每週一相片大行動

2012 Week 50

Skid Row Nostalgia Day 1




琴晚去完Hidden Agenda睇show(當然係為捧「香港Carcass」又稱「大角咀Opeth」的Synergy場啦),回程又見到呢個每次觀塘返歸都會經過的譽.港灣,雖然位置係新蒲崗,但過返少少九龍城都見唔少同類「豪宅」。想知香港炒樓炒到幾勁,睇連九龍城呢種低收入老人區,成街六七層唐樓中間無端端可以插棟個名唔加返個點就點都唔似樣的二三十層高所謂豪宅,就知道炒得幾咁旺,而且價錢確實幾豪,居然呢種舊區新豪宅尺價都可以近萬。只不過,其實有冇人真係咁戇居會搬入去住?內籠酒店咁靚,但一望出窗口全部溶溶爛爛四五十年舊樓,朝朝一起身就係對住人地天台萬國旗,落到街大門口左手邊係牛肉檔右手邊係魚蛋粉一地洗舖水,過多幾年附近堆舊樓俾人收晒重建時四圍都係地盤日日打樁,都咪話唔心曠神怡。


可能正因為噉,每日返工都會經過一間地產代理對足幾年,由門口貼住九龍城二手樓百幾萬一個細單位,去到業主三百萬放盤都話抵買,呢幾日直頭執鬼埋。心想「好野地產霸權終於收皮」,但諗深一層,如果唔係因為而家九龍城二三十年樓齡三四百尺單位尺價都拍得住你一個月人工咁高,連呢種「平樓」都冇人買得起,佢地又點會冇生意搞到執笠咁灰呢。回想細個果陣,九龍城同土瓜灣真係社會低至中層集中營,最多人住(屋)村即係公營屋,上到私樓同人講住XX大廈已經算巴閉,搬到入花園就直頭係有錢人家,因為我地七八十後一代,大半人屋企收入只夠住公屋或居屋。而家屋村、大廈同花園通通唔見晒,只餘幾個不知所云名詞或形容詞加個點拼埋就話係屋苑名的豪宅,即係你一係就唔好住一住就要住到最「豪」,為炒而起時,又有幾多人住得起?所以我地今代人真係陷家.富貴。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual