今年勞動節可能係史上最開心勞動節，因為由當日開始，老闆開恩特赦，我唔需要再勞動了。都諗過嘆返下，不過逢到五月起機票食宿都撞暑假檔期升晒去旅行貴，而且我最怕熱而呢個檔期想避暑除左南北極只可以去澳洲，都係邊放假邊搵工算啦。搵左三個星期，只有話而家香港地搵工真係好難，特別男性。

其實我幾鍾意勞工處，八年前轉工時都係靠佢地，當年做開兩份工一份約滿一係唔好做走人（係，我畢業出黎係同一時間做兩份工，一日返十三個鐘一星期返足七日），兩份一齊做完只隨便勞工處望望，仲要超級揀擇唔係油尖旺區加人工唔錯都唔會寄，只寄五六封都有兩份有回音，仲要其中一份就唔到時間去面試，另一份呢就係今個月前仲做緊果份，email完差唔多立即回覆，第二日去面試，第三日已經返得工，失業日子唔夠兩星期。當年真係超易搵工，根本完全唔憂冇飯開。

事隔八年，今時今日，就大鑊了。當香港人只識得上大陸搵錢唔發展本土工業同特色產業，到大陸近幾年出口業大蕭條工廠一係執一係搬去東北甚至其他國家，要真正靠返自己本土，就只餘金融一瓣。所以上任何搵工網，十份工超過一半無論個銜頭係主任定經理定文員定咩聯絡員調查員到頭來都係sell投資理財地產保險，剩低一半又多數要求專門技能好似工程同IT，正正經經寫字樓工只餘非常少而且多數要一個人做幾瓣，好似識搵訂單又要撈埋shipping最好做埋會計，俾一皮野你頂三個位。如果你好似我一心超級漁翁撒網唔理工種總之人工、地點同條件適合就寄，每日上網逐頁睇逐個揀，一坐就可以坐你最少六七個鐘，但到頭來咁辛苦都係冇意思，因為睇過咁多招聘網寄左百幾封信，係一封都冇回音 － 又唔係冇，因為你登記左個account，個網會將你資料擺上網，邊個老細搵緊人又對你有興趣會向你招手，但真係會經呢個系統搵你呢，只會係保險公司。直到而家每日我仲收到幾封保險公司信叫我去面試，連呢堆垃圾信都計的話回覆率就可以有50%，但呢行係點人人都知咩事啦，就連我舊公司個強積金經紀，一聽到我公司出事第一件事就係叫我入佢條team，但係如果呢行真係咁好做咁穩定，又點需要成日拉新人入伍咁頻撲？

所以我而家連上佢地幾個網都廢事，因為唯二真正回音又係來自勞工處。勞工處好處係搵得佢地請人都唔會係大公司，而我地呢種人都係做細公司好夠簡單又冇乜人事，而且細公司規模細行政快，想知得唔得兩日內必定知道。雖然我只寄兩三十封信已經有兩個回音，但到頭來唔似八年前可以成為成功故事，只能夠淪為繼續同大家分享而家搵工有幾難的經驗。咁多年黎我砌左個portfolio裝滿一個box folder，因為我份人比較實際，與其老細問我以前做過乜得把口9up，倒不如直接俾佢睇文件睇寫作，而幾年前買落一個鋁公事包，返工時用唔著，而家就變左做portfolio專用箱，個篋好輕架其實不過裝住個portfolio時就成包米咁重。我第一份工上到去，拎份portfolio出黎唔使半個字已請有工返，只不過到頭來冇返到，某程度上係性別歧視：

「咦，點解你張申請表寫應徵跟單文員？」

「乜你地唔係請admin位咩？」

「呢個位我地只會請女仔，男的話只可以做marketing。」

「個廣告標13K，收入有冇咁多？」

「其實出面做緊admin班靚妹個個都唔止呢個價，做marketing都一定唔會少過，不過我地制度係低底薪高分紅以佣金為主，頭半年未搵到客時就一定辛苦架喇。」

「噉不如你照請我做出面班靚妹做緊個文員位？」

「做得男仔，就要做跑數工架啦。」

office班妹妹仔（真係妹妹仔，成間office得幾個人但個個都係十尾廿頭），唔使跑單追數印印腳就一個月萬三四五，反而我做個位叫高級過佢地，一個月先得幾千或者一萬底薪，仲要跑餐死先可能及得上佢地咁高人工？就明白點解會我send完email差唔多立即打電話俾我叫我去見工，我真係諗唔到除左fresh grad之外有幾多人會做，同時願意坐得耐。某程度上，呢個個案講出左而家香港成年男性生活苦況：社會已經非常缺乏正常寫字樓文職工種，而且呢類工絕大部份女性優先，正如你有幾可見過一間公司坐門口接待員同老細個秘書／私人助理係男人？當唔使操勞唔使跑數之中層文職工俾女人霸晒，男人一係做低下層勞動工同厭惡性工作，一係做上層專門技術或特殊學識職位，如果得個普通大學學位同唔知幾多年工作經驗係完全冇競爭力，只可以搵到社會上最冇保障的跑數工 － 其實跑數工，都屬於厭惡性行業。

另一份其實好好，人工高間公司又唔錯，雖然尖沙咀返工食飯貴但我屋企樓下有架巴士直接去到，仲要一出門口已經係巴士站而且一程先四蚊，而家香港返工幾難搵得到一日交通費唔使十蚊？只係最後揀唔到我我都冇計，某程度上又因為另一種公司文化，請你上去只係填張申請表擺低證書副本，跟住叫你介紹自己，然後問你有咩問題，就走得，你問問題仲多過個佢。聽返黎而家唔少公司都係噉樣處理，「面試」純粹係叫負責人事個人請人上黎交表交副本，唔使點樣問架你交晒文件已經走得，人事部收齊交俾老細自己揀，咪係邊個學歷資歷最高咪揀邊個囉，到頭來同真正面試表現根本冇關係 － 同你可以話，呢個情況入面，女性當然又係優先，從來招聘普通文職工，一男一女而大家各方面條件一樣時，最後女方成功機會一定大過男方。

所以近來開始試搵agent，因為佢地優勢在於好多時可以將你履歷直接交到決策人而唔係只負責收表個人，冇咁大機會收晒表之後按資歷排結果你份表未去到決定請人個位已經俾人篩左出黎，連俾佢睇個機會都冇。因為佢地係靠幫你搵工搵食，你成功入職的話再向間公司收錢，所以會非常積極而且往往幫你嗌價嗌到好鬼高同乜都搵，代價就係因為亂咁嗌價自然唔係間間公司都肯制會同你面試，同乜都send時「send錯」都唔奇。又可以講講第三次面試經歷：終於有一次難得個agent嗌高價而間公司又肯見我，雖然地點好遠但有得試咪試，結果執到正一正用個幾鐘時間入去，全個面試唔夠半個字，因為上到去又係「老細出左去」就隨便搵個話到事出黎見，而且連表都唔使填資料間人事公司一早俾晒，而入到去位所謂面試官聽完自我介紹，再望望張資料，只講左一句：

「你之前做開個field唔多適合我地。」

就走得了。冇錯一身飲樣飛個幾車入去，就係為左聽間公司講佢地唔請你，面試？咩黎？所以而家搵工我只有話真係好睇運，任你兩文三語講到識飛寫作技能頂天立地，好多位連面試機會都冇，就算有機會上到去俾你介紹你份portfolio，唔係請marketing而見你係男，又可以拜拜。

所以我會敬告各位男性年輕朋友，純文科或純理科大學學位其實而家香港地冇乜特別意義，因為香港一早冇左中層工種呢回事，好似我噉只想搵一份簡簡單單萬幾蚊admin/supporting位都發覺超難。如果你係男人而想生活有保障，記住將來一定要成為以下三種人其中之一：一係你讀好多書讀到好專；一係你讀書唔成由低做起；一係決心投機可以不擇手段跑數。如果你會讀大學／大專，讀唔到高級專科或者商科，最好都可以學到一門專門技能，因為而家市場上其實好多較專門工種市場仲好大而且出手幾高加冇咁需要擔心係男人就唔請，修物流／shipping、會計同IT最實際最有長遠發展優勢，只選純文科或純理科的話，除左出到黎可以同人講「我係大學畢業」，就只有聽食屎的意思。讀書唔成的話或者索性直接向工程進發，入職業訓練學院做技工之類再一路考牌，因為一開始一定辛苦同唔夠人搵得多，但長遠計好多位唔係睇重你學歷而更著重手藝經驗，勞工處都成日搵到幾百蚊一日、20-40K一個月工程職位，人地大學生出黎做文職頭幾年可能好嘆世界，但到後來就會調轉羨慕返你轉頭。同埋記得一早選定，中途先轉field會好痛苦，呢樣野我最清楚，試問有幾多個似我有咁多工作經驗同咁強工作能力，就係因為個學位係教育出身「唔係我地個field」，搞到連面試機會都冇？