每週一相片大行動
2013 Week 8
Europe Epilogue Encore
睇黎俄羅斯航空班俄妹空姐真係好正,我禮拜日朝早落機,隻篋呢玩到唔捨得走第二日晏晝先肯返黎。鑊鑊旅行都總要出呢種人篋分開到的事。其實冇咩特別急因為差唔多有三分一隻係吉篋,臨上機塞埋件褸入去除左怕落機時熱,仲驚咁吉俾人掟黎掟去出事用件褸塞滿佢先,結果手提行李擺電子野有6kg,隻篋塞到盡都只得13kg,連磅重個地勤都一副「唔撚係卦咁大隻篋擺咁鬼少野你係咪黎旅行架」表情。
不過隻篋到左都開心的,因為終於有朱古力食。去到德國成日食呢隻Kinder Country,即係香港見到果隻細細條牛奶朱古力不過大舊好多較硬身同有花生好脆,平時火車站同士多賣EU0.45-0.5,點知去到機場見拎登機證條隊長到見到都唔想排,諗住洗埋身上堆散紙買多枝汽水飲先,俾我發現機場間超級市場原來賣得超平一塊兩毫子有找,仲有九件裝禮盒一盒EU1.89,先知出面食水原來好鬼深,見銀包仲有三十蚊立即買左五盒返香港,成為今次歐洲旅行唯一買返香港的手信 - 其實散賣仲平,不過幾十舊幾十舊噉拎我怕嚇親人。
唔講喇,我好忙地食緊朱古力∼咦條褲好似又緊左∼
劉Sir個網
劉Sir個blog