每週一相片大行動

2015 Week 15




其實今晚有機會第三次上電視做訪問。我諗寫咗14年blog最大成就,係好多人比我自己更認真對待我寫嘅嘢,今時今日心態其實同十幾年Geocities、Xanga時代開始寫時一樣,只當一種日記式生活紀錄,乜狗屎垃圾大事小事諗到就寫低寫完就算轉頭就唔記得,反而成日有人會睇完我寫嘅嘢搵上門撩偈傾甚至邀請做訪問,講metal講音樂自然大把,其他講文化藝術、講電影、講社會、講住屋、講生活乜都有,好似星期三愚人節亞視冇得續牌居然唔係笑話,消息傳出之後冇耐就收到message,星期六晚《新聞透視》會講亞視,因為兩年前一個講亞視嘅post有記者睇過仲會記得,就素未謀面都send message嚟問有冇興趣接受訪問。

呢種事唔係第一次發生,甚至發生過我都唔記得幾多次,你問點解又唔見有乜劉Sir有份嘅報紙雜誌或者電視訪問嘅?可能因為每一次我都會收到問題之後,先寫晒成份稿 - 有時甚至影埋相 - 俾對方過目,相信班編輯同記者冇預過一個受訪者會咁黐線,只做一個出鏡半個字唔夠嘅路人甲都會玩到咁大,所以往往冇晒下文。但既然寫咗,同今次見到最後個project真係出咗街,就在這播完一刻,喺度同大家分享愚人節收到嘅四條問題同當時回應,為今集《新聞透視》補充一個八十年代長大嘅亞視迷嘅角度。


******************************


1. 何時開始看亞視的節目?

細細個已經開始睇



2. 為何喜歡追看亞視劇集?

覺得亞視動畫、劇集同綜藝節目各方面,無論外購還是自製,題材都比較獨特、比較另類,尺度亦較大。好多亞視最受歡迎時期拍嘅劇集,而家冇一個免費台會拍或者敢拍,將套劇交俾佢哋,亞視以外其他台亦未必敢原版重播。



3. 對亞視的印象和感情是怎樣?

細個睇亞視已經覺得,一啲客觀環境因素,會令人只會覺得亞視係一個二線台。以前屋企部電視只得四個台,無線明珠排一、三,亞視國際排二、四,換言之開電視一定係先睇到無線中英文台,之後至到亞視,冇咗無線好多時一開電視已經係睇緊佢嘅優勢。而且亞視畫質比無線差,色彩唔及人繽紛,以前影響可能唔算好大,但到高清時代其他台不斷追求高畫質,亞視畫面仍然係暗啞蒼白。亞視成日俾人話好重大陸味,畫質跟唔上時代係其中一個原因。

不過連串缺點反而令亞視節目更可觀,因為當仲可以同人競爭時,技術上有缺憾,就會用節目內容同質素彌補;唔係大台,好處係輸得起。點解歲月留聲台會比亞視主台更受歡迎?因為八九十年代亞視劇就係創新代表,正因冇人哋咁大包袱,至可以拍其他台唔敢試嘅題材同尺度。只可惜問題係贏嘅時候少、輸嘅時候多,好似你創新完,另一個台照辦煮碗,然後用一開電視機就係睇佢嘅慣性收視優勢大石責死蟹,口啤你贏,最後實質經濟收益又未必歸你,噉樣打持久戰,又邊有可能支持到呢?

而家睇返都幾無奈,當年亞視冇因為自己唔夠人大就自暴自棄,仍然腳踏實地努力創新落力做,正正係體現獅子山下精神,到頭來成果就俾財雄勢大嘅財團搶走,其實喺香港電視事件好多年之前,亞視已經證明證明咗全香港人睇,獅子山下精神喺而家嘅香港根本唔work。



4. 現在政府不續牌,會不捨得嗎?感覺如何?

其實我對亞視感情好深,唔止因為好多令人印象深刻嘅節目,仲有對我啟蒙最大嘅英文老師,係以前每晚十一點同凌晨兩點喺國際台見面嘅David Letterman;而且工作關係,我曾經上過兩次亞視節目,都係難得體驗。

我唔係唯一一個戥亞視唔抵嘅人,只不過當一個本地台會選擇唔拍本地劇而只播外購劇,包裝到自己似一個大陸電視台多過香港電視台,然後轉去國際台再見唔到David Letterman,而家對亞視嘅感覺就同好多人一樣,只覺可有可無,亦無特別感觸。

反而會關心歲月留聲台之後會點?我心態仍然好舊派,就算而家上網睇好方便,始終鍾意每星期某幾晚夠鐘就開電視追劇,歲月留聲台正正俾我重拾呢份情趣,甚至試過為睇一套劇而特登早起身。對於我哋呢種對而家新電視劇完全冇興趣,只求劇集有質素有新意嘅人嚟講,如果歲月留聲台因為亞視執笠而停播,第時開電視轉中文台,真係唔知仲有乜嘢劇可以睇。


******************************


其實有點遺憾,因為亞視上過兩次,都好想試一次上上無線,噉就由細睇到大兩個電視台都上過晒了。或者下次唔好寫到咁長嚇親人啦,大佬銷藥員成集《新聞透視》講嘅夾埋都冇上面咁多呀,哈。




每週一相片大行動.綱要




Sir個網

lau-sir.com


Sirblog

http://lausirisual.blogspot.hk