再見了，我的南大門。估唔到一住就住咗差唔多成個月，旅館老細已經當咗我係VIP（雖然分別只是由一個禮拜（可能）幫你執一次房變成（可能）兩次），而呢個地方越住越親切，因為同我屋企住正土瓜灣同九龍城交匯條界一樣，喺正唔同區域中間，出門口行唔同方向各有不同體會。

條街本身已經乜都有特別小店老店，落地下街同行八九十年代嘅香港商場一樣好多特色細舖，過到對面街南大門市場是個非常街坊嘅市集，而街口非常西化好多歐式建築，但街尾就大大座古城門，文化對比強烈，一條街已見盡百態。

居住環境唔算好好，但我唔多介意，除咗近公司每日返工放工三個字腳程搞掂慳返唔少時間同錢，仲因為呢份包羅萬有嘅人文百態。所以點解咁唔想返香港，就算我係住九龍城，同一份感覺同人情味，好多年前已經感受唔到喇。