熟悉劉Sir的朋友，唔難估到點解佢會買呢本點睇都係潮物的《100毛》。老實個名改得好差，只會令人／我諗起五毛，同今期流行的「五萬毛」。按官方解釋，「毛」即「Most」，即係「最」，即係咩呢，其實我都唔太清楚，簡單黎講全本雜誌由一百條「毛」組成，「毛」可以係一篇文，可以係幾句話，可以係幾粒字，可以係一幅畫一個公仔，真真正正俾條毛你，睇到第一百條毛（＆大量廣告）本雜誌就正式睇完了。一個我覺得好鬼造作但同時好鬼佩服的新穎gimmick，配合現今網絡大眾多圖少字短而精TL就DR寫作＆閱讀風格，順便可以將一切偷工減料合理化型格化，醒到爆炸。再加埋真係好靚好光鮮的美術同排版，同必須要睇見好似明又唔多明的書名，就連賣十蚊本但size算細又唔係厚都可以包裝成係「型」的一部份，一本潮流雜誌所有必須的成功元素，《100毛》通通齊晒。單牌面睇，我已經覺得呢本野有排玩。

毒撚從來唔買潮流雜誌，但會買《100毛》創刊號，除左出書果朝上大陸就豪十蚊執本上船消磨時間，當然啦講音樂的封面都係大原因，雖然係香港新一代歌手加我唔多鍾意果班，但起碼肯用音樂做專題而唔係任何潮人潮物已夠俾個理由我支持（而且，十蚊嗟，中伏都唔太傷）。主題係可能成為今代經典的幾位新歌手，講講佢地心目中的經典同抱負，文字同內容都高手級數，我唔太聽本地流行音樂都叫收貨，更期望可以用相同水平為本地獨立樂隊做專題（但唔好係叫班樂隊著潮衫潮鞋crossover做商品宣傳為主音樂只係隨便幾句果隻唔該）。跟住大堆「毛」其實好冷知識，例如中間講錢部份係幾過癮，不過咁飄忽冇乜焦點，鍾唔鍾意真係好睇有幾多條毛中到你喜好。而好在，唔太多毛講商品之類，最怕變成廣告雜誌 － 暫時未嗟，我相信總有一日會，此乃潮流雜誌的宿命。

個頭開得唔錯，可惜去到後半開始失控。另一潮流雜誌宿命就係為顯自己有內涵同文藝，必少不得大量好似好有態度、好似好感性、好賣弄文字的後現代式寫作，而《100毛》後半本就係搵一大班人每人俾條毛你，而毛呢家野新一代唔鍾意睇字嘛自然係短啦甚至只得公仔啦，結果一大堆毛各有各吹吹得又點到即止，唔一致冇方向又皮毛我只覺得好鬼死亂甚至唔知做乜。

越睇越熟口熟面，又或者話越覺得唔對路，後來發現，原來《100毛》搞手就係《黑紙》班底，而我從來唔鍾意《黑紙》，難怪去到後半睇得好辛苦再狂飛。你可以話《100毛》就係《黑紙》完成版，好係因為篇幅多左總有好文章拉上補下而具一定閱讀價值（再讚，今期封面專題製作得好，同美術好靚）；壞是，始終都係《黑紙》，總有果陣除。但睇返正正果陣除令到一張紙可以俾人捧到上天成為一本雜誌，我相信文青會好受《100毛》，從而長做長有。可惜我只是一條毒撚。