11am-2:30pm之間午市時段幫襯茶記，總有弔跪／總要屌鬼。落茶記最鍾意就係食公仔麵，食得公仔麵就冇可能散叫總會叫餐，而唔屬於中產的香港人都知道一般茶記分三種麵餐：平得黎大份的早餐；緊接早餐賣到收舖甚至賣足全日，價錢貴過早餐但係基本上只得個麵加杯野飲的午餐；同賣下午茶時段，午餐價位加早餐份量的茶餐。新年之後屋企對面間屋村地舖茶記午餐同茶餐加到$25（早餐都唔好得幾多喇，只係平一兩蚊），每次去食，坐我最鍾意的門口吹風位，對住舖面賣麵包個玻璃櫃兩張巨型餐牌，一面食一面覺得好鬼唔抵，午市叫午餐食個單送麵加腿蛋仲要少過早餐一塊包收$25，遲少少先食買個茶餐都係兩條半但俾多個豬扒薯條即係多半份下午茶餐。鑊鑊都好很無奈。但又好難次次都忍到兩點（半）先食嘛。

你可以話，又要食又要屌，不如直頭俾多五六蚊食個飯餐好過啦。但我落茶記尤其堂食，始終鍾意食麵餐。咪搞到噉囉。