20/4晚相當重要。難得的年度metal大show，好睇到要打人，同今場咁多隊band都唔錯，睇得出香港metal band由之前幾年一直模仿外國練技術階段，進步到搵到自己聲音同性格之成型期，怒人唔使講啦，Evocation（終於）擁抱中華文化其實一早應該幾娘都係噉話，因為香港band成在國際性敗也在國際性只顧西化卻忘根，你玩得好但同人地一模一樣又點突出甚至點競爭呢，無論你嫌大陸幾老土始終中國歷史同藝術本身己有大量足以突顯地方同血統特色之取材可用，新碟風格未必個個鍾意，但對我黎講無論係好定唔好（我受），最起碼成功在而家你會認得到佢地。只希望可以玩更多五聲。

講一大輪，其實都唔係想講場show。係好睇到要打人又抵睇仲有怒人（不過Ken South Rock果場好睇好多）（同，佢地實際上都幾唔夾全場，哈），但Evocation睇左一半就走人趕返屋企，因為更重要係同一晚首播革新版《勁歌金曲》。《勁歌金曲》自從變左半個獎門人本身可以不理，但有謝安琪上去唱廣東新歌，兩樣都好耐未出現過，同有謝安琪就大晒架啦，好緊要架大佬。根本無記一早已經放棄《勁歌金曲》，睇連年度大事頒獎禮都取消就知冇當過音樂節目係咩一回事，死要吊住條命都係為應酬幾間大本地唱片公司嗟，大佬要搵廣告收錢架嘛搞綜藝節目要搵歌手上去表演玩遊戲撐場架嘛，真係一個林峰由頭頂到落尾咩 － 而且，林峰都係英皇啦，起碼要為一間英皇繼續燒錢做呢個節目。所以近兩星期見到無記大大聲話要改革覺得幾出奇，雖然話而家同之前反晒檯的四大關係好返少少（少少咋），所以連個節目停過一排都搬返出黎，仍唔見得有咩值得搞咁多色水去改變一個名存實亡又冇錢賺的節目。以前都做過一個鐘頭版，但正台只播半個鐘要唔知高清定收費台先有得睇全個鐘足本，所以唔知有咩分別，不過相信只係播多幾個MV dum波鐘，今次會搵鄭丹瑞做主持仲變到好似Music Nation噉搵歌手同業內人士上去清談，終於唔係白白痴痴玩遊戲，就有興趣睇睇了。

第一集已經有點新意，搵左三個唱片公司大佬加林欣彤＆Hot Linda BB同一個男歌手（明顯因為係仔所以我唔會記得叫咩名）講講經理人系統，都幾失望因為講得唔太深入，掟個題目出黎之後好多時主持同三個經理人大家傾，傾傾下就會兜左去好遠而且大多數只談及表面，歌手嘉賓又只得好少發言機會，結果冇乜帶到出黎，而我最想知係本地最另類主流唱片公司蜂鳥音樂內部運作，但當重點落在另外兩間大公司時佢發言時間太少。自從無記開J2搞高清台之後清談節目成為自製節目主線，成本低又易搞嘛合乎晒而家無線／樂易玲提倡的經濟效益，只係作為新開始已經衰左個頭，單以清談節目計都幾悶內容又未夠水準，之後發展相信亦難，唔通香港地你搵歌手上黎講音樂？就算班歌手識講觀眾都唔會（識）睇。真係要好睇同談得有意思唔該尖銳少少，好似請幾個製作人上去，劈頭就問雷頒德「點解你咁鍾意抄歌？」先至有意思。不過，無線夠薑咩？

而叫得《勁歌金曲》又點可以冇勁歌金曲呢，不過以一個音樂節目黎講，革新後歌唱所佔部份反而意外地少。頭三節每節只一位歌手出場唱一首歌，好是比唱足成首唔會縮短，壞是，喂，我單為睇吹水咩，真係想聽聽歌架。兩個男歌手唱就算啦而家香港冇幾多男歌手唱得好，唔使一面唱一面吊住吊住就黎斷氣已經好難得（今晚兩個都唔合格），當然我只會關心謝安琪，雖然一樣唔多夠氣但首新歌《最好的時刻》live叫唔差我收貨，始終而家佢唔係演唱會時期都唔會維持到最佳狀態，而最迷惘係開頭以為佢有份加入一齊傾，點知唱完就冇，講到經理人、唱片公司同藝人三者關係，居然唔搵佢同佢經理人公司講講？單佢點解之前同環球搞到咁僵、點解咁耐未上過無線，已經多野講到一集都講唔晒，再證明對於呢個新清談版《勁歌金曲》，真係唔好抱太大期望。而搵食工具勁歌金榜梗係唔會取消啦，呢樣野就同舊時一樣冇變到，就係邊個歌手有份做嘉賓而且最多野講，基本上榜首冠軍歌一定係佢拎，正如今晚就係林欣彤。希望只係巧合，因為呢條屎橋真係睇到悶，同埋而家報榜有兩個唔知叫勁歌baby定金曲天使的東西，嘩屌真係好唔掂囉彈鐘唔該。

對於無線再次認真對待音樂節目滿懷希望，只係以前唔係未試過發生同類情況同樣期待過，而結果往往都係失望而回。不過或者早已應該沒期待，睇今次復活版最革新唔係變到似Music Nation講音樂多過唱，而係講到點樣改變點樣重振聲威但最變革係搬到去禮拜六晚十二點三播，就知道無線實質上都係冇心去做好個節目，係有信心有心機做好，又點會放逐個節目去個根本冇人會睇的時間播？執柒左佢啦。