因為成家人都懶，所以好少飲茶，當陷家都覺得要食飯之前特登早好多走去拎籌排隊，分分鐘一等就要個幾兩個鐘等時唔知做乜好，等到喇食時又嘈又迫，食完埋單又唔係平，寧願求祈買飯盒或者茶記粥粉麵搞掂好過。雖然好少機會幫襯，我對屋企樓下行半個字到間酒樓好有感情，因為差唔多未試過同屋企人食，但耐唔耐就會成班人走上去發發癲。讀中學時最鍾意一班人除夕躝街吹水或者去九龍城廣場唱K － 當時仲係大聯盟同加州紅鬥到出面時代，有競爭先可以除夕都可以人頭一舊水唔使又唔趕客走玩通宵唱到五點幾先散水，點似而家大聯盟死剩Neway仲食埋加州紅結果大家得返貴K唱 － 跟住新年第一朝走上去飲個靚早茶跟住先返屋企訓覺。

到龍珠開舖，當時客多大家易熟落生意又唔差，好多時星期日收舖老細拉隊過黎打邊爐，貪佢夠平六十幾蚊一位咋，仲要有得烚之餘可以任食點心再每檯送多半隻燒乳鴿，果陣舖頭生意好，拎禮拜日晚生意過黎請晒全部人都綽綽有餘，亦因為咁抵食加咁多野食，跟住日子好多時都會一班人過黎打邊爐，幾乎個個禮拜六或日都會食返餐。之後間酒樓易過唔知幾多次手，價錢加冇所謂但冇左任食點心一樣已經心灰啦，對上一次黎應該十年前喇，直到近排夜晚落街跑步，有次唔知點解咁身痕想睇睇而家已經唔知第幾代老細間酒樓有冇咩搞作，就發現大鑊，黎緊幾個禮拜，每晚落街買多一個鐘步都唔得掂喇。

打邊爐一向鍾意幫襯舊區或者舊酒樓，例如我們的最愛油麻地花園，因為舊舖地方同食物風味都唔同硬係好多野其他大舖新舖俾唔到你，同埋點都平過人地少少，但平到好似呢間德星一至日都$98就好難，而家搵到平日非宵夜任食場可以百二三搞掂唔係容易，再加埋張海報大大隻字「火鍋放題，好派頭好出位」，十足「一張票睇到笑」時代鹹片廣告咁好文采，再多一個冇得唔幫襯的理由。

鍾意上舊酒樓打邊爐，係好多人唔記得真正的自助火鍋，係你自己出去拎野食想食乜想食幾多通通按自己意思，而唔係拎張紙剔剔剔俾部長再等唔知幾耐之後先有得食，德星都要不過要填點菜紙主要係肥牛之類雪藏野，多數野食都要自己出去拎。我份人最憎等，所以想撞返呢種「正宗自助火鍋」好耐。而講到「正宗」，又不得不提曾經的王道福星喇，當年旺角女人街同創興開左兩間，賣點係野食量同款都超多，女人街果間你想望真有咩食，由頭行到尾可以行你半個字，而且只係八十幾蚊位旺角食算好經濟，只係後來全線執晒，創興個舖位就變成今時今日的花園金閣。

而通常呢種真正自助火鍋，多數比要俾紙拎野食種多特別野食。十幾種配料俾你自己溝醬當然唔少得，罐裝汽水同獅威任你拎（但都係懷念佐敦聯邦無限枝裝汽水，仲要係舊款玻璃樽裝），等透爐可以拎熟食食住等有燒味有點心有糖水有飽點甜品菠蘿包皮雞批真係夠晒冰室式老土，炸魚皮都有得食不過最正係炸雞翼見到廚房成座山噉捧出黎真係好正，仲要有湯飲好得意，每逢食到飽要抖抖就整返碗粟米羹先啦。雖然宵夜場八點半開始，但間酒樓好有誠意會成晚一路補貨同出新野食，好似七點入座時係炸雞翼山，八點鐘開咪提醒全酒樓各位朋友廚房出左隻片皮鴨想食請出黎排隊每人兩舊，八點半雞翼山俾人夷平左就到椒鹽豬扒山出場，食飽咩喂仲有「香港製造阿波羅高級雪糕雪條」，有紅豆同綠豆雪條仲有蓮花杯（噉樣叫先至夠old-school），係就冇佐敦聯邦無限舊款玻璃樽裝汽水之後再無限芒果布甸咁開心架喇，但，阿波羅喎！咩話你仲食Dreyers仲食Haagen-Dazs仲食牛奶公司搞錯呀你梗係要支持高級土產雪糕啦！

雖然話係舊酒樓但環境都唔錯，夠光猛夠新淨，檯凳又唔會排到好迫好密坐得幾舒服，最重要係頭頂就係電視機，當你明白今晚集《吹上雲蕭》劇情就係有條女著住件細碼泳衣走黎走去仲要鏡頭知你需要幫你zoom晒埋去，坐正大電視下面食呢真係好鬼死爽，呀唔使問候我老母架喇想睇圖自己上高登追post啦但你facebook都應該俾人洗左版架喇。雖說入座起計兩個鐘但其實呢種酒樓好少可會趕人，埋單先發現更正原來標價$98就係$98，一蚊都唔收多你加一都唔使，而家仲邊度搵得到打邊爐咁多野食又好坐加任坐，可以一舊水搞掂仲有找？如果八點九先上黎仲要再平多十蚊添呀！講到料就絕對唔夠其他例如花園咁靚架喇得中等水準，你要靚去食返百五百七再加一果堆酒樓啦，火鍋配料款式亦唔算多較為大路，其實熟食先係重點，雖然亦唔係多款式而且唔係點樣得，貪佢夠特別炸魚皮同粟米羹兩樣已經贏晒，仲有無限阿波羅雪糕呢。

肯定唔係最好食，都會係難得地平加食得開心，同埋就腳嘛我屋企樓下就係，以此「性價比」計我會俾8/10。其中一個食得合皮原因係好坐，因為坐左成晚，間酒樓最旺時先爆得半層多少少，所以絕對唔會迫唔會嘈，好可惜亦因為噉，仲想食就真係要襯早喇，因為位置近街尾馬路口其實唔算好就腳，行返近大街中心區已經超多大小食檔同街市，呢個舖位做茶樓夜市從來唔旺，難怪每一年幾招牌就會唔同左名。再換新老細時，仲搵唔搵得到一舊水打邊爐，好大疑問矣。