邊個諗到李氏力場長立不下，居然撞到十年一遇的十號風球？今個波都算搞笑，本來冇人睇好掛三號都嫌佢高，點知夜晚無端端可以上到十號。不過打到十號又點丫打到一百號都冇用啦，全世界都知道香港颱風從來辦公時間內是放假的。八點半起身，打個18503知道八號，不知幾開心幾耐未試過八號以上唔係凌晨或者禮拜六日，居然有假放立即撻低繼續訓，以為梁振英為挽民望終於出到撤力場呢招今舖值得投共之際，十點幾老豆部股票機響就知咩事，關乎到金融大局，從來股票機係繼天文台之後最快最準確的天氣消息來源。等我一早計劃好晒今日點玩，琴晚臨訓前直頭佈晒陣起身開芒篤篤個keyboard立即有The Smashing Pumpkings全線加Diablo，玩到悶晏晝可以出去睇蝙蝠俠，噉時間噉天氣IMAX都唔使同人爭。點知個十號到頭來都係昆鳩人的。

其實老豆冇開股票機都唔會唔知，因為次次打風都係一改掛三號，五分鐘內必定收到老細電話叫你兩個鐘內返公司，我起身走去爆石，兩三個字電話已經響左好多次。食完早餐換好衫出門口之際，先再收到老細電話皇恩浩蕩批准返兩點，都唔知小好定唔小好，嬲嬲地行路出旺角買個雞FC先返公司。冇錯落左波加仲有少少雨都行路唔搭車，因為勞工法例「落八號波後兩個鐘頭需要返到公司」之規定，根本就是搵笨柒的，要全香港同時返工、大家一齊兩個鐘之內返到公司、仲要各交通線總站落波先開始準備開車，根本係要你預佢轉三號半個鐘至一個鐘之前已經出定門口去車站排隊。我搭巴士搭小巴都打算行路返工，行最多一個鐘，可能快過搭車。搭地鐵的朋友只有祝你地好運，兩個鐘可能仲滯留緊地鐵站 － 話時話琴晚仲話斷電纜全線停駛，以港鐵之服務質素，大家記得祈求開到車之餘，唔會行行下無端端又停低。

而且唔係話一落波變三號，就問題都立即消失晒架，今次真係撞到香港十年難得一遇強風，琴日未掛八號時（老實，風力一早已經屬八號啦，係死都唔肯早掛嗟，影響個市點算？），返屋企途中已經一路爛遮斷樹枝，而每次打完風更加唔止樹枝仔咁簡單，試過一次行緊返工，對面行人路正正我企個位置大大碌樹枝飛落街，如果出門口時身痕過左對面馬路行的話已經俾棵樹扑死左。加大量亂飛垃圾（桶）、唔知邊度飛落街的招牌、俾雜物打爆的的士私家車，全部都對途人對交通有影響。再者好多人屋企真係俾個世紀風球搞到亂晒爆窗水浸停電兼而有之，可能夠你執成日手尾。但當然，老細只會理你係咪準時三號波後兩個鐘之內返到公司，天文台老頂商務及經濟發展局只會理趕唔趕得切盡快開市，你死？當然係你事啦。有事返唔到工？射波囉。但射波都要屋企做野丫，唔返工唔使做呀？呢個亦係我今日寧願返公司原因之一，近排好多野趕，就算真係打風吹足成日，咪一樣俾老細打電話遙控屋企做野，仲要分分鐘六點都冇得收工呀。

話時話，經過今次咁勁風球，先醒起政府好耐冇教過人防風。以前細個逢到雨季風季，電視成日播廣告教大家膠紙封窗邊交叉貼玻璃等措施防風防雨，但而家得返「落雨就唔好出街留番室內安全地方」之類老母唔係男人廣告，而再冇講解任何家居預防措施。原因，只得兩個：

1. 香港成為李家城後，政府根本預左唔會再有八號波。既無波，使乜教？

2. 廣告時段幾貴呀，要播都播國歌同《難忘時刻》啦。打風吹到你間屋爆玻璃咁大件事？梗係因為你唔愛國愛黨啦，電視播多幾次《難忘時刻》，播到你對祖國歸屬感爆棚，咪乜風都唔怕囉。