我屋企文化比較古怪，團年飯好多時要食幾餐，因為老母鍾意中式而老豆食開西式，加上借飯局為名順便見見兩邊親戚，新年團返兩三次年一兩餐中加多一兩餐西實屬平常。其實以前老豆都試過約陷家上酒樓食，但實在冇幾多次平得黎好食，嬲嬲地索性每次屋企食飯自助餐算，乜叉都有又任食任拎保證人人食得飽最緊要食得開心，係就係好鬼豪，因為我老豆有個興趣得閒無事去酒店試自助餐，二三百蚊＝皮已收，四五六百其實好多都唔突出，所以一食就要食最好黎全港最貴果間洲際酒店，畢竟自助餐確實係一分錢一分貨。

識劉Sir都知佢最鍾意食cheap野貴野佢食唔慣，又唔食日本野又唔食海鮮即係邊樣貴就邊樣唔食，所以越貴自助餐佢越唔抵食，大佬食腸仔食薯餅食咖哩角點樣食幾百蚊呀？不過和牛（好似係）同燒牛柳非常地正，算我食過之自助餐入面最好，擦返四五件都抵返唔少，加埋洲際向來出名超靚甜品，單試甜品加雪糕已經夠你走兩三轉絕非其他自助餐噉只交行貨俾你食到最尾攝攝牙罅算，重申多次佢地蛋糕真係好鬼好鬼正。好在我蝕左果忽有老豆補返，佢鍾意洲際就係雖然冇生蠔食（四年前一次大規模食物中毒之後好多生冷野再冇供應了，我會記得因為我細妹都係受害者之一屙左幾日），但龍蝦同蟹仍然大量供應加款多，最勁果年試過單蟹一樣已經有五種，雖然到頭來都係得一兩種真係好食但重點係有好多款俾你揀門面已經夠高檔。當一塊茶記牛油size靚芝士超市價已經幾十蚊，去所謂高檔食肆擦隻長腳蟹腳又百幾蚊，我老豆黎親海鮮閒閒地拆四五碟，加幾塊芝士再鋸幾件扒，未計甜品雪糕已經食左過千銀，所以佢覺得好值。

而收得貴另一個理由係服務同地段。座落海旁真係冇得輸，早去拎位可以拎到窗口位睇住海景食，間唔中會見到隻呃鬼佬帆船有得笑，食得夠夜又可以睇埋柒彩耀香江，加埋樓上set dinner區有live band有時玩jazz有時玩室樂，最過癮試過幾次玩到好post-rock（Rachel's！），雖然好多時仍然會遇到大陸團師奶批爭你打你尖搶你野食，但服務態度好環境又唔錯又有歌聽拉上補下算啦。

講左咁耐，到底有幾貴呢？四年前黎食即係食埋最尾一水生蠔好似係$680未加一，當其時七百幾蚊食個自助餐已經叫好豪架喇，而四年間一個飯盒都可以加近十蚊價時，自助餐又點會加得少丫加埋一已經去到$867一位，好在恆生白金卡有八五折 － 雖然之後要加返一即係只得九五折左右，每位$749全包都叫每人平左百二蚊唔差啦，雖然要我俾錢的話，我真係唔捨得用七百幾蚊食一餐。

不過我老豆就唔係咁諗，即係七張野加入過幾次醫院世事都被佢看透了，好多同佢同屆老野已經呢個咩大病果個生cancer，有個捱左六十幾年捱到退休，點知一退立即驗到有柏甘遜症，長糧變每月醫藥費仲要企都企唔穩講野又講唔到完全冇晒生活，老豆七十歲人入完院可以生勾勾出返黎又冇驗到有咩大鑊野叫非常好彩，衰ｄ講句時日仲有幾多真係冇人知，分分鐘下次入醫院未必有機會出返黎皆因好多野話黎就黎，襯而家仲行得走得食得，想幾大就幾大啦豪咪豪囉仲諗咩。

「You only live once。」

（呢幾日出名rock star到貫徹始終的Yngwie Malmsteen訪問先同人講「最新隻碟我自己錄晒所有樂器仲唱埋加錄音錄到成劈屎噉，因為you only live once所以我鍾意自己玩晒全部野同想咩聲就咩聲你吹咩」，突然覺得我老豆原來都好metal）