畢業之後，好耐未講過「完美的一天」呢五個字。想當年讀教院除左第一年之外 － 人地大學final year最忙，教院調返轉入去第一年讀到你死之後一年比一年得閒，臨尾兩三年好多時返學校唔係上堂做project之類，係做part-time或者落大埔／上人地hall由朝玩到晚。出左黎做野就冇幾可享受呢種悠閒，到Dark Funeral黎香港的大日子，見剛剛跟完上月底fair大壇野叫得閒左，就當為慶祝之前一日居然返工冇遲到（．．．），自製返日完美的一天先。

Prelude：仲話要食茶記早餐，點知搭正十一點先起身，到頭來變左直接出去食lunch。因為夜晚觀塘睇show就決定晏晝去淘大影藝睇戲，當去開幾間雞記都執晒時，難得淘大仲有就要食餐好耐未食過的KFC。就中伏了。去雞記咁多年，你有冇食過完全冇辣味的辣雞？我今次成世人第一次食，同食完全冇味道得個咬字的吉烈雞冇分別。唔怪得成個晏晝隔一陣就有師奶走出去同經理嘈一大餐，睇黎中央廠整辣雞時成水雞都冇醃到，呢個禮拜KFC應該俾人小到爆炸。難怪KFC沒落。

但沒落的好處是就算最繁忙的繁忙時間去到都一定搵到位坐，而且唔幫襯都冇人趕，好多連水都唔拎得個坐字嘆冷氣的阿伯阿婆坐左成個晏晝。而家邊有呢種地方。所以九龍城廣場間雞記執左我真係好鬼灰，除左冇得食，仲少左個比圖書館更正的免費室內冷氣蒲點。

《新鐵金剛：智破天凶城》：其實我好少睇007，呢套更加係成世仔第一次入戲院睇，不過後半有點失望 － 又或者話對呢個摩登版007失望。時局所向，就如戲中自嘲而家唔興乜野高科技秘密武器偽裝道具，「old-school 007」時代已經過去，近年好多舊派片或老字號好似《轟天猛將》，都鍾意講呢個英雄遲暮主題。所以而家鐵金剛已經生晒鏽，唔再似以前一個打十個再孤身勇破惡黨，而要打輸要俾人迫到敗走再戰且進且退 － 話時話「勇破ＸＸＸ」從來係007電影中文譯名傳統，今集要「智破」係咪已經意味左而家唔再勇，包括已老的007不再復當年勇同而家唔興勇，而進入智慧型年代呢。其實本身由超級型變真實型一樣可以拍得好，由開頭去到聽證會都非常精彩，但之後變左槍戰被《Home Alone》就十分無奈，雖然我鍾意真實型戲路，但唔係每一種戲每一個系列都適合真實型，大家睇鐵金剛就係為睇佢點樣勇破。但相信冇乜可能走返超級型路線，一來講左啦唔興，二來睇套戲個格非常《Dark Knight》，自從Nolan重拍蝙蝠俠，乜野超級英雄類戲都唔可以齋打而一定要玩局。「智破」也。

雖然唔算我杯茶，但下一集上好大機會繼續入場。之前一晚先睇完水準甚至超越一般懸疑電影的《Sherlock》大結局，同007一樣講英國講倫敦、又係玩智慧型罪犯處心積慮佈局，雖然打得少但呢種英式戲路我幾鍾意。同埋攝影真係好完美。即係如果唔係為左闔家歡搞到而家又少女又少除衫就更好了。喂，唔理你真實型定超級型，乜007唔係應該身邊一定大把正女，同有正女出場就有得扑咩？

Interlude：夜晚先睇show晨咁早出黎觀塘，就係為左一次過煲晒《鐵金剛》同《寒戰》。睇完007之後其實可以唔使郁，因為《寒戰》就係同一間院播，又買埋差唔多同一個位，而且兩套戲時間相差唔夠半個鐘007播完字幕已經開始入下一場，我起身換一換位就已經可以了。當然唔得啦點會唔俾人趕，結果睇完後門出兜返去前門又入過相當戇居。所以途中順便去麥記買個黑椒漢堡入去當晚餐。而家好鍾意蒲影藝就係因為地方就我腳，價錢平過好多戲院，畫面唔差（螢幕再大少少更好），音響勁（睇動作片可以炸到耳仔沙沙聲），冷氣勁（應該話超勁），附近又多食肆可以買埋野食入去睇住嘆。

《寒戰》：或者期望太高，睇完《寒戰》離場時有點失望，唔好誤會真係好睇尤其前半，劇力足好似睇緊西片，係絕對值得入場捧場的難得優質港產片，單睇梁家輝神級演技已經值晒，廉署俾人鬥跟住反客為主玩返人轉頭果野完全拎獎級數，後面煙花做武器又諗得好成條香港龍都炸爆，同埋講緊法治非人治先係真正香港核心價值，咁熱血睇到大家更加懷緬97前的香港。而唔入場理由可以俾兩個你。一係攝影，除左幾個飛空shot攝影同構圖好悶。二係如果你屬於好挑剔劇本果種人，要乜都好完整冇乜漏洞全部謎題解晒出晒腸，就千祈唔好睇《寒戰》，因為拍得好但仍犯好多港產劇情片常見過失：前半玩到好大好吸引，大到後半先發現自己根本玩唔起，結果柒晒反高潮，例子呢既然呢套見到郭富城就冇理由唔提提《殺人犯》啦，不過放心《寒戰》唔係爛片，因為唔聲唔聲原來（最少）兩部曲黎，所以今集點爛都唔解題都唔係爛，只係留返跟住（幾）集先話俾你知點解嗟。

就算擺明未來解題，好多野仍然覺得好不足或留白太大，好似一開始百老匯爆炸有點無謂，後面都出現過炸彈，但完全冇提百老匯果單好似冇發生過冇諗到會有關連，結果第一幕爆炸戲純粹為令個片頭好睇營造大片格。去到後半又全部野突然去得好快同好多過程細節通通忽略，好似查汽車炸彈一查就立即搵到係邊班人做加所在地係邊成隊飛虎隊已經上緊去，未免為完場而趕得太急。庫房無端端唔見左幾千萬，居然好似冇乜野冇人要負責。同講到大佬有千里眼咁神、成個幕後勢力大到你唔信，後半成個局同人物性格全部變晒，好似林家棟明明十分精明，最後做埋晒完全唔似佢會做的蠢事蠢死左。話彭于晏IQ 192，真係唔似囉，同如果你有192 IQ，入到警隊要做散仔咁戇居？就好似愛因斯坦唔做大學教授走去教幼稚園一樣咁唔合理咁唔現實。最無奈就係永遠唔知匿埋邊度的大佬神到連你行路行到甩鞋帶都知，條靚智商192，仲有超大勢力咁有才智咁多線眼，會諗唔到正派破局條橋？而且，如果你真係咁勁咁呼風喚雨，點解只會謀住警務署長個位咁冇志氣咁冇遠見呢，望都望港交所所長、金融局局長或者特首啦下嘩．．．而家講到得警隊得天下噉款，就好得啖笑。

同樣得啖笑係，嘩唔睇都唔知原來香港紀律部隊全部咁後生咁多索女，好似林家棟有佢（不過出得幾幕樣都要甩晒焦睇唔清楚，身材更加冇可能睇到啦），而潮流興平行宇宙，同李治廷拍眼鏡廣告條女黎到呢個時空變左佢廉記同事。當然唔少得劉華動作很劉華。即係你話做公關真係咁省鏡我接受到，但連做前線隨手執件都靚仔靚女署花局草級數，會唔會超現實左少少呢？導演好明顯想走杜琪峰戲路，但拍出黎差咁多皮正因人地明白寫實呢回事，請黎一班通通係演得出角色韻味的戲骨，而唔係model偶像派，觀眾自然投入得到。

雖然今集差唔多乜都冇解過＆臨尾大大條伏線，我反而希望佢爛尾算數，因為乜都玩到咁神化，好擔心到頭來搵唔到合理解釋搞到自己柒晒，就如乜都好浮誇配音又完全夾唔到口形的彭于晏同完全唔識做戲的李治廷一樣。如果要我估，雖然今集係正派，但會唔會最後幫本書摺角再交俾個仔、個仔睇完會笑騎騎的梁家輝先係最大大佬？保安局劉華叫副警務署長郭富城非常時期要用非常手法查案仲俾左份內部文件佢，但ICAC查佢時話保安局唔認俾過份文件郭富城（我記得好似係），其實係咪暗示左劉華都有份造佢，原來香港保安局係終極大佬？同，到底點樣可以隱形追蹤一個人，跟到連甩鞋帶都知？唉越諗越唔對路，唔該唔好變成另一套《殺人犯》呀唔該。

如果未睇又未決定睇唔睇，放心民建聯成功爭取團購$20張飛，醬油搵唔返喇自己上Facebook摷啦，但非常有趣民建聯咁多套戲唔揀反而會搞《寒戰》團，因為套戲支持法治反人治擺到明小爆緊而家特區政府：一開始炒車單野明係講緊包致金姪女啦，然後曾班子同全世界講香港成功全因三權對立全靠法治，臨尾只得香港政府自己認受的飛龍標誌炸到爛晒飛埋落街真正港府仆街，咁政治不正確咁美化前朝咁鼓吹港英時代管治民建聯都撐？反了反了。

Dark Funeral Satanic War Tour: The Return：雖然風聲吹左好耐，相信好多人同我一樣，發夢都冇諗過站在一線頭的Dark Funeral巡迴香港站真係搞得成，論資歷同名聲，這可能是香港史上最大indie metal gig。而家好少可有心機講gig，所以略提算。

． 好耐未睇過有化妝的band show，唔知好事定壞事。

． 前三分一基本上只聽得清trigger味好重的鼓同歌佬（唱得超強，把聲勁入咪，實力也），好在跟住較得到靚聲，特別最後幾首，但又同Unearth時一樣結他聲好低完全唔出，唔知係咪特登推低。雖然black metal本身玩音牆，但有時亦需要突出音色黎表達旋律同撞聲，尤其thrash底較重的歌。睇黎新HA非一味靠chok靠breakdown的metal show唔容易搞得靚聲。

． 另一遺憾是，點解冇opening？

． 企爆半場，但仍比我想像中少人，冇計啦除左black metal本身連圈內都屬小眾（面對吧，好多時開口埋口話自己metal友果班，好多時係metal視野最狹窄果班），之前Unearth都提過想而家的老細們俾多過兩百蚊睇一場indie gig簡直是自討撚吃，今場仲要連opening都冇，「$280睇一隊唔係大band」，好唔抵囉。

． 雖然今場冇影相 － 一來冇乜動力，二來新HA個場實在太難影相 － 挑返起舖癮，決定寫好一年前仲未寫的Alcest。

Postlude：自從上次睇完Unearth成班人走過大街對面食茶記，而家出黎HA睇show前或後一定要過黎食返碗餐蛋麵，$21超平又要多料加好食仲要坐住街邊食實在是人生一大享受。不過有點唔開心，點解Dark Funeral係要揀星期二晚出呢？搞到錯過左集就黎到大結局的《Alcatraz》，同真係今晚大結局的《Perception》，最灰無記官網乜都有就係冇得重溫幾套明珠台美劇，上網都搵唔到就喊了。

「Stan哥我地總有機會再見面的，最少我一定會去7/12 Iwrestledabearonce同22/12 Masquerader。」