諗返，1) 原來好耐冇「認真地」幫襯KFC　2) 原來雞記好耐冇新雞上場。上一次已經係年頭個蜂蜜黑椒雞，當然主要因為個幾鬼AV的廣告啦口桀口桀（不過是好食的），跟住冇咩新意走返成日翻炒舊款當新貨條水。等左三個月終於有新野越南牛油雞 － 唔知係咪新總之我未見過就當係新野 － 又有藉口去食食。不過好難，唔係難食，而係難搵到黎食，你知香港地KFC執剩冇幾多間。

以而家指數同KFC價位黎講叫抵，$36有一大兜雜錦炸薯仔加一盒辣雞粒，最重要唔使食好鬼難食的蘑菇飯，而且食得飽，我覺得呢三十六蚊俾得值，而且我係去油麻地Murder King樓上間KFC食，唔知係咪人流都幾多所以去貨去得快，兩件雞夠熱又新鮮非常開心。不過個牛油雞少少失望，因為其實只係原味雞上面灑牛油粉，都好香好重牛油味而且因為新鮮熱辣所以好好食，只係初頭以為係成舊雞浸落牛油炸之類整法，點知只係落粉覺得有點取巧。

所以食到尾，都唔太明點解個收銀姐姐會俾隻匙我。我又以為牛油雞好似粟米，佢會俾盒牛油我自己搽上去，先至有隻匙。等我食果陣係噉搵盒牛油去左邊。