別在盔甲會減慢行動速度，加得越多HP行得越慢，不過通常本身Fitness已夠彌補，其中影響完全唔明顯。
頭盔：唯一主要用途是加HP，不過唔會拖慢步速，有一獨家特別效果：部份頭盔會定期自動療傷。有時個頭仲緊要過個身，因為勁頭盔比盔甲加多更HP，但唔會整慢你行路，又有更多bonus，都幾戇居。
護身符：全身裝備中唯一可以增加每次殺敵經驗值之裝備，另可改善施魔法速度，及有較多特別強化效果，好似增加打暈敵人機會，同獨家之偷血，每打中敵人可以補1%血。相當實用同重要之補助系裝備。
戒指，大致同護身符差唔多，補助性質較強，不過主影響施法速度同攻擊魔法殺傷力，其他較特別功效有反射敵人遠程攻擊、彈開敵人等。可以戴兩隻戒指。
正常梗係加參數加得越多越好，不過要隨機到件好裝備十分難，好多時額外之強化效果更值得珍惜，好似有個獨一無二頭盔The Terminator，雖然只加32% HP，同更高階閒閒地加你幾十甚至過百差得遠，不過會每半分鐘自動幫你回復15%體力，我Normal到打爆機都係用佢；玩Insane時執到個偷血護物符，雖然加屬性加得唔多，不過以血比好多野重要之Insane黎計，佢陪左我好耐。玩到後來仲執到隻戒指殞石電殛各升三級，立即戴住成世唔除，全身裝備夾埋，我殞石加左十幾點去到六十幾級，電殛都夾硬用寶物加到五十幾，就算打皇帝兩樣各出一次已經搞掂。至於連枷獨家之隨機出魔法特效，搵到一枝斬完人會出電殛都幾正，不過魔法連枷唔會有其他強化，而且只會出第一級魔法，如何選擇取決於喜好同難度。玩Insane打埋身機會較細，第一級魔法殺傷力亦有限（即使電殛都唔夠強，只著數在可以電暈前面所有敵人），我寧選加魔法同屬性。
每一關有兩浪敵人 － 後來關卡甚至三浪 － 只要殺晒全部就過關，攻皇城的話贏左第一波敵人之後，皇帝會由畫面右角城堡登場，殺死皇帝之前卒仔會無限出，打贏皇帝後要再殺死剩低所有人先算成功攻破。敵人主要分四種：
步兵：近接同遠距兩種，前者你企定不斷普通斬已經可以屈死，後者剛剛好佢打到你但你打唔到佢，一定要用必殺技埋身或魔法搞掂。
遠程兵，有水平同拋物線攻擊，後者重力時講過可靠魔法克制，到後期拋物線攻擊距離會不斷加長，不過同時間多數遠程兵會改用水平射擊，唔快手肅清會扣血扣得好快。
皇帝：一共八個，有主角兩倍咁高大，只有近身攻擊，不過攻擊範圍同殺傷力都強，Insane一刀可以扣你幾百血。基本上除左頭兩個皇帝，全部唔怕最初級攻擊魔法火球。因為皇帝會不斷派卒，每次大佬關都需要擒賊先擒王。
護法：卒仔版皇帝，體力同攻擊力當然低得多啦，有氣勢不過實際上打護法仲著數，因為佢地似皇帝只識打埋身，而且每次出護法都會大幅減少普通兵仔數目，你會寧願多一隻護法，都唔想多十隻隔空屈波兵仔。
為鼓勵大家唔好剩係死出魔法，每關有連續技獎分環節，一招必殺技完招前入定指令就可以cancel或先入，只要出招打中敵人（只計打唔打得中，一招內可以打中幾多個敵人冇影響）就算入連續技，當然combo數越大獎分越高，過關後分數會兌成經驗值，即使唔為獎分，熟習各式連續技對過關同保命絕對有幫助。我自己常用有幾招：
既然一招打中一千個人都只計一hit，最好等敵人唔密集時儲hit數，或先殺晒遠程兵，剩低步兵慢慢駁招，所以必殺技扣攻擊力特性未必一定唔好，最少同一隻兵仔可以俾你駁多幾hit。因為所有必殺技出招都有虛位，硬直時間又長會比遠程兵屈，玩Hard或Insane可能連幾次就要停低補血，不過學到Stunattack之後郁下手幾十hit唔難。首先每排一開始立即傳送到戰場最角（我選左邊），之後對住牆角不停出Stunattack，因為每排開始一陣敵人先會由左右兩角進入場景，而牆角外空間有限加冇退路，Stunattack距離又長，夠快就可以好似打行街game噉屈牆角，監生屈死所有你駐守一邊出場之敵兵，而且出招會打晒兩邊護埋後，如果你搵到個偷血護身符，加戰場另一頭出得少遠程兵，就可以持續屈機，要一野連幾十combo唔難。
連續技亦有級數分，連得多招之餘撈唔同招式可以升級，好似加一野傳送就會變Super Combo，殺得多可以有Excellent、Epic之類，字眼越誇獎分乘得越勁，所以唔好剩係死出衝斬，最少之前或中間加多次傳送。連招傳送使用備用：雖然連續技前中後出都可以，但每次只限一次傳送，連出兩次就會斷combo，睇時勢加多幾下傳送就可以快速儲hit，平時用黎走位之外，屈牆角可以Stunattack之前先駁一次傳送，hit就會雙倍上，而任何連招最後亦最好傳送多次，呃多一hit之餘往往具實用效果。
初期獎分上限只得幾百，後期會二千幾，不論幾高通常駁到廿幾hit Super Combo已經可以到頂，另可以假設此額外經驗值等同於全關總經驗值一成。如果你玩高難度特別Insane，難到你連第一關都分分鐘過唔到咁難，玩到後來仲想打埋身好易玩到你喊，值唔值得花咁多心機同風險去拎多10%經驗睇你。況且打Insane有時你都唔使特登去加分，特別前半，話咁易你就會死，一關可以死Ｎ次至過到，加加埋埋（被迫）賺到唔少。
Hard以下，就算你唔出補血以外魔法只用物理攻擊，到最後幾關先開始有難度，但Insane的話，企定一個位可能五秒甚至三秒已經收皮。自己慣常打法係未有勁魔法前以連續衝斬同傳送＞衝斬作主力，加以火球、電輪同重力輔助，近接戰扣血扣得勁快關係，打一陣就立即不斷跳或傳送走到空地係噉補血，到可以落四粒殞石時就先開始易玩。普遍攻城過程如下：
聽落打得好狼狽，請記住Insane任何一關都難打過Normal最難果關。我爆左兩局機，一局Normal一局Insane：
第一舖Fucker，從頭到尾未死過，爆機升到第34級，裝備仲要唔太得。嫌太碎料，開多局Insane：
Insane Metalhead，唔使特登去升level，好多關根本夾硬俾人屈死，爆機升到Level 43，加一身黃金帝王造型殺晒。
爆完機唔夠喉的話，仲有個「達文西模式」Darwin Mode。簡單黎講係Survival，打無限皇帝即無限卒仔，以你開mode時級數加一開始，睇你一條命可以殺到幾多個／殺到邊個level皇帝。繼續倚賴魔法同有耐性，要連殺十幾個皇帝唔難，而且用黎升級同搵寶物一流，殺四五個皇帝已經有六位數字經驗值連升幾級，另每次挑戰無論殺到幾多人一定有得執勁魔法寶物，覺得自己套裝備唔夠勁，開Darwin Mode企係度等死，睇件寶物正唔正，唔合心水又試過，輪迴到滿意為止。我爆Insane後玩左兩三舖，已經升級升到黐線：
一次加十幾萬經驗值，升到HP剛剛好666，係時候收手。可惜仍因Flash系統所限，唔似Diablo可以挑戰更高難度正傳，爆完機就只能夠不斷打Darwin/Survival，玩幾次就會失去興趣。所以打左陣，立即想摷番隻Diablo II出黎重溫，點知唔鬼見左！坐言起行，立即搵日出去買番個超級典藏版，再培訓我心愛的死術師Necromancer！黎緊，應該會繼續忙！