每個新年我最掛住，都係屋企附近呢檔魚蛋檔，應該係全香港其中一間最平。其實已經加咗價，不過又唔係加價，以前賣$8四舊，而家$10五舊，都係兩蚊一粒只係調高咗最低消費嗟，冇所謂啦，我以前幫襯開都係十蚊十蚊噉買廢事煩，因為真係整得好鬼好食又大份，連大大舊蕃薯都係兩舊一件抵食到喊。

實在太抵食所以永遠大排長龍，可能生意咁好唔憂做啦，平時已經間唔中唔開舖幾鬼姿悠，而前幾日去食話新年一放就放到初八，搞到今晚落街食飯好鬼唔開心，屋企附近已經冇幾多間細舖唔係閂到年初四大家食都冇得食，仲會開嗰幾間今年可以收你加三，然後去到大家樂一入去水牌同收銀處完全聽唔到廣東話，再加幾個細路猛咁嗌而班講普通話嘅老豆老母完全唔理，就好掛住魚蛋檔個老闆娘，因為篤返十蚊再送個杯麵算數，可能係今個新年唯一負擔得起加食得平靜嘅晚餐。