每週一相片大行動

2012 Week 38




新一輪食肆減價戰,Murder King is the king。其實唔算咩戰,早排歡樂冇江華全城商戶劈價慶祝唔計啦,今個2012開學檔期,真正搞大減價得三間:吉野家廿蚊個飯,其實同延長下午茶時段冇乜大分別;大快活借「懷緬七十年代」為名賣$4一個飯,以佢地正餐一個套餐收你四條黎計絕對抵到爛,不過分五日每日一個指定地點限售幾百個,連排開隊輪米班阿婆都嫌麻叉煩你就咪鬼搞啦。唔該學下人地Burger King $10一個包一杯細汽水,加$6俾埋細薯條,雖然賣得三日但無限量供應,先係捨得借特價賣廣告宣傳之餘真正回饋街坊。


天意就是減價頭兩日一連兩晚睇《子彈危機之消失的真相》,所以兩晚都旺中地庫Murder King搞掂。第一日特價包係辣雞堡,諗住會好多人啦點知仲少過平日,連十蚊個包都坐唔滿個場,本來諗住買個包入豪華食,而家可以坐低嘆埋先出發。不過個辣雞堡唔算特別好食一般貨色,薯條改左粗薯條同舊時一樣咁好味,不過太少喇唔值加六蚊 - 薯條變粗,我覺得係個陰謀。


其實係咪得我一個唔知道辣雞堡麻麻,所以第一晚先冇人黎?第二晚輪到香辣豬柳,「嘩頂做乜野事」,琴晚人都唔多個好地地,今晚條隊幾十人上百都有排到要企樓梯,排果陣前面一路有人排到嬲走人,都要排四個字先買到個十蚊包,排花時間但買好快,因為相信今日十個人黎十個都係買同一個包所以大量製作,我收到個包新鮮夠熱十分開心。絕對比辣雞堡好食,麥記豬柳偏鹹而Murder King豬柳賣點係十分香辣,加埋新鮮熱辣單鬥豬柳麥記輸足幾條街,所以食第一啖就後悔點解只買一個,即使豬柳上面放兩個洋蔥圈有點無厘頭(好似係洋蔥圈,食完我都唔知咩黎),個包實在超級地好味,而且十蚊個買多兩三個食唔晒當第二日早餐下午茶都抵啦,可惜太遲了條隊一直冇縮短過,即係想再食就要由門口排起排多四個字隊。


好耐未食過Murder King,除左而家貴得黎縮水亦唔多就腳,不過今次挑返起舖癮,希望佢地肯再出豬柳蛋漢堡...呀唔係應該叫豬柳煎蛋堡,真係出仲要劈價的話實走過黎無限幫襯。不過係就唔該快手因為好擔心會再撤出香港,早排去大會堂睇SIU2先發現大會堂附近間中環分店執左,而家賣十蚊個包先再遇當初重回香港盛況,好擔心Burger King - 最少旺角舖 - 捱唔過今年。


後記:因為食一個包唔夠喉,再排四個字隊買多個又戇居,旺中穿大角咀去奧海城時經過公司樓下間七記,打算加入今期高登劣食團一試七十一個芝士撈麵有幾難食。點知間七仔話冇芝士。我鍾意芝士又鍾意撈麵,睇有冇機會見識到呢個傳說中食到喊的芝士撈麵先。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual