每週一相片大行動

2015 Week 25




而家世界真係難撈,繼之前見聖安娜有得賣午餐肉,屋企行遠少少間麵包舖,好耐之前賣埋雞蛋雜貨之類,跟住同隔籬間茶記入貨午市做埋焗飯焗意粉,唔好笑呀,我好多時禮拜六日lunch同晚飯就係靠佢架喇,因為好抵食。


曾幾何時我好自豪住土瓜灣九龍城舊區,因為食真係好平,我屋企對面屋村樓下兩間茶記,有一間個茶餐由我讀小學賣到而家都係沙爹牛肉麵加客茄汁豬扒薯條加杯餐飲,廿幾年嚟加價加到今時今日仲可以$28埋單,簡直平到黐線,因為同村另一間茶記下午茶叫個公仔麵加杯嘢飲已經三十幾蚊,行出村普通茶記食個碟頭飯都四十幾啦,廿八蚊有咁豐富大餐食,仲邊度搵得到?


只可惜呢個年頭街坊平舖實在太難生存,繼幾年前老人家$80正常價$120個醫生做唔住,今日lunch諗住食返個茶餐先知間茶記執埋,剩返隔籬食個公仔麵都三十幾蚊間貴舖。冇茶餐食就去頭先講間麵包舖啦,雖然唔順路要行兩個字過去,但有$25焗肉醬意粉同$27焗豬扒飯兩款,而且真係茶記水準大大盒好好食,好多時我lunch買其他嘢食時,都會特登行過去買定一個夜晚整返熱食,加多罐$5 Pokka咖啡,三十蚊就有一餐好食加食得飽,而家出去其他區茶餐廳,下午茶都做唔到呢個價或呢個份量啦。點知今日去到話而家已經冇再做我好鍾意食嘅肉醬意,得返廿七蚊個焗豬扒飯,仲要因為入少咗貨所以每日一拎出嚟賣立即話咁快搶晒,今日我嚟仲買到尾二一盒叫好符碌,而如果想加埋嘢飲的話,就一定要三十幾蚊至搞得掂喇。


望住麵包舖焗豬飯收據,我睇唔清香港未來。乜而家連想正餐時間喺舊區三十蚊食餐飽都咁難?




每週一相片大行動.綱要




Sir個網

lau-sir.com


Sirblog

http://lausirisual.blogspot.hk