有幾多次立法會選舉之後，大家心情會好過？所以選舉正日屋企條街深夜停電係好事，夜晚落街買完飯投完票，食完沖個涼就可以安心訓覺，如果睇埋結果先訓可能仲唔安樂。事實證明，停電停得好。

我諗今次選舉一大啟示係民調其實冇乜用。好似我九西，選前民調黃毓民一直由頭帶到尾，選到出黎都係贏，但由第一變成第二民建聯帶返頭個幾百分點，鼠王芬再以一千票贏民協奪最後一席，理由大家都知。而家香港只得四類人仲會投左仔共派建制幫，第一係最有錢果堆同既得利益者，即係全港最頂果幾%及其關係人士；第二係本身讀書少冇乜學識，遺憾地我地今代人好多老豆老母屬於此類，加送大量無知師奶同MK仔女，國民教育真係推得成的話會更多；第三係根本完全識政治連選舉係乜都唔知果班，除左出晒名包食包接送的阿伯阿婆，今年新加盟青山院友；第四類係共派票源，一定聽晒阿爺話的新移民、雙非、居內地港人源源不絕；簡單黎講香港左派選民來自社會階層最頂果班，同社會最底果班a.k.a.俾最頂層煽動控制果班。

泛民票源基本上集中社會中層，因為有思想有學識自然明白事理，所以投開民主派其實都屬鐵票，支持激進派更加鐵過唔鐵。問題係民調關注對象亦只以中層為主，你有幾何見過電視台問個阿婆投邊個？而香港社會早從Ａ形變成Ｖ形即中層人士比例遠不及高及低層之和，單比投票人口已經輸左（消滅中產是有理由的），任你鐵得無可再鐵又如何，鐵票都要一個個人噉拉，人地直頭係鋼票一車一車送入場，唔係鋼成噉蔣麗芸邊有可能倒贏毓民近萬票1.X%？黃洋達最灰，論壇表現出色網上人氣破頂，相反佢最大對手謝偉俊參加論壇連自己參選果區係咩區發生緊咩事都唔知，最後照一車車阿婆投佢票憑多千幾票收你皮，你叻仔你醒又點呀我戇鳩都贏你呀吹咩。所以民調時點樣樂觀領先人地幾多無大意思，左派單靠民調範圍以外之種票鋼票，已經足夠帶黎幾個百分點之關鍵性、逆轉性改變。大家只有恨鐵不成鋼。仲未計選之前話有十幾萬年齡層屬泛民派為主選民無端端俾人取消資格。

當然仲有擺明搵笨的比例代表制。今屆選舉聽得最多就係「我投袁彌明你做乜俾慢必我」，比例代表制之荒謬正是少少票都有得贏反而多票可以輸，同你投果個贏左都未必當到選。每張名單基本上只得排第一果個有機會贏，排第二你俾幾多票佢唔會跑出得到只成浪費，變相限制每黨只可以俾一個人參選，只要計住數邊張名單第一位夠票，其他全部投另一張就可以贏最多，所以泛民收到一百萬票贏左十八個直選議席，建制派少三十萬票即三分一但只少一席，你話戇唔戇鳩。證門香港研究協會、蛇宴同旅遊巴多麼重要。起初我希望一人兩票新制會令好多俾民建聯唆擺的阿婆投錯票，但事實證明難有大影響，即係衰Ｄ講句，一日香港仲有阿婆，邊個區多老人院，果個區民建聯就冇得輸。

劉江華輸左普世歡騰，但今次香港贏唔到，雖然高登力量捧出左打正旗號維護本土文化利益的范國威（如果我有得投，我果票都會俾佢），但保唔住陳淑莊同余若薇；新界陳偉業同梁國雄高票當選，九龍黃洋達以非常之微輸俾謝偉俊，兩邊都係輸在左派鐵票種票，同好撚仆街的比例代表制。同我唔明點解仲會有人投俾姓田一家兩兄弟都入到。回歸之後香港教育成劈屎噉，除左李國章同羅范仲有語常委田北辰，搞母語教學將學校中中英中標籤化，跟住仲話要普通話教中文科，好在搞唔成，但已累死好多學生家長先生，如我。最抵死係上電視屌人點解要鬧香港教育制度、鬧母語教學唔好，但自己四個仔女都係外國讀書，「外國先生用佢地母語教書，所以我班仔女都係接受緊母語教學。」富黨自由黨禍港良久，四年前全軍覆沒點知今年入得返，如果你話好多人支持田家係因為佢地有上港台節目所謂體驗窮人生活，就覺得終於放下身段知道民間疾苦好感動而過票田家，智商同拎完月餅食完蛇宴就去投票俾民建聯班阿婆冇分別。

個人最灰係民協輸左。我區區議會多年黎都係民協主場，地區工作亦做得好唔似CY選到就罷就理西你感受，但黎到立法會都係勢危。而家個個候選人都話告急，朝早誓完師食完晏晝飯已經告急，睇佢地廣告見唔到政綱理念只講告急，即告急已經成為政綱一部份。黃毓民講得好，如果你係政綱夠強立場堅定人地點都會投你，要告急乞票即係你本身已經唔掂啦，而且好多候選人選舉日未到已經買定車廂「告急」廣告，告急呢家野已成狼來了。唯獨相信民協冇呃我，因為對手真係好強，毓民親身上陣、民主黨必贏、公民黨毛孟靜、仲有兩張民建聯，基本上全區五席早有所屬，所以全區得佢地一張名單橫額寫住告急，「亡黨危機」，我會信真係咁大危機，結果民協僅差一千票輸比乜叉野西九新動力丫挑民建聯你就民建聯啦鼠王芬。資歷又點地區工作又點政績又點？即使民調你憑聲名憑政績超前1%，實際投票時人地一架接一架旅遊巴超返你3-5%，使乜做野使乜咁辛苦參加論壇使乜企街拉票，咪又係一車阿婆收你皮？

所以今屆2012立法會選舉，最大啟示係香港真係冇得救。今次選舉其實天時地利人和有齊，之前半個月反國教反到全民大團結，選舉前夕一連兩晚十幾萬人圍政總一時無兩（可惜選舉日凌晨CY幾句就令成個集會爛尾爛得爛無可爛我唔想再講），投票率歷史性過五成，以此時機加聲勢都只保到泛民24席仲要幾名大將落敗，而香港人盤沙出名散過社民連我唔信仲會出現幾十萬人同心之景，我覺得往後立會選舉難再有大突破。而且左派好多古惑招大家投幾多年見足幾多年早已習以為常，舊時起碼叫知道自己身有屎遮遮掩掩，今次鐵票入場已經大模斯樣到掩飾都廢事，候選人「我唔會回應」，「我自己冇做，但助選團會唔會有人做左就唔知亦控制唔到」，即使電視報紙訪問晒影晒相有晒證據，政府都係唔會查，受理都會同之前種票一樣無疾而終，到頭來除左一如以往講句「係噉架啦」，大家仍然乜都做唔到。

長此下去，立法會選舉淪陷，指日可待。香港人，你只餘兩條路，一係搞移民，一係聽食屎。