2013年度歐洲避年之旅結束了，我又返黎香港繼續做奴隸了。可以同有意旅行的朋友分享一下今次歐洲一行使費成本同各地感想：

• 俄羅斯航空來回機票加兩程柏林航空內陸機 = HK$12,975（俄妹正！）

• 到達維也納第一晚訓機場等第二朝check-in酒店 = 此刻無價（記得試！）

• 維也納美泉宮隔籬三星級酒店三晚 = 39x3x10.5 = HK$1,229（都算值！）

• 柏林超一流四星尾三星頭酒店三晚 = 29x3x10.5 = HK$914（抵到爛！）

• 慕尼黑旅店級數酒店價錢廢柴酒店三晚 = 42x3+EU3信 用卡手續費x10.5 = HK$1,355（超搵笨！）

• 全副身家現金450歐羅用剩20 = 430x10.5 = HK$4,515

全程11.5日、真正玩左8日，計埋紙水同往返機場車費買買日用品之類，總支出HK$21,500左右。記住我係完全唔購物唔買任何手信最多只寄幾張明信片、食到有幾平得幾平兩三歐羅一餐照殺、盡量只行免費地方唔多去要俾錢景點，終極一條麻甩超毒窮撚自由行。

今次去左三個城方，每處留兩日半至三日，都叫盡到興：

維也納靚到爆炸，亦非常多歐洲文化事物睇好似音樂會同歌劇，但夜晚冇乜野玩因為預你去睇演奏或行館，對我呢種唔太行景點又唔多行博物館的人黎講有點悶。如果有機會都會再黎，但只留短期如一日半，為左美泉館。同為睇show，維也納多show到差唔多度度都有metal gig正到癲。

柏林地方大，多野玩多景點，多元化得黎夠古靈精怪，而且消費指數低食住都平，最重要大城市就係唔同好多景點都會有英文對照唔會只得德文，所以博物館好好行唔使淨係睇相睇公仔。今次兩日半我都嫌未玩夠，一定必定會再黎。可以提提你，作為同東歐甚有淵源的柏林，係德國同東歐地區其中一個最大music scene/gig scene、club scene， 同sex scene．．．

慕尼黑同科隆一樣係個港女天堂，港女所鍾意即係教堂古樓城堡齊晒，仲要慕尼黑是個大商場，但我覺得市內景點唔太多，沿一條U3地鐵線幾個站已經睇晒地圖提到幾個景點（除左個睇見個樣同個名都知係大伏的China Tower冇去），而且太多舖頭喇，同景點比例十分失衡。如果你行程係留左一大段時間同預算黎shopping，慕尼黑啦唔使諗肯定開心死你，幾間教堂樓下已經無限名牌店，幸福到呢。所以黎到慕尼黑，有兩樣野見最多：大陸人，同日本妹。當行幾步路就會見到一班日本妹行街，而港女向來出名全世界最媚日，就知道佢地實鍾意黎呢度。

想玩同睇多少少確實要出城行埋天鵝堡，不過成本都幾襟計：慕尼克市中心同Fussen鎮來回火車飛EU50，新舊天鵝堡參觀費各十二歐羅即係睇晒共EU24（你黎到都唔會唔睇或只睇一座啦），如果新天鵝堡自己行上去要行足八個字大斜路，可以揀搭巴士上1.8落1.0，但你總會想入鄉隨俗坐馬車，就要上6落3又冇十歐羅。仲未計好少地方賣野飲野食之餘乜都貴，買枝汽水都貴過出面差唔多一歐羅，如果你係諗住即日來回行晒兩座城堡，搭埋馬車順便入餐廳食餐好，單天鵝堡之行已經可以預算港紙一千。你亦可以選擇過黎住，不過我確實唔大興趣，除左酒店同食飯肯定貴到死，個鎮因為兩座城堡同湖光山色之外乜都冇所以幾悶，連紀念品舖都可以三點幾已經開始執野閂門、即日來回的朋友基本上四點幾已經搭火車走晒，可想而知個鎮點樣悶到喊。黎到Fussen節目就係行山行山行山同埋行山，你鍾意上高山睇風景就會覺得好正，但除此之外，真係冇咩好做。（有，識日本妹囉，慕尼黑同天鵝堡真係超勁好很多日本妹呀）（當然，大前提係你忍受得到同樣超勁多到嘔的蟈人）

我會揀冬天黎，除左避年仲有由細到大都鍾意凍地方同最怕熱，而家香港二月已經廿幾度同夏天差唔多，當然會選擇黎有雪落的歐洲避暑。因為乾燥所以凍得好舒服，我5度到0度到-10度都係tee加牛仔褲笠多件雪褸搞掂完全唔使加料打底，感覺仲要暖過香港，假如落雪更正反而會再暖少少，只要冇風就得因為其實歐洲凍不在溫度而在強風。但冬天黎歐洲有個缺點，因為唔算旅遊旺季所以好多古跡同景點都會揀冬天做保養，我黎左三年次次都撞到好多教堂同博物館裝修唔開，今次連新天鵝堡都搭晒棚架一場黎到非常冇癮。不過，應該多數人唔會似我，專揀冰天雪地的冬季黎歐洲架啦。

而再多一個要黎德國的原因呢．．．當然因為近東邊的歐洲妹是正的。德國妹好多都好靚，而德國又多東歐新移民，新移民又多數做低技術服務工，即係火車站食店或者酒店清潔之類。你明點解我成日會落火車站食野，同特別留意我住果層酒店係咩人做執房啦，我住柏林果間酒店，就係搵左個超後生加勁靚仲要好有禮貌的捷克妹負責我住果層。同俄羅斯航空雖然服務同飛機餐超級垃圾，不過部分俄妹真係好正，有個高得黎對黑絲長腿成日丁字腳model一樣，心口又勁仲要緊身白恤衫唔加外套心口扣鈕位成日有就黎爆開效果都唔知係咪特登，又要明知唔掂都要講非常唔準的國語十足港女講英文咁cute，真係呢口桀口桀口桀口桀∼

下次歐洲之旅（仲有的話），想覆灼柏林然後去去漢堡，同望望東歐，亦想去多次倫敦。不過，有機會再旅行先算啦。（咦，兩個禮拜之後已經係三月頭Testament台灣站喎．．．）

當務之急係立即仆去茶記整返個沙牛麵or餐蛋麵先。跟住發現，而家香港隨便食餐飯價錢，開始追得上歐洲。