是Max Payne教曉我甚麼是noir。除左C&C同Diablo，Max Payne都係陪伴我一起成長的偉大PC game系列，雖然唔及另外兩隻出名，但可以話最鍾意佢。可能因為我係一個old-school港產片迷同metal友，Max Payne正正是兩者合二為一。

打不死鐵漢、家人愛人被殺、被摯友出賣、孤身復仇、街頭、黑幫、雙槍、飛身、慢動作，全隻game根本一心復興吳宇森時代港產槍戰片，game入面充滿大大小小John Woo同港產片tribute，最經典當然係一幕主角以一敵眾，開戰前爆番句「我變身周潤發(I made like Chow Yuen Fat)」，不得不為香港人同香港電影驕傲。既tribute港產槍戰電影又點少得浮誇慢動作，雖然全世界因為Matrix而認識360度旋轉子彈留痕慢動作a.k.a. Bullet Time，原創者其實係Max Payne，可惜比Matrix早開發但遲發行加媒體性質不同而被忽視，時也命也。

世界觀非常metal，本身營造舊式黑幫槍戰片深夜街頭urban noir氣氛，嫌未夠暗crossover埋古文學，第一集人名、地名、故事大量取材自北歐神話，主角為報仇深入暴風雪荒蕪地以一敵百，根本係個現代維京故事，應該播住Moonsorrow玩，或者歌詞寫黑手黨故事的Fleshgod Apocalypse。第二集典故係Paradise Lost，玩果陣要聽邊隊band唔使講啦。

除左世界觀、系統同氣氛，Max Payne有一半成功歸因於過場唔用動畫用漫畫，成為慢動作之外另一賣點同標誌。不過全因屎忽撞棍而黎，第一集開發時本來同其他game一樣過場正路地用多邊形CG，但盤數計唔掂，呀有計影相加工做漫畫加旁白咪得囉慳水慳力，預算細到作者自己做埋模特兒演出主角，但反傳統一著效果非常非常突出，黑媽媽畫面配更黑的漫畫隻game即時noir上加noir，藝術成份立即有三四層樓咁高。如果唔係畫漫畫Max Payne地位未必有今時今日咁神聖，除左流於大路，當時美國佬動畫技術未及日本，CG靚極都好樣衰是事實，所以我從來相信傳統lo-fi才是王道。

從到頭尾成隻碟自成一本漫畫書，其中三「頁」不得不收藏，除左提過之"I made like Chow Yun Fat"，有節昏迷入夢時突然破第四面牆，醒覺自己原來係電腦遊戲／漫畫角色，當堂「唔撚係卦」。全隻game／全本漫畫充斥主角無數精警對白同黑色幽默，令佢／隻game有性格得黎有血有肉非常討人歡心，論game第一集其實做得未算好好，敵人只跟一套程式指示即打幾多次都係一樣毫無變化，都會耐唔耐拎出黎爆多次，就係想睇主角點臭寸呀。好可惜第二集差得遠，諷刺是第一集大賣之後預算大左，第二集終於唔使作者兼埋出鏡而有錢搵真演員做漫畫model，畫風寫實得多對白亦有大量粗口，反而唔夠相比下卡通化的第一集noir，可以話Max Payne 2 noir得個殼，結果都幾失敗 － 雖然失敗亦因其他綜合因素，好似將秘密組織大陰謀部份過份放大，令重要之喋血街頭部份失色，劇本人物帶動故事唔到非常薄弱，對白又寫得差冇晒第一集神韻，加上過份神化幾個大角色，有點自毀招牌，我係想要Max Payne，唔係Matrix或者Neo呀。

好在第二集都有其可取之處，虛構電視劇玩得比漫畫成功。第一集有幾關都有得睇電視，不過純粹為玩野玩點到即止，第二集就設計到好大，經常撞到電視機播唔同劇集，只要為民除害時不忘停低睇電視，打到爆機可以追晒幾套劇。最精彩梗係模仿六七十年代流行之科幻懸疑連續劇的《Address Unknown》，講主角追殺連環殺手追到去個好似《Dark City》的虛擬世界「Noir York」，後來發現原來殺手就係自己，全部都係自己想像出黎。試想想你打機時，睇住game入面個角色，睇住遊戲世界入面部電視機，入面套扭曲現實假想劇，直頭係Inception式虛幻中的虛幻，而呢種人都癲思維正正係套劇亦係第二集一個主題，主角追兇到後來自我崩潰再精神分裂，完全反映緊「現實」中Max Payne心理。嫌齋睇未夠，劇集主題公園係其中一個主要場景，俾你直頭置身套劇超現實世界當中。

音樂亦彌補不少，對metal友黎講另一賣點，係搵黎Kartsy Hatakka@Waltari同Apocalyptica負責配樂（還記得Kartsy黎香港表演的故事嘛？）。我非常鍾意《Address Unknown》主題公園首曲：

片尾有Poets of the Fall《Late Goodbye》，第一次打爆機睇住女主角死，然後入字幕播呢首歌，好鬼感動，是繼FF7《Eyes on Me》之後又一曲詞同隻game夾到完美的主題曲。想當年為左聽首片尾，爆完機load番最後大佬關出黎又打多次，不斷重覆，而家都耐唔耐拎首歌出黎重溫。（但老實，Poets of the Fall其他歌我真係冇邊首特別鍾意或接受）

三個陪住我大的PC game系列，都係第三集成轉捩點：C&C3技術層面大勝水準已跌，之後新班底整第四集除左個名根本完全無關慘絕人寰；D3唔使我講啦俾人插成點大家都知，佢一日連單機都要連線上server先有得玩我一日唔會理；同樣延期左唔知幾多次、拖到2012年中終於出的MP3雖然同樣改頭換面，好比吳宇森變成Michael Bay冇晒noir味，我對佢期望甚高、更甚於D3，不過離開深夜都市去到貧民區日光日白打幫派戰爭，實在非常唔習慣，諗到一連串今時今日出晒名的FPS名都唔會諗到Max Payne － 大佬你唔noir又點稱得上Max Payne呀，仲要話新一集全動畫過場唔再畫漫畫，就好似真人快打唔再搵真人整sprite，已經唔再係同一回事。想睇漫畫？只餘製作公司同Marvel合作，官網有得免費下載PDF版之前傳：

因為Win7玩唔番頭兩集，最希望可以出個兼容新Windows的1+2集合輯，第三集冇得玩唔緊要，但頭兩集不得不收藏同重溫。