每週一相片大行動

2013 Week 5




有時,命呢家野好有趣。大埔都算多野玩有得燒野食踩單車攀山涉水郊遊野餐,不過十幾年前讀教院,讀左四年都未去過大埔附近任何出名景點參加任何活動,其實毒撚一個更開心,使撚你講。反而畢左業之後耐唔耐會返黎彌補師範四年未玩未做,偶爾有活動出返大埔玩玩食食。今次犀利,出大埔踩單車再食串燒,一次滿足左好多個願望,同再次證明,命格真係天生成。


對上一次認真踩單車已經係中學畢業 - 讀緊教院時屈蛇夜晚幾條友抬架車落樓下巴士總站發癲唔計啦,其實教院畢業(又係畢業)本身話搞大埔踩單車不過最後搞唔成,事隔九年終於成行。咁有興致係為(或者搞得成的)台灣環島單車遊熱熱身,話晒十幾年冇踩過點都要練返,居然架車又甩鍊又斷線乜乜物物,大圍踩到大尾篤三個鐘都冇乜大炒,仲好死威水添,隔籬間電單車叫得大聲好叻咩,我架單車夠有引擎聲一路行一路格格格啦。個個睇死行行下架殘車就散,居然都可以頂到三個鐘全程,又黑唔晒喎。


不過只係開心左一陣嗟。踩到去大尾篤食串燒就出事。一行七個人有三架靚車四架租車,唔知邊個咁有眼光架架都唔揀係睇中我架爛車,明明一睇就知殘到就黎散啦隔籬是但一架都好樣過佢,噉都要撻?證明你條命係生得黑呢,呢一刻冇野唔代表避過左,只係時辰未到嗟跟住實會有事發生你放心。


日頭補返以前未試過的踩單車同埋食串燒,夜晚又重溫舊日回家的路,自從畢業典禮掟完帽之後,今晚先再搭往時日日搭返屋企的75X。因為好難得會黎呢頭所以好支力都重遊一番舊地先,行個圈發現大埔中心居然比我預期變得少,冇乜舊舖執難得未俾藥房、金舖、3C同女人貨四大產業攻陷,當年我地year 1普通話功課要錄會話(仲係用緊錄音帶幾經典),就係用呢間豆漿大王做情景亂寫,全靠豆漿大王我地普通話先剛剛好合格唔使retake,不過相信更大理由係miss都驚要對多我地一年會頂唔順放水俾我地過骨算。我成日同人講我成世人最大成就就係兩文三語大成,普通話令我有機會面對面訪問重金屬之花Doris,英文就令我去左兩次免費德國旅行,只不過而家諗返,英文係我皆旺睇舖多年練返黎的,普通話就係脫離教育界之後做份頹工頹下頹下操成的,其實都唔多關教院事,雖然豆漿大王真係好好食。咦,噉我教院四年做乜為乜得到乜?除左我一直想但得唔到既野,就係頹同埋頹。睇黎我今生命格,除左「黑」就係「頹」了。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual