今晚好似無線台慶。即係又到年度飛機之夜。平日睇《東張西望》幾個主持講到自己台堆劇幾勁點點點，根本全香港得返你一間電視台劇一早拍得爛過屎，難得可以打恆晒飛機打到好似全國關注，一星期打五小次，年底再成個台打一大次，自從無線自己搞個只得自己台參加但講到代表晒全香港的頒獎典禮（雖然事實上直到今日，的確只得一個香港中文台有拍劇），亞視面皮再厚都難以匹敵，因為亞視頂籠只係柒，無線已經去到戇鳩的地步。當然總要有乜觀眾先至會有乜台，見到好多人又要屌又要睇，睇完屌完又要去投票同無線一齊癲 － 呀應該話幫無線打飛機 － 難怪無線呢舊垃圾永恆不滅。政府再唔發牌俾Wiki Wong，除左六合彩，我真係諗唔到點解我仲要睇無線亞視中文台，新聞都睇有線同Now啦唔通是是但但香港良心咩。

「利申：我間房就係客廳所以被迫要睇好多狗屎垃圾，亦因為噉先深徹體會到無線製作有幾垃圾。」

繼港姐之後今次連劇獎都搞全民投票，就算唔似港姐話「俾人hack」結果得個柒字，既然乜都係內定事前又唔使公佈，數呢家野總可以自己做。就當無線真係香港良心咁正直唔做手腳，呢種只計名氣不計質素之娛樂圈選舉，咪又係邊個fans多or邊個人有後台邊個贏，睇林峰就知，換言之任你點投最後名單都係跟住無線自己高層內定果個，實在唔明點解咁多人仲可以咁得閒咁熱心去投票。我當然冇興趣投，因為眾所鳩知，講到近好多好多年、多到你都唔記得應該由幾時開始計，真係稱得上好之無線劇、港產劇，根本只得《天與地》一套。睇非婆媽類外國劇，包括日劇韓劇歐美劇，唔只係得娛樂哈哈笑咁簡單，睇完你可以同人就技術（攝影、剪接、配樂、音效）、演譯（故事、劇本、導演）同深層意識（社會、政治、人民、哲理）多層面作出種種談論；但放棄技術、永不創新、更加唔會有任何內涵的無記劇，永遠只餘最表面八卦層面，睇完之後只夠你同師奶同港女傾偈。單呢一點，其實電視劇本身理應做到之一點，已經令《天與地》足夠贏盡無線前後十年任何一套劇，有趣在其實《天與地》內裡都離唔開爭產、爭女此類「無線方程式」，點解偏偏可以成為神劇？最簡直解釋係，因為唔婆媽。又或者話，點解香港好似好多年未出現過唔婆媽的劇集？

自不然唔會理個咩「全民投票」頒獎禮，我覺得會睇《天與地》班人係本身唔會睇無線劇只會睇外國劇果班，所以無線搞乜都好真係睇果班根本唔會參與，只係俾面派對唔係真正反映民意投黎做乜？再者參與都冇意思我就唔信《天與地》會贏到，就算有關提名真係得票率最高，無線總有理由唔俾獎佢，因為拍果班台前幕後好多都直接或間接俾佢趕走晒，而如果呢套由棄將製作，無線赤化加柒化之後最政治正確、最叫好不叫座，簡單黎講即係最唔無線的無線劇，掟入倉幾年之後先拎出黎擺全年最淡檔期播，居然都贏到全年最佳劇集，無線咪即係自爆自己咁多年黎根本只得一套劇唔係垃圾、自己台根本留唔到真正人才之事實？

其實想知道何謂真正受歡迎、真正得人心，好簡單。無線已經好多年未出過一套劇，播完一年甚至半年之後仲會有人拎出黎講，而《天與地》畫面同對白仍然成日有人重提，亦相信可以永久流傳，而家仲耐唔耐聽到有人哼返句「如果命運能選擇」，《年少無知》亦成為新一代社會運動主題曲之一，情況就如《海闊天空》一樣，雖然《年少無知》歌詞有點早已妥協意味，社運唱實則唔多老黎。睇《天與地》之外仲有邊一套無記劇做得到，咪知道乜野叫做受歡迎同深入民心囉。

相信無線永遠唔會重播架喇，襯住聖誕節幾日假暨一週年，自己屋企重溫煲晒佢先。至於而家，廣告時間，再重提呢篇網上瀏覽量已經以萬甚至十萬計之《天與地》論文：

估錯左，唔知係好事定壞事：《天與地》居然真係贏到最佳劇集。第一個反應當然係「冇撚野下嘩。」宣佈果陣好明顯陳豪反應同我一樣。然後之前狗屎垃圾獎都超大反應的各位無記演員，粒聲都冇。而作為壓軸大獎，台前幕後同主持居然可以處理得咁平淡，好明顯無線頒得好迫於無奈。唔怪得之前咁多個獎死趕爛趕唔俾人講野，係頒最佳劇集之前，無線先至猛咁叫班垃圾司儀四圍搵人問大堆垃圾問題（當然問極都冇人敢講《天與地》），就係為頒獎之後可以盡快完場出字幕，擺到明低調處理。而最灰係，拍得出《天與地》加所謂民意選出的編導兩老上到台，好似好多野想講又唔敢講。無記，真係惡晒。

最唔明既然今次係「絕對保密既全民公開投票」（好撚諷刺），都唔會公開票數架啦，全民投票為名實質上絕對可以同往常任何一年一樣控制結果，按道理冇乜理由會俾《天與地》贏最佳劇集？係咪真係因為蘋果日報加高登力量帶出的真正民意，大到連無線都要肴底？還是Wiki Wong X HKTV都有壓力，令無線乜獎都可以做馬，最少最佳劇集要交代返俾人睇，佢地都係一個重視質素唔係只得垃圾的電視台？當然當中可能又係關係到錢：演員拎獎，無線可以吹水講到視帝視后點樣威順便接更多job再抽更多佣，是為財路也；劇集過去左就冇，頒俾邊個其實除左面子唔會對生意有咩大影響，如果以一個好難做馬的獎項，為其他商機大得多的假獎換取公信力，其實非常化算。

頒獎半日之前先至講到，「拍果班台前幕後好多都直接或間接俾佢趕走晒，而如果呢套由棄將製作，無線赤化加柒化之後最政治正確、最叫好不叫座，簡單黎講即係最唔無線的無線劇，掟入倉幾年之後先拎出黎擺全年最淡檔期播，居然都贏到全年最佳劇集，無線咪即係自爆自己咁多年黎根本只得一套劇唔係垃圾、自己台根本留唔到真正人才之事實？」 我開始信今個禮拜五真係世界末日。不過見無線頒獎俾《天與地》頒得咁勉強，出黎領獎時領獎陣容同在場所有人反應非常冷清，同之前任何一個獎成超大對比，就知道大家過到世界末日的話，無線都只會繼續拍更多垃圾劇，唔會再有另一套《天與地》，連接近都難，全因《天與地》肯定係無線方勉華＋樂易玲時代，最唔想頒的（壓軸大）獎，佢地眼中無線歷史中最大污點。大家不其然會對Wiki Wong充滿期望，但又諗返起一年前人人讚《天與地》時，香港只有三班／個人意見相反：師奶、永遠覺得自己見識高過人的自我感覺良好人士，同埋王維基。佢果陣彈《天與地》可能純粹一時之氣，但講左就係講左人人都記得，如果而家自己開台拍劇走《天與地》路線或以此為目標，咪會好樣衰？

對我黎講今晚最感動唔係《天與地》贏到，而係冇諗過仲有機會電視機聽到《年少無知》。相信係絕響了。之後的節目，係上高登睇各位「如果《天與地》贏到我ＸＸＸ」的巴打找數／走數。咦好似有人話《天與地》贏到會去尖沙咀裸跑喎。