今日係佛誕，搵左兩個星期工，見係公眾假期就休息一天（其實冇分別，日日都放假架啦我而家）。本週重點係星期二去尖沙咀見工，仲要係星光行正正隻鴨隔籬，不過not a single duck is given today，而我in完返到屋企，夜晚隻鴨就話穿左要放氣大修了，再次證明地獄黑仔王絕非浪得虛名。想講，反而係九龍公園條漫畫星光大道。

．．．．．．講完。因為，真係冇咩好講。好廢。地點已經唔掂，唔係行柏麗大道經過樓梯見到有牌，都唔知道原來整左條星光大道。上到去，非常疏落完全冇氣勢，第一次黎行過都唔知原來係星光大道、原來係特色展品，只會當係普通藝術品公仔。唔敢講好熟港漫所以對選角冇評論，但每個人物只得幾句簡單講講就算，出漫畫導賞部份絕對需要做更多，而家主要得一段仔字仲要細細隻，我係外人的話，睇完都完全唔明個角色係咩人，有咩代表性，對香港漫畫歷史黎講有咩重要意義。而最大問題係．．．其實而家廿一世紀喇喎，點解好多應該本來畫風寫實派人物，手工用料都可以咁膠咁假？照計都係搵大陸廠做，但大陸廠出口俾歐美好多公仔係靚到真到你見到會嘩一聲，反而身為香港一條星光大道，搵埋堆廠可以咁削，只有九幾年水平？

對我黎講唯一可取係居然有海虎。講真雖然肥良憑一本《海虎》完全顛覆晒香港時裝／科幻武打漫畫發展路向，我真係完全冇諗過一個咁重口味人物有機會被接納為港漫代表人物之一。只係始終要政治正確，段文字簡介都話佢出緊最終極力量一百萬匹自毀級拳力，漫畫入面海虎時代出一百萬匹係肉身都頂唔順成個背脊爆開晒，唔係點叫「自毀級」呀，但個公仔，手工都算，當然唔敢爆骨啦，唔係俾人鬧「公仔書教壞細路」呀。（其實，擺明架啦，驚你又要整條道出黎？整又唔去到盡？）

條漫畫星光大道真係好廢，同海虎（＆其他好多打書人物）真係好樣衰，結果，我只同個海虎公仔一樣，好撚憤怒。